ई –पेपर | हाम्रो बारेमा | विज्ञापन | ग्राहक बन्नुहोस | Podcast | Newbiz
arthik abhiyan
ad banner Mango Tech Digital Marketing Solution

खतिवडाको पुनरागमन र कुलमानको बहिर्गमन

२०७७ असोज, १  
सम्पादकीय
Image Not Found

सत्तारूढ नेकपाको आन्तरिक किचलोका कारण राष्ट्रिय सभाको सदस्यमा पुनः सिफारिश हुन नसक्दा अर्थमन्त्रीबाट राजीनामा दिएका डा. युवराज खतिवडा फेरि सत्तामै पुगेका छन्, प्रधानमन्त्रीको विशेष आर्थिक सल्लाहकारका रूपमा । उता, नियमित विद्युत् आपूर्तिलगायत सुधार गरी ऊर्जाक्षेत्रमा ठूलै सफलता भित्र्याएका कुलमान घिसिङ भने नेपाल विद्युत् प्राधिकरणको कार्यकारी निर्देशकमा पुनर्नियुक्त हुन सकेनन् ।

खतिवडाको विज्ञताको लाभ लिने नै हो भने छद्म जिम्मेवारी दिनुभन्दा खुला जिम्मेवारी दिनु उपयुक्त हुन्थ्यो । यसरी घुमाउरो पाराले अर्थमन्त्रीको जिम्मेवारी दिँदा विकृत नजीर स्थापना भएको छ ।

परिणामका हिसाबले औसत मानिएका तर अर्थतन्त्र राम्ररी बुझेका खतिवडालाई घुमाउरो बाटोबाट अर्थतन्त्र हाँक्ने अवसर फेरि दिइँदै छ भने विद्युत् प्राधिकरणमा ठूलो परिवर्तन ल्याएका घिसिङलाई भने पाखा लगाइएको छ । ओली सरकारको यो निर्णयप्रति सामाजिक सञ्जालमा नागरिकको असन्तुष्टि पोखिएको छ भने कुलमानको समर्थनमा प्रदर्शन नै गरिएको छ ।

विद्वान् अर्थमन्त्रीका रूपमा चिनिए पनि खतिवडाको अढाई वर्षे कार्यकाल यस अघिका अर्थमन्त्रीको भन्दा अब्बल रहेन । प्रचण्ड बहुमतको सरकारको अर्थमन्त्री रहँदा पनि खतिवडाले आफ्नो कार्यकालमा नेपाली अर्थतन्त्रमा संरचनात्मक सुधार गर्न सकेनन् ।

दुई वर्षका लागि राष्ट्रिय सभामा छानिएका खतिवडाले सभाको सदस्य नभए पनि संवैधानिक व्यवस्थाअनुसार थप ६ महीना देशको अर्थतन्त्र हाँके । उनले अर्थतन्त्रमा केही दीर्घकालीन हित हुने काम गरेका छन् । यद्यपि कोरोना महामारीका कारण देशको अर्थतन्त्र थलिएको बेलामा ठोस र परिणाम अनुभूत हुने खालका कार्यक्रम नल्याउ“दा उनको आलोचना भएको छ ।
 
डा. खतिवडा अर्थतन्त्रलाई राम्ररी बुझेका व्यक्ति मानिन्छन् । यस्तोमा उनको विज्ञताको लाभ लिने नै हो भने छद्म जिम्मेवारी दिनुभन्दा खुला जिम्मेवारी दिनु उपयुक्त हुन्थ्यो । यसरी घुमाउरो पाराले अर्थमन्त्रीको जिम्मेवारी दिँदा विकृत नजीर स्थापना भएको छ । त्यसैले उनलाई सल्लाहकारमा नियुक्ति दिँदा केही आशंका उठिसकेको छ । सरकारको काम विश्वासको वातावरण बनाउनु हो । तर, जसरी खतिवडालाई जिम्मेवारी दिइएको छ त्यो उनीमाथि अन्याय हुन्छ । अर्थमन्त्रीका रूपमा उनले काम गर्न नसक्दा आलोचना हुनु एउटा पक्ष हो । तर, जुन बाटोबाट अर्थतन्त्र बुझेको र क्षमतावान् व्यक्तिलाई जिम्मेवारी दिइँदै छ त्यो स्वयं खतिवडाको व्यक्तित्वका लागि पनि प्रत्युत्पादक हुन सक्छ ।

कोरोना महामारीबाट थलिएको देशको अर्थतन्त्रको पुनरुत्थानका लागि अहिले सबल अर्थमन्त्रीको आवश्यकता छ । तर, प्रधानमन्त्री केपी शर्मा ओलीले खतिवडालाई आफ्नो विशेष आर्थिक सल्लाहकार बनाएर उनैबाट अर्थ मन्त्रालय चलाउने संकेत गर्नुभएको छ ।

चुनौतीको यो समयमा अर्थ मन्त्रालय मन्त्रीविहीन हुनु/पारिनु सकारात्मक संदेश दिँदैन ।  खतिवडाको अबको भूमिका भनेको घुमाउरो पाराले अर्थ मन्त्रालय हाँक्नु हो । यसले अर्थ मन्त्रालयको सञ्चालनमा गम्भीर समस्या निम्त्याउने सम्भावना छ । अर्थतन्त्र संवेदनशील बनेका अवस्थामा सक्रिय अर्थमन्त्री आवश्यक छ । नेतृत्वविनाको अर्थ मन्त्रालयले पक्कै पनि यो गम्भीर समयमा काम गर्न गाह्रो हुनेछ । अर्थतन्त्र असफल हुनु भनेको समग्रमा देश नै असफल हुनु हो । यस्तो बेलामा प्रधानमन्त्रीले सक्षम अर्थमन्त्री खोज्नुपर्ने हो ।

कुलमानको बहिर्गमनले सरकार राम्रो काम गर्नेलाई पुरस्कृत गर्न पछि हटेको सन्देश दिएको छ । उनको नेतृत्वमा दैनिक १८ घण्टा लोडशेडिङ हुने मुलुक अहिले लोडशेडिङमुक्त भएको छ । घाटामा गएको प्राधिकरण अर्बौं रुपैयाँ नाफामा गएको छ । यसरी कुलमानले जनताले प्रत्यक्ष अनुभव गर्ने काम गरेकाले जनताको समर्थन पाएका हुन् । यद्यपि संस्थाको दीर्घकालीन हितका लागि काम कत्तिको गरेका छन् भन्नेमा टीकाटिप्पणी भइरहेको छ । उनलाई एक अवधि काम गर्न दिइनुपर्थ्यो अथवा योभन्दा ठूलो जिम्मेवारी दिएको भए पनि हुन्थ्यो । कुनै जिम्मेवारी दिएको भए सरकारको आलोचना हुने थिएन । तर, राम्रो काम गरेको भनी जनताले पत्याएका मानिसलाई कुनै अवसर नदिँदा सरकारप्रति जनता थप आक्रोशित हुने सम्भावना छ ।

प्रतिक्रिया [0]
प्रतिक्रिया दिनुहोस्