ई –पेपर | हाम्रो बारेमा | विज्ञापन | ग्राहक बन्नुहोस | Podcast | English
arthik abhiyan
ad banner Mango Tech Digital Marketing Solution

आन्तरिक उडान शुरू गर्न गृहकार्य जारी

निजी सेवाप्रदायकको मिश्रित प्रतिक्रिया

२०७७ जेठ, १३  
समाचार
Image Not Found
author avatar टीपी भुसाल

काठमाडौं । कोरोना महामारी नियन्त्रणका लागि लगाइएको बन्दाबन्दीसँगै बन्द गरिएको आन्तरिक हवाई उडान सुचारु गर्ने विषयमा गृहकार्य शुरू भएको छ । बन्दाबन्दीकै बीच सीमित ठाउँमा भए पनि आन्तरिक उडान शुरू गर्न पर्यटन तथा नागरिक उड्डयन मन्त्रालय र नेपाल नागरिक उड्डयन प्राधिकरण (क्यान) अहिले छलफलमा छन् । तर, उडान शुरू गर्ने नगर्ने भन्ने अन्तिम निर्णय उच्चतहबाटै हुनेछ । सरकारले कोराना संक्रमणबाट जोगिन शुरूमा गत चैत ९–१८ गतेसम्म सबै अन्तरराष्ट्रिय उडान बन्द गरेको थियो । आन्तरिक तथा तथा अन्तरराष्ट्रिय हवाई उडानमा लगाएको रोक पछिल्लोपटक जेठ मसान्तसम्म लम्ब्याउने निर्णय भएको छ ।

विश्व स्वास्थ्य संगठन, अन्तरराष्ट्रिय नागरिक उड्डयन संगठन (आइकाओ)लगायत संस्थाको मापदण्डलाई आधार बनाएर आन्तरिक उडान सञ्चालनका लागि छलफल भइरहेको उड्डयन प्राधिकरणले बताएको छ । यसका लागि निर्देशिका बनाउने तयारीमा प्राधिकरण जुटेको यसका महानिर्देशक राजन पोखरेलले बताए । ‘जेठ मसान्तसम्म सबै व्यावसायिक उडान बन्द नै छन् तर पनि उडान खुलाउनुपर्ने अवस्था आएमा कसरी जाने भन्ने बारेमा प्राधिकरणले निरन्तर काम गरिरहेको छ,’ उनले भने ।

पोखरेलका अनुसार अब विमानस्थल सञ्चालन गरिँदा सामाजिक दूरी कायम गरी स्वास्थ्य सर्तकताका सबै उपाय अवलम्बन गरिनेमा जोड दिइनेछ । यसका लागि प्राधिकरणले आफ्ना कर्मचारी तथा निजी विमानसेवा कम्पनीका कर्मचारीहरूका लागि तालीम दिँदै छ ।

‘कोरोना महामारीको पृष्ठभूमिमा अब विमानस्थलको सुरक्षित सञ्चालन कुनै एउटा निकायको भरमा मात्र हुन सक्दैन । त्यसैले अन्य देशमा भइरहेका अभ्यास तथा नियमनकारी निकायहरूका निर्देशन र निर्देशिका अनुसरण गर्दै तयारी गरिरहेका छौं,’ उनले भने ।

सञ्चालन निर्देशिका पारित भएपछि सबै विमानस्थल र विमानसेवा कम्पनीहरूलाई पठाइनेछ । प्राधिकरणका अनुसार निर्देशिकामा स्वास्थ्य मापदण्डअनुरूप सामाजिक दूरी कायमदेखि स्वास्थ्य सतर्कताका लागि सेनिटाइजर, मास्क प्रयोग गर्नेजस्ता विषय समेटिने छन् ।

बन्दाबन्दीको अवधि कतिसम्म बढ्ने निश्चित नभएकाले सुरक्षा मापदण्ड अपनाउँदै उडान शुरू गर्नुको विकल्प नभएको हवाई सेवा सञ्चालक संघ (आयोन) का प्रवक्ता योगराज शर्मा कँडेल बताउँछन् । उनले विमान कम्पनीहरू नियामक निकायले तयार पारेको निर्देशिकाबमोजिम सेवा शुरू गर्न तयार रहेको र सोहीअनुसार तयारी गरिरहेको बताए ।

कँडेलका अनुसार अहिले फिक्सड विङतर्फ सरकारी नेपाल वायुसेवा निगम र निजीतर्फ सीता एअर, समिट र तारा एअरले कार्गो उडान सेवा दिइरहेका छन् । त्यस्तै उद्धारका लागि माउन्टेन, कैलास, सिम्रिक, मनाङ र हेलि एभरेस्टले उडान गरिरहेका छन् ।

सरकारको तयारीप्रति निजी वायुसेवा कम्पनीहरूले मिश्रित प्रतिक्रिया दिएका छन् । उनीहरूले आफूहरू तयार रहे पनि लकडाउनको अवस्थामै व्यावसायिक उडान त्यति प्रभावकारी हुन नसक्ने बताएका छन् । निजीक्षेत्रको श्री एअरलाइन्सका म्यानेजर अनिल मानन्धरले बन्दाबन्दीकै बीच उडान शुरू गर्नुको कुनै अर्थ नभएको बताए । ‘हामी त तयार नै छौं तर जबसम्म सार्वजनिक यातायात शुरू हुँदैन तबसम्म जहाज उडाएर मात्रै हुँदैन,’ उनले भने ।

बुद्ध एअरका म्यानेजर रूपेश श्रेष्ठले सरकारले निर्देशिका बनाई वातावरण सहज बनाए आफूहरू तयारी अवस्थामै रहेको बताए । ‘हामी तयारी अवस्थामै छौं । बुद्ध एअरले त आफ्नो आन्तरिक कार्यविधिसमेत बनाएर बसेको छ । अब कहिले खुल्ने कसरी चलाउने त्यो नियामक निकाय र सरकारले भन्ने कुरा हो,’ उनले भने ।

तत्काल उडान गर्ने भनिएका विमानस्थलदेखि जिल्ला सदरमुकाम या प्रदेश सदरमुकामसम्म सुरक्षा अपनाउँदै यातायात सेवाको व्यवस्था गर्नुपर्ने सुझाव आयोनले दिएको कँडेल बताउँछन् ।

प्रतिक्रिया [0]
प्रतिक्रिया दिनुहोस्