ई –पेपर | हाम्रो बारेमा | विज्ञापन | ग्राहक बन्नुहोस | Podcast | Newbiz
arthik abhiyan
ad banner Mango Tech Digital Marketing Solution

अपि पावर कम्पनीको हकप्रद कात्तिक १४ गतेदेखि विक्रीमा

२०७७ असोज, २३  
लगानी
Image Not Found
author avatar अभियान संवाददाता

असोज २३, काठमाडौं  । अपि पावर कम्पनीले  आगामी कात्तिक १४ गतेदेखि हकप्रद शेयर निष्कासन गर्ने भएको छ ।

कम्पनीले रू.१०० अंकित मूल्यको ५६ लाख ७० हजार कित्ता हकप्रद निष्कासन गर्न लागेको हो । कम्पनीले एक शेयर बराबर नयाँ शून्य दशमलव ४७ कित्ता शेयर अनुपातमा हकप्रद निष्कासन गर्न लागेको शुक्रवार प्रकाशित सूचनामा उल्लेख छ ।

यो हकप्रदका लागि अपि पावरले यसअघि नै बुक क्लोज गरिसकेको छ ।उक्त हकप्रदमा मंसिर ४ गतेसम्म आवेदन दिन सकिने छ । विसं २०७६ साल फागुन ३० गतेसम्म कायम शयरधनीले उक्त हकप्रदमा आवेदन दिन पाउने छन् । हकप्रदको विक्री प्रबन्धकमा सिद्धार्थ क्यापिटल रहेको छ ।

शेयरधनीले उक्त हकप्रद शेयरका लागि सिद्धार्थ क्यापिटल, अपि पावर कम्पनीको कार्यालय थापाथली, काठमाडौंबाट आवेदन दिन सक्नेछन् ।  साथै सिद्धार्थ बैंकको शाखा कार्यालयहरु विराटनगर, वीरगञ्ज, पोखरा, बुटवल, नेपालगञ्ज, धनगढी र सुर्खेतबाट आवेदन दिन सकिनेछ । त्यसैगरी ग्लोबल आइएमई बैंकको दाचुर्लाको गोकुलेश्वर, नौगडा, खलंगा र बैतडीको शाखाबाट आवेदन दिन सकिनेछ ।

त्यस्तै धितोपत्र बोर्डबाट सी–आस्वा अनुमति प्राप्त बैंक तथा वित्तीय संस्था र मेरो सेयर सफ्टवेयर मार्फत आवेदन दिन सकिनेछ । कम्पनीको हालको अधिकृतपूँजी रू. ५०० करोड, जारीपूँजी रू.४०० करोड र चुक्तापूँजी रू.११९ दशमलव शून्य ७ करोड रहेको छ ।

आव २०७६/ ०७७ को व्यवस्थापनबाट प्रमाणित अपरिष्कृत वित्तीय विवरण अनुरुप कम्पनीको जम्मा नेटवर्थ १३६ करोड रहेको, जगेडा कोष तथा संचित नाफामा रू. १७ करोड रहेको र प्रतिशेयर आम्दानी रू. ८ दशमलव शून्य ४ रहेको छ । 

कम्पनीले आफ्नो लगानी तथा बैक ऋणबाट सुदूरपश्चिम प्रदेशको दार्चुला जिल्लामा वग्ने नौगड गाढ नदीको पानी उपयोग गरी प्रथम आयोजनाको रुपमा ८ दशमलव ५ मेगावाट क्षमताको नौगड गाढ जलबिद्युत् आयोजना निर्माण सम्पन्न गरी विसं २०७२ भाद्र २ गतदेखि राष्ट्रिय ग्रिडमा विद्युत् प्रवाह गरी व्यापारिक उत्पादन गरिरहेको छ । सुदूररपश्चिम प्रदेशमा निजी लगानीबाट १७ महीना भित्र निर्माण गरी संचालन भएको यो नै पहिलो जलविद्युत् आयोजना  भएको कम्पनले बताएको छ ।

कम्पनीले ४० मेगावाट क्षमताको तेश्रो जलविद्युत् आयोजना अन्तर्गत माथिल्लो चमेलिया जलविद्युत आयोजना निर्माणका लागि शेयरधनीहरुबाट शेयर पूँजी जुटाउन हकप्रद शेयर जारी गरेको हो ।

उक्त आयोजना निर्माणका लागि जम्मा रु. ७४० करोड लगानी लाग्ने अनुमान कम्पनीले गरेको छ । कम्पनीले कुल लागत मध्ये ३० प्रतिशतले हुने रकम रु. २२२ करोड आफ्ना शेयरधनीहरुलाई हकप्रद शेयर जारी गरी दुई चरणमा रकम संकलन गरी लगानी गर्ने योजना बनाएको छ ।  

बाँकी ७० प्रतिशतले हुने रकम रू. ५१८ करोड हिमालयन बैंक लिमिटेडको अगुवाईमा क्रमशः कर्मचारी संचय कोष, राष्ट्रिय वाणिज्य बैंक लिमिटेड, नेपाल बैंक लिमिटेड, नेपाल बङ्गलादेश बैंक लिमिटेड र सेञ्चुरी कमर्सियल बैंक लिमिटेड सहभागी गरी आयोजनाको सह–वित्तीयकरण बनाई बैंक ऋण प्रवाह गर्नेगरी वित्तीय व्यवस्थापन सम्झौता गत असोज ११ गते सम्पन्न गरेको छ । 

प्रतिक्रिया [0]
प्रतिक्रिया दिनुहोस्