ई –पेपर | हाम्रो बारेमा | विज्ञापन | ग्राहक बन्नुहोस | Podcast | English
arthik abhiyan
ad banner Mango Tech Digital Marketing Solution

उद्योगी–उपभोक्ता प्रत्यक्ष संवादको अवसर

२०७६ फागुन, २  
अभियान परिशिष्ट (सप्लिमेन्ट)
NA

पछिल्लो समय बजारमा रहेको शिथिलतालाई चलायमान बनाउन एक्स्पोले ठूलो भूमिका निर्वाह गर्ने विराटनगरका युवा उद्यमीहरूको ठम्याइ छ । उनीहरूका अनुसार एक्स्पोले उपभोक्ता र उत्पादनकर्तालाई सोझै संवाद गर्न सक्नेगरी एउटै थलोमा भेट गराउँछ, जसका कारण उपभोक्ताका सन्तुष्टि/असन्तुष्टि उत्पादनकर्ताले थाहा पाउछन् । उपभोक्ताका लागि पनि एउटै थलोमा स्थानीयदेखि अन्तरराष्ट्रिय स्तरका उत्पादनहरूलाई अवलोकन गर्ने अवसर हो, एक्स्पो । यसै सन्दर्भमा आर्थिक अभियानले युवा उद्यमीहरूसँग गरेको कुराकानीको सार :

सुयश प्याकुरेल
वरिष्ठ उपाध्यक्ष,
उद्योग संगठन मोरङ

उपभोक्ता र उत्पादकको प्रत्यक्ष भेट हुने अवसर एक्स्पोले दिएको छ । यस्ता एक्स्पोको माध्यमबाट उपभोक्ताले आफूले प्रयोग गरिरहेको सामानको उत्पादन गर्ने कम्पनीसँग भेटघाट हुने अवसर पाउँछन्, जसले उनीहरूलाई उद्योग र उत्पादनसँग अझ नजीक बनाउँछ । उद्योगीका लागि पनि आफ्नो उत्पादनका बारेमा उपभोक्ताको बुझाइ के छ, कसरी लिएका छन् भन्ने जानकारी दिने अवसर हो यो एक्स्पो । एउटै प्याभिलियन मुनि हजारौं मानिसलाई छोटो अवधिमै आफ्ना उत्पादनका बारेमा जानकारी दिन पाउँदा उद्योगको समय र पैसा दुवै बचत हुन्छ । त्यस्तै, उपभोक्ताले पनि सयौं सामानको बारेमा जानकारी लिन सक्छन् । त्यसैले यस्ता एक्स्पोले दुवैलाई फाइदा दिएको हुन्छ । यो समय समयमा आयोजना भइराख्नु पर्छ ।

विपीन कावरा
सदस्य,
उद्योग संगठन मोरङ

एक्स्पो उद्योगी र उपभोक्ताबीच हुने प्रत्यक्ष अन्तरक्रियाको थलो हो । उपभोक्तासँग धेरै कम्पनीमा पुगेर सबै कुरा बुझ्न सक्ने समय हुदैन । तर, उ बजारमा आएका नया उत्पादनका बारेमा जानकारी लिन भने उत्सुक हुन्छ । अनि उद्योगी पनि लाखौं खर्च गरेर आफ्ना उत्पादनका बारेमा विज्ञापन गर्दा पनि नसमेटिएको जमातलाई  एक्स्पोमार्फत् प्रत्यक्ष सम्बाद गर्न सक्छन् । पछिल्लो समय नेपालमा उत्पादित प्लाष्टिकका बस्तुहरू निर्यातयोग्य छन् । तर, यो तथ्य धेरै उपभोक्ताले बुझेका छैनन् । बदाम जुस भारतमा मात्रै उत्पादन भइरहेको थियो । आज नेपालमा नै त्यो उत्पादन हुन थालेको छ । यी यस्तै जानकारी दिन नै एक्स्पोको आयोजना गरिएको हो । एक्स्पोले शिथिल भएको बजारलाई चलायमान बनाउन पनि सहायक भूमिका खेल्नेछ ।

प्रतिभा रिजाल
सदस्य,
उद्योग संगठन मोरङ

पछिल्लो समयमा महिलाहरू पनि उद्योग तिर आकर्षित भइरहेका छन् । महिलाहरूले स–साना घरेलु उद्योग देखी लिएर ठुला उद्योग सम्म संचालन गरिरहेका छन् । तर स–साना उद्योग संचालन गर्ने महिलाहरूलाई जहिले पनि बजारको समस्या हुदै आएको छ । यस्ता एक्स्पोले बजारीकरणमा सहजता थप्छ । स्थानिय उत्पादन प्रयोग गर्न उत्साहित उपभोक्ताको जमात बढीरहेको सन्दर्भमा एक्स्पोले महिला उद्यमीहरूलाई पनि नया“ संचार प्रवाह गर्छ ।

