ई –पेपर | हाम्रो बारेमा | विज्ञापन | ग्राहक बन्नुहोस | Podcast | NBA
arthik abhiyan
ad banner Mango Tech Digital Marketing Solution

स्थानीय तहका नमूना काम : कतै विपन्नलाई रोजगारी कतै घरभाडा नि : शुल्क    

२०७७ बैशाख, ३०  
प्रदेश ०५
NA

वैशाख ३०, तम्घास । विश्वभर फैलिएको कोरोना भाइरस संक्रमण रोक्न सरकारले गरेको बन्दाबन्दी लम्बिंदै गएपछि यतिबेला मजदूर तथा विपन्न परिवार समस्यामा छन् ।

खासगरि दिनभरि काम गरेर बिहानबेलुका छाक टार्नेलाई बन्दाबन्दीले समस्यामा पारेपछि गुल्मीका स्थानीय तहले विभिन्न चरणमा राहत वितरण गरेका छन् ।  सबै स्थानीय तहले पहिलो चरणको राहत वितरण सकेर दोस्रो चरण शुरु गरेका हुन् । यहाँका केही स्थानीय तहले बन्दाबन्दीका समयमा पनि अनुकरणीय तथा लोकप्रिय काम गरेका छन् । 

राहतस्वरुप स्थानीय तहले दाल, चामल, तेललगायत खाद्य सामग्री वितरण गरेका छन् तर धुर्कोट गाउँपालिकाले विपन्न परिवारका लागि रोजगारी दिने निर्णय गरेको छ । गाउँ कार्यपालिकाको बैठकले विपन्न तथा मजदूर परिवारका लागि सीधै राहत वितरण नगरी काम दिने निर्णय गरिएको गाउँपालिकाका अध्यक्ष भूपाल पोखरेलले जानकारी दिए ।     
 

सडक मर्मत, गोरेटो बाटो, खानेपानी तथा सिंचाइलगायत क्षेत्रमा रोजगार प्रदान गरिने गाउँपालिकाले जनाएको छ । काम गरेबापत राष्ट्रिय मापदण्डानुसार पारिश्रमिक प्रदान गरिनेछ । पहिलो चरणमा ७७९ जनालाई राहत वितरण गरेको उक्त गाउँपालिकाले दोस्रो चरणमा काम दिने निर्णय गरेको हो ।     
 

कोरोना भाइरसबाट बच्न गरिएको लकडाउनलाई ध्यानमा राखेर सामाजिक दूरी कायम गरी बढीमा पाँच जनासम्मको समूह बनाई नजीकका स्थानमा काममा लगाइने गाउँपालिका उपाध्यक्ष शिवबहादुर खत्रीले बताए ।

गाउँपालिकाले यसअघि बाँझो जग्गा खन्नेलाई अनुदान दिनेसमेत निर्णय गरेको थियो । दुई वर्ष वा सोभन्दा बढी बाँझो रहेको जग्गा खन्नेलाई त्यसमा लगाइने र बालीअनुसारको अनुदान दिइने गाउँपालिकाका प्रमुख प्रशासकीय अधिकृत काशीराम पन्थीले जानकारी दिए । 
घरघरमै औषधि     

सत्यवती गााउँपालिकाले दीर्घरोगीका लागि घरघरमै औषधि पुर्‍याएको छ । मुटु , मानसिक, मधुमेहलगायत रोगबाट ग्रसित नागरिकका लागि नि : शुल्क औषधि पुर्‍याइएको हो ।     
गाउँपालिकाका कुल ६९१ जनालाई एक महीनासम्म पुग्ने गरी महिला स्वास्थ्य स्वयंसेविकामार्फत घरघरै औषधि प्रदान गरिएको गाउँपालिकाका स्वास्थ्य संयोजक सूर्यबहादुर रानाले जानकारी दिए ।
गाउँपालिकाले कुल रू.५ लाख १६ हजार बराबरको औषधि खरीद गरेको थियो ।     
मुसिकोटमा बचत घर     

मुसिकोट नगरपालिकाले किसानको उत्पादन खरीद गर्ने निर्णय गरेको छ । बचत घरको स्थापना गरी उत्पादित धान, चामल, कोदोलगायत खाद्य सामग्री नगरपालिकाले खरीद गरेर संकलन गर्ने छ ।

त्यसरी राखिएको खाद्यान्न विपद्को समय वा खाद्य संकट भएका बेला नगरवासीलाई वितरण गरिने नगर प्रमुख सोमनाथ सापकोटाले जानकारी दिए ।     

उक्त कार्यका लागि नगरपालिकास्तरीय विपद् व्यवस्थापन समितिमा रहेका व्यक्ति रहने गरी कार्यदल गठन गरिएको छ । कार्यदलले एक महीनाभित्र प्रतिवेदन बुझाएपछि काम शुरु हुने प्रमुख सापकोटाले बताए । रासस
 

प्रतिक्रिया [0]
प्रतिक्रिया दिनुहोस्