ई –पेपर | हाम्रो बारेमा | विज्ञापन | ग्राहक बन्नुहोस | Podcast | Newbiz
arthik abhiyan
ad banner Mango Tech Digital Marketing Solution

धरानमा आजदेखि अनलाइनबाटै कर तिर्ने व्यवस्था

२०७७ असोज, १  
प्रदेश ०१
NA

धरान (अस) । कर प्रणालीलाई करदातामैत्री बनाउन धरान उपमहानगरपालिकामा बिहीवार (आज) देखि अनलाइन कर प्रणाली सेवा शुरू गरिने भएको छ । उपमहानगरपालिकाले कर प्रणालीलाई सहज, व्यवस्थित र पारदर्शी बनाउने उद्देश्यले अनलाइन कर प्रणाली सेवा शुरू गर्न लागेको हो ।

सेवाग्राहीले आफूले तिर्नुपर्ने सम्पूर्ण कर विश्वको जुनसुकै ठाउँबाट पनि अनलाइन प्रणालीमार्फत भुक्तानी गर्न सकिने व्यवस्था गर्न लागेको उपमहानगरले बताएको छ । सेवाग्राहीले मोबाइलमा ‘कनेक्ट आईपीएस/ई–सेवा’ बाट उपमहानगरमा बुझाउनुपर्ने भूमि कर, घर तथा घरबहाल कर, व्यवसाय करलगायत सम्पूर्ण करको भुक्तानी गर्ने व्यवस्था गरिएको धरान उपमहानगरको सूचना अधिकृत खगेन्द्र खतिवडाले जानकारी दिए ।

उनले भने, ‘सेवाग्राहीले उपमहानगरलाई आफूले बुझाउनुपर्ने सम्पूर्ण कर अनलाइन प्रणालीमार्फत भुक्तानी गर्ने व्यवस्था गरिएको छ, विश्वको जुनसुकै ठाउँमा बसेर कर बुझाउन सकिने छ ।’

करदाताले धरान उपमहानगरपालिकाको वेभसाइटमार्फत आफूले बुझाउनुपर्ने शुल्कबारे थाहा पाउन सक्ने छन् । तर, करदाताले आफ्नो इमेल ठेगाना र मोबाइल नम्बर करको सिस्टममा अद्यावधिक भने गर्नुपर्ने छ । करदाताले आफूले विगतमा तिरेको करको रसिद लगेर वडा कार्यालयमा गएर आफ्नो सम्पूर्ण विवरण टिपाउनु पर्ने छ ।

सेवाग्राहीको सहजताका लागि वडामा कर तिर्ने व्यवस्था गरिएको बताउँदै अधिकृत खतिवडाले अब सेवाग्राहीको घर–घरमा कर प्रणाली सेवा पुर्‍याइएको बताए । उनले भने, ‘हामीले सेवाग्राहीको सहजताका लागि वडा वडामा कर तिर्ने व्यवस्था गरेका छौं, अब यो सेवा घरघरमा पुर्‍याउन शुरू गर्न लागेका छौं, कार्यालयमा आएर लाइन बसेर तिर्ने झन्झटको अन्त्य गर्नका लागि यो सेवा शुरू गर्न लागिको हो ।’

यो सेवा विद्युत् र खानेपानीको विल भुक्तानी गरे जस्तै सजिलो हुने छ । गत वर्षदेखि नै अनलाइन प्रणालीको शुरूवात गर्दै लैजाने योजनाअनुसार शुरुआत गर्न लागिएको अधिकृत खतिवडाको भनाइ छ ।

प्रतिक्रिया [0]
प्रतिक्रिया दिनुहोस्