विनोद पौडेल
सदस्य,
उद्योग संगठन मोरङ

बजारमा नयाँ के आइरहेको छ भन्ने उत्सुक उपभोक्तालाई आफ्ना उत्पादनको बारेमा बताउने अवसर पनि हो एक्स्पो । वास्तवमा एक्स्पोमा किन्ने र विक्री गर्नेभन्दा पनि उपभोक्ताले ज्ञान लिने अवसर पाउँछन् । कुनै पनि उत्पादनमा उपभोक्ताको प्रतिक्रियाले त्यसलाई थप परिमार्जन गरेर बजारमा लैजान सक्ने र उपभोक्तामैत्री बनाउन पनि सहयोग मिल्छ । विश्व बजारमा अहिले एक्स्पोको महत्त्व निकै बढ्दै गएको छ ।

नन्दकिशोर राठी
उपाध्यक्ष,
उद्योग संगठन मोरङ

उद्योगी र उपभोक्ताबीचको हुने मेल नै मेला अथवा एक्स्पो हो । यसले उद्योगी र उपभोक्ता दुवैलाई उत्साहित बनाउँछ । उद्योगीले आफ्नो उत्पादनको प्रवद्र्धन गर्ने अवसर हो भने उपभोक्ताले पनि कुन चीजमा बढी स्किम छ भनेर छानेर किन्न सक्ने अवसर एक्स्पोले प्रदान गर्ने र अरू बेला यस्तो अवसर उपभोक्ताले पाउँदैनन् । एउटै छानामुनि उपभोक्ताले कृषिदेखि किचेनका सामग्री समेत पाउँछन् ।

हरिप्रसाद कोइराला
प्रदेश प्रमुख,
नेपाल बंगलादेश बैंक

बजार जहिले पनि मध्यस्थकर्ताबाट सञ्चालित भइरहेको  हुन्छ । उद्योगी र उपभोक्ता बीचको भेट विरलै हुन्छ । यस्ता एक्स्पोको आयोजनाले उद्योगी र उपभोक्ताका बढी नजिकिन्छन् । आफ्नो उत्पादनलाई कसरी आगामी दिनमा लिएर जाने भन्ने उद्योगीले थाहा पाउँछन् । एक्स्पोले बजारलाई केही हदसम्म चलायमान पनि बनाउँछ ।

बजारमा पैसा अभाव भइरहेको बेला यस्ता एक्स्पोको आयोजनाले बजारमा चहलपहल बढाउँछ । उपभोक्ताले पनि विभिन्न स्किमहरूको फाइदा लिन सक्ने अवस्था हुन्छ ।

पारस लुनिया
युवा उद्यमी

एक्स्पोले नगरको इज्जतलाई बढाउने काम गर्छ । कस्तो उत्पादन बजारमा आइरहेको छ र यसको उत्पादन कहाँ भइरहेको छ भन्ने जानकारी पनि उपभोक्ताले थाहा पाउँछन् । पछिल्लो समय बजारमा रकमको अभाव छ यस्ता एक्स्पोले त्यसको पूर्तिका लागि पनि राम्रो भूमिका निर्वाह गर्छ ।

राकेश सुराना
उपाध्यक्ष,
उद्योग संगठन मोरङ

एक्स्पो विक्री गर्ने उद्देश्यले आयोजना गरिँदैन । एक्स्पो उद्योगीले उत्पादन गरेको वस्तुलाई आम उपभोक्ताका माझमा परिचय दिनेगरी स्टलमा राखिन्छ र त्यो वस्तु त्यसको विशेषताबारे उपभोक्तालाई जानकारी गराइन्छ । तर यहाँ हाम्रो एक्स्पोमा विक्री गर्ने पनि संस्कार छ । यो एक्स्पोले नेपाली उपभोक्तालाई मात्र नभई जोगबनी पारीका भारतीय उपभोक्तालाई पनि तान्छ । साथै भारतमा मात्र होइन, नेपालमा पनि राम्रा उत्पादनहरू रहेछन भन्ने जानकारी दिन्छ ।  

सुबोध कोइराला
सदस्य,
उद्योग संगठन मोरङ

उद्योगीले बजारमा पठाएको उत्पादनको प्रतिक्रिया सोझै उद्योगीले पाउँदैन । त्यहा बिचौलिया अर्थात् स्थानीय विक्रेतासँग मात्र उपभोक्ताको संवाद हुन्छ । आफ्नो उत्पादनको कसीको रूपमा रहेका उपभोक्ता के भन्छन् भन्ने सोझै सुन्न उद्योगीले यस्तो एक्स्पोमा पाउँछन् । त्यही भएर एक्स्पो उद्योगी र उपभोक्ता दुवैका लागि महत्त्वपूर्ण छ । उपभोक्ताले एक्स्पोमा पाउने छूट र सुविधा अरू बेला पाउँदैनन् । त्यही भएर उद्योगीहरूले आफ्नो स्टलमा भएका उत्पादनलाई धेरै छूटमा दिइरहेका हुन्छन् ।

प्रतिक्रिया [0]
प्रतिक्रिया दिनुहोस्