ई –पेपर | हाम्रो बारेमा | विज्ञापन | ग्राहक बन्नुहोस | Podcast | Newbiz
arthik abhiyan
ad banner Mango Tech Digital Marketing Solution

फेरि शुरु भयो कालीगण्डकी करिडोर निर्माणको काम

२०७७ असोज, २५  
गण्डकी प्रदेश
Image Not Found
फाइल फोटो

असोज २५, नवलपुर । कोभिड–१९ महामारीको त्राससँगै गत चैतदेखि बन्द भएको कालीगण्डकी करिडोर निर्माणको काम पुनः शुरु भएको छ ।

नेपालको उत्तर–दक्षिण जोड्ने राष्ट्रिय गौरवको आयोजनाका रुपमा रहेको करिडोरअन्तर्गत नवलपरासी (बर्दघाट–सुस्तापूर्व) को गैंडाकोटदेखि पाल्पासम्मको सडकखण्ड निर्माणको काम शुरु गरिएको निर्माण पक्षले बताएको छ ।     
     
‘कोरोनाको संक्रमणको उच्च जोखिमका कारण चैतदेखि करीब सात महीनासम्म आयोजना नै ठप्प हुन पुग्यो’, निर्माण कम्पनी आशिष निर्माण सेवाका साइड इन्चार्ज कपिल गौलीले भने, ‘कोरोना महामारीका कारण सबै कामदार घर जाँदा काम ठप्प भएको थियो, अहिले केही कामदार ल्याएर निर्माणको काम पुनः थालेका छौं ।’
 कोरोना जोखिमका कारण काम गर्न असहज परिस्थिति सृजना भएको भए पनि अब दशैंलगत्तै करिडोर निर्माणको कामले तीव्रता पाउने गौलीले बताए ।
     
उत्तर–दक्षिण लोकमार्ग (कालीगण्डकी करिडोर)अन्तर्गत अर्गली–रामपुर (पाल्प)–गैंडाकोट १३२ किमी, रिडी–गुल्मी–बाग्लुङ ८८ किमी, बाग्लुङ–बेनी–जोमसोम ८७ किमी, जोमसोम–कोरला १०५ किमी पर्छ । रू. ५ अर्ब ४७ करोडको लागतमा निर्माण शुरु भएको कालीगण्डकी करिडोरको गैंडाकोटदेखि पाल्पाको राम्दीसम्म १३२ किलोमिटरको काम अगाडि बढेको गौलीले बताए ।

निर्माणको ठेक्का पाएको भारतीय कम्पनी इकेके इन्फ्रास्टक्चर लिमिटेडले नेपालको गौली ग्रुप र आशिष निर्माण सेवालाई सडक निर्माणको लागि पेटी ठेक्का दिएको थियो ।     
     
पूर्वपश्चिम राजमार्गमा पर्ने नवलपरासी (बर्दघाट–सुस्तापूर्व) को गैंडाकोटस्थित कालीगण्डकी चोकदेखि पाल्पा पिपलडाँडा राम्दीसम्मको १३२ किलोमिटर सडकको चौडाइ ११ मिटरको हुनेछ ।

निर्माण पक्षका साइट इन्चार्ज गौलीका अनुसार सो सडकमा सात मिटर कालोपत्र, एक/ एक मिटरको किनार तथा एक/ एक मिटरको नाला रहनेछ । ट्रयाक निर्माण सकिएको करिडोरको कालोपत्रको काम गत वैशाखबाट शुरु गर्ने तयारी गरिएको भए पनि कोभिड त्रासका कारण काम रोकिँदा एक वर्षपछि धकेलिएको आयोजनाले बताएको छ ।     
     
‘आगामी २०७८ सालको वैशाखबाट हामीले उक्त सडकखण्डमा कालोपत्रको काम शुरु गर्ने गरी अन्य कामलाई तीव्रता दिंदैछौं’ गौलीले भने, ‘अहिले पाल्पाबाट काम गर्