ई –पेपर | हाम्रो बारेमा | विज्ञापन | ग्राहक बन्नुहोस | Podcast | Newbiz
arthik abhiyan
ad banner Mango Tech Digital Marketing Solution

नेपालका सात आश्चर्य

२०७७ असोज, २३  
तीतो मीठो
author avatar मदन लम्साल

विश्वका सात आश्चर्य भनेर चिनिएका इजिप्टको पिरामिडदेखि चीनको ग्रेटवालसम्म अब पुराना भए । अहिले तीभन्दा धेरै नयाँ आश्चर्यहरू सृजना भइसकेका छन् । र, ती आठौं वा दशौं आश्चर्यहरू अन्त कतै नभएर नेपालमै छन् । आश्चर्यको कुरा चाहिँ नेपालमा नयाँ नयाँ आश्चर्यहरू कति सृजना भएका छन् भन्ने विश्वलाई थाहा छैन जस्तो छ । ‘विश्व आश्चर्य छनोट समिति’को आँखा नेपालका यी धेरै आश्चर्यहरूमा अझै किन नपरेको होला ? यो पनि आश्चर्य नै हो ।

आफूलाई प्रजातन्त्रको पहरेदार ठान्ने विपक्षीहरू संसद्भित्रै तोडफोडमा उत्रन्छन् । कानून बनाउन भनेर संसद्मा चुनेर पठाइएकाहरू कुलो बनाउन मात्र व्यस्त हुने यी कुर्सी हाननीयहरूलाई माननीय भन्दिनुपर्ने अचम्मको चलन छ यहाँ । कस्तो आश्चर्य ?

शुरू गरौं नेपालको पहिलो आश्चर्यबाट । देश संघीयतामा गइसकेपछि पनि केन्द्रबाटै सूक्ष्म व्यवस्थापन भइरहेको विश्वमा अन्त कतै छ ? एउटा प्रदेशको राजधानी तोक्न मुख्यमन्त्री केन्द्र धाउँछन् र दुई नेताको स्वीकृतिमा मात्र हरेक काम गर्छन् । अनि आफूलाई प्रजातन्त्रको पहरेदार ठान्ने विपक्षीहरू संसद्भित्रै तोडफोडमा उत्रन्छन् । कानून बनाउन भनेर संसद्मा चुनेर पठाइएकाहरू कुलो बनाउन मात्र व्यस्त हुने यी कुर्सी हाननीयहरूलाई माननीय भन्दिनुपर्ने अचम्मको चलन छ यहाँ । कस्तो आश्चर्य ?

दोस्रो आश्चर्य : जनताका प्रतिनिधि बनेर आएकाहरू नै भ्रष्टाचारमा माथिदेखि तलसम्म चुर्लुम्म डुबेका छन् । धरहरा ढले पनि भ्रष्टाचारको मिनार भने दिनप्रतिदिन अग्लो हुँदै गैरहेको छ । तर पनि जनता टुलुटुलु हेरेर बस्छन् । किनकि त्यसविरुद्ध केही गर्ने सामर्थ्य उनीहरूसँग सिद्धिसकेको जस्तो देखिन्छ । देश यति धेरै भ्रष्टाचारप्रधान भइसक्दा पनि नेपाललाई अझै कृषिप्रधान मुलुक भन्न छाडिएको छैन । छैन त आश्चर्य ?

तेस्रो आश्चर्य : नेपाली राजनीतिमा मिश्रण र सम्मिश्रणको प्रक्रिया चौबीसै घण्टा चलिरहन्छ । यहाँ राजनीतिको कुण्डमा बिचौलिया, दलाल, लठैत, गुण्डाहरू पनि आ–आफ्ना कपडा उतारेर नांगै पौडिन्छन् र जनसेवक भनिएकाहरू पनि उनीहरूसँग सरोबरी अंकमाल गर्दै पौडिरहेका भेटिन्छन् । अर्थात् यो कुण्डमा मिश्रण र सम्मिश्रणको प्रक्रियामा डाँका, लुटेराहरू राजनीतिज्ञमा परिणत हुन्छन् र राजनीतिज्ञ डाँकुको भूमिकामा आउँछन् । योभन्दा ठूलो आश्चर्य दुनियामा अरू केही हुन सक्छ ?

चौथो आश्चर्य : हाईस्कुल फेल हाईलम्फुहरू सांसद, मन्त्री बन्छन् । जिन्दगीमा कहिल्यै फ्याक्ट्री नदेखेका पनि एकैचोटि सार्वजनिक संस्थाको जीएम वा मन्त्री नै बन्छन् । राजनीति बाहेक अर्को कुनै आर्थिक उपार्जनको उद्यममा नलागेको मान्छे राजनीतिकै आडमा चार दशकयता शहरको सबैभन्दा सम्पन्न व्यापारीको जस्तो जीवनशैली बाँचिरहेको छ । विना व्यवसाय अकस्मात् धनी बन्न सक्ने यस्तो अद्भुत आश्चर्य अन्त कतै देख्नुभएको छ ?

अनि औषधिदेखि सडकसम्म, बिजुलीदेखि अदालतसम्म, संसद्देखि स्थानीय निकायसम्म सबै विदेशी दान, अनुदान र ऋणमा निर्भर हुन पुगेको छ । जति दान र अनुदान बढे पनि देश भने झन् झन् कंगाल बनिरहेको छ । यो प्रविधिको युगमा पनि विदेशीसँग दानरूपी भिख माग्न छाड्ने संकेत देखिएको छैन । तर पनि शासकहरू भने समृद्धिको राग अलाप्न छाड्दैनन् । हेर्नुस त कस्तो आश्चर्य ?

पाँचौं आश्चर्य : विश्वका सबै देशमा जमीनमा रूख हुन्छन् । तर नेपालमा भने कागजमै रूख लगाइन्छ र कागजमै यो प्रमाणित पनि हुन्छ कि सुक्खा, बाढी, हावाहुरी आदिबाट ती रूखहरू नष्ट भए भनेर । कागजमै पोखरी खनेर कागजमै पोखरी पुरेको बिल भर्पाई बुझाएर बजेट सकिन्छ ।

यसरी कागजमै योजना बन्छन् । कागजमै योजना सम्पन्न हुन्छन् । कागजै रोजगारी सृजना हुन्छन् । कतिसम्म भने देशमा रोजगारी बढाउने भन्दै झार उखेल्ने काम दिने र त्यो पनि केही नगरी काम सम्पन्न भएको भनेर कागजमै देखाउने र त्यसबापतको सबै बजेट हजम पार्ने । अनि यसैलाई नयाँ युगको आरम्भ भनेर प्रचार गरिएको छ  । छैन त आश्चर्य ?

छैटौं आश्चर्य : सरकारी अफिसमा कुनै पनि काम गराउन अत्यन्त कठिन छ । ‘नगद नारायण’को प्रतापले यहाँ फाइलहरूमा पखेटा पलाउन समय लाग्दैन र रातारात नीति नियम बदलिन्छन् । बन्द भएको कित्ताकाट अचानक केही दिन खुल्छ र फेरि बन्द हुन्छ । संसद्मा विधेयक पेश हुन्छन्, अनि एकाएक गायब हुन्छन् ।

सातौं आश्चर्य भने नेपाली जनता नै हुन् । किनकि देशमा वर्षौंपछि चुनाव हुन्छ । नेताहरू जनताका घरदैलो जान्छन् । आश्वासनका सपना बाँड्छन् । भोजभतेर खुवाउँछन् ।

चुनावमा धेरै भोट पाएर जित्छन् । र, अर्को चुनाव नआउन्जेलसम्म शहरमै हराउँछन् । ५ वर्षसम्म ती नेताको सत्तोसराप गर्छन् जनता, यो गरेन, त्यो गरेन भनेर । अर्को चुनाव आउँछ । फेरि तिनै नेता हात जोड्दै भोट माग्न पुग्छन् । पहिलेकै झैं चिल्ला भाषण गर्छन् । नेताका कुरा जनताले फेरि पत्याउँछन् । र फेरि पनि तिनै नेताले चुनाव जित्छन् । यो चक्र दोहोरिरहन्छ ।

अर्को उदाहरण, नेपालीहरू विश्वमै यस्ता नागरिक हुन्, जसको राष्ट्रियता विदेशी भूमिमा पुगेपछि मात्र देख्न पाइन्छ । नेपालमा छँदा उनीहरूलाई यहाँको प्रायः सबै कुरा मन पर्दैन । तर विदेश पुगेपछि अनायास उनीहरूको राष्ट्रियताको भेल फुट्न थाल्छ ।

यसरी विश्वलाई नै चकित पार्ने यस्ता सयौं आश्चर्यहरू छन् देशमा । विश्वले आश्चर्यको संख्या सात मात्र राखेको छ । त्यसकारण नेपालको पनि सबै आश्चर्यका फेहरिस्त यहाँ पस्केर पाठक तथा स्रोताहरूलाई थप आश्चर्यमा किन पार्नु र ?

प्रतिक्रिया [2]
User Image

Raja ram shrestha

[Oct 9, 2020 09:16am]

केपी ओलिको उखान टुक्का र गफाडी गफले देश चलाएको कम्ता अचम्म छैन र ? शरिरले नसकेर सत्ता छोड्छ विदेशमा, तर नेपालमा शरिर जाला भनेर सत्ता च्यापेर बस्छ्न । सुबिधा भोग्छन । नेता नै अचम्मका छन्, यहाँ । के यो अचम्म होईन र ? अचम्मको पोको भएको देश हो नेपाल ।


User Image

Niranjan kumar Yadav

[Oct 9, 2020 02:37am]

Sahe bhanayho


प्रतिक्रिया दिनुहोस्