ई –पेपर | हाम्रो बारेमा | विज्ञापन | ग्राहक बन्नुहोस | Podcast | NBA
arthik abhiyan
ad banner Mango Tech Digital Marketing Solution

सुनकोशी गाउँपालिकाले श्रममा आधारित राहत वितरण गर्दै

२०७७ बैशाख, ३१  
वाग्मती प्रदेश
NA
author avatar एलएन शर्मा

सिन्धुली । सिन्धुलीको सुनकोशी गाउँपालिकाले रोजगारमा आधारित राहत दिने भएको छ । लकडाउनका कारण अनौपचारिक क्षेत्रमा दैनिक ज्यालादारी गर्ने अति विपन्न परिवार तथा मजदूरलाई जीविका चलाउन समस्या परेपछि गाउँपालिकाको कार्यपालिका बैठकले यस्तोे निर्णय हो ।

लकडाउनका कारण रोजगारी गुमाएका मजदूर वर्गलाई जीविकोपार्जन गर्न समस्या परेको भन्दै गाउँ कार्यपालिका बैठकले रोजगारीमा आधारित राहत दिने निर्णण गरेको गाउँपालिकाका प्रवक्ता कृष्णराज दाहालले बताए । उनका अनुसार गाउँपालिकाले एक घर एक रोजगारी दिने भएको छ । सामाजिक दूरी कायम गरी उनीहरूलाई काममा लगाइने गाउँपालिकाले बताएको छ । मजदूरलाई प्रचलित ज्याला दररेट बमोजिम अनुसार एक अदक्ष कामदारले प्राप्त गर्ने न्यूनतम ३ दिन बराबरको पारिश्रमिक कायम गरी सो बराबर हुन आउने राहत सामग्री (जिन्सी) वितरण गरिने निर्णय कार्यपालिका बैठकले गरेको प्रवक्ता दाहालले बताए ।

यसका लागि गाउँपालिकाभित्र बसोवास गर्नेे सम्बन्धित वडा कार्यालयमा सम्पर्क राखी निवेदन पेश गर्न गाउँपालिकाले आग्रह गरेको छ । राहतमा आधारित रोजगारी पाउनका लागि गाउँपालिकाले मापदण्डसमेत तय गरेको उनले बताए । उनका अनुसार सरकारी तथा अन्तरराष्ट्रिय सरकारी सेवाको करार वा स्थायी प्रकृतिको रोजगार भएका, पेन्सन पाउने, सामाजिक सुरक्षा भक्ता पाउने, सामाजिक रूपमा प्रतिष्ठित तथा आर्थिक रूपमा सम्पन्न व्यक्तिहरूले यस्तो रोजगारी पाउने छैनन् ।  असक्त तथा बृदबृद्धा नागरिकको हकमा भने विशेष व्यवस्था गरिने उनको भनाइ छ ।  

जिल्लाका अन्य स्थानीय तहले भने मजदूर तथा विपन्नलाई अहिलेसम्म राहत स्वरूप खाद्यान्न नै वितरण गर्दै आएका छन् । जिल्लामा राहतको सट्टा रोजगारी दिने निर्णय गर्ने सुनकोशी गाउँपालिका पहिलो स्थानीय निकाय भएको प्रवक्ता दाहालले बताए । मानिसलाई राहत मात्र वितरण गर्दा उनीहरूको मनस्थिति पनि कमजोर हुने र यस्तो अवस्थामा मानिसहरू डिप्रेसनमा पनि जान सक्ने भएकाले उनीहरूलाई व्यस्त राख्न श्रममा आधारित राहत वितरण गर्न लागिएको उनको भनाइ छ ।

‘श्रम गरेपछि उनीहरूले पनि आम्दानी गर्छन् । यसले एकातिर उनीहरूलाई गुजार चलाउन सजिलो हुन्छ भने अर्कोतिर गाउँपालिकाको विकासमा पनि सहयोग पुग्छ,’ उनले भने ।

 

 

प्रतिक्रिया [0]
प्रतिक्रिया दिनुहोस्