ई –पेपर | हाम्रो बारेमा | विज्ञापन | ग्राहक बन्नुहोस | Podcast | Newbiz
arthik abhiyan
ad banner Mango Tech Digital Marketing Solution

२८ वर्षपछि ग्रामीण कच्ची सडक कालोपत्र गर्न शुरु

२०७७ भदौ, २७  
गण्डकी प्रदेश
Image Not Found
फाइल फोटो

भदौ २७, तनहुँ । तनहुँ जिल्लाको व्यास नगरपालिका वडा नं १३ र १४ अन्तर्गत पर्ने गुँदीफच्याङ ग्रामीण कच्ची सडक २८ वर्षपछि कालोपत्र गर्न थालिएको छ । सदरमुकाम दमौलीदेखि झण्डै १४ किलोमिटर दूरीमा रहेको उक्त ग्रामीण सडक कालोपत्र गर्न लागिएको हो ।  

सो मार्गबाट व्यास नगरपालिका, बन्दिपुर गाउँपालिका हुँदै पृथ्वीराजमार्ग अन्तर्गत डुम्रे बजार पुगिन्छ ।  

सो सडकमा यसअघि ग्राबेल, नाला निर्माण र आवश्यक स्थानमा ह्युमपाइप राखेर यातायात सञ्चालन भएको थियो । विसं २०४८ पछि कच्चीमार्गको रुपमा सडक चलेपनि कालोपत्र नहुँदा वर्षामा हिलोले कष्टकर यात्रा गर्नुपर्ने बाध्यता छ । 

नगरपालिकाको वडा नं १४ केशवटारस्थित रुम्सी ढाक्रेस्वाँरा चोकदेखि आँपटोल डाँडासम्म करीब ६०० मिटर दूरी कालोपत्र गर्न थालिएको वडाध्यक्ष काजीमान श्रेष्ठले जानकारी दिए । 

गण्डकी प्रदेशको समानीकरण बजेट व्यास नगरपालिकामार्फत आएपछि सडक कालोपत्र थालिएको हो । उनले भने, ‘कात्तिक मसान्तभित्र उक्त दूरीमा कालोपत्र सम्पन्न गर्ने लक्ष्य छ ।’ रू. एक करोड २५ लाखको समानीकरण बजेट विनियोजन पश्चात कालोपत्र कार्य थालिएको हो । 

गण्डकी प्रदेश सरकारबाट उक्त मार्ग कालोपत्र गर्नका लागि गत वर्ष डेढ करोड र यसवर्ष सवा करोड विनियोजन गरेपनि टेण्डर नै नगराई काम रोकिएको वडाध्यक्ष श्रेष्ठले जानकारी दिए । 

गतवर्ष र यसवर्ष बजेट विनियोजन गरी काम नगरेपछि स्थानीयवासी डेलिगेशन जाने तयारीमा जुटिरहेको उनले बताए । व्यास नगरपालिकाद्वारा विनियोजित रू. एक करोड बजेट रकमले दमौली बजारबाट केशबटार जाने सडक मार्गको पनि कालोपत्र कार्य थालिएको छ । 

दमौली–केशवटार गुदीफच्याङ मार्गको करीब १४ किलोमिटरमध्ये हालसम्म करीब ४ किलोमिटर सडक मार्ग कालोपत्र सम्पन्न भइसकेको बताइएको छ । रासस

प्रतिक्रिया [0]
प्रतिक्रिया दिनुहोस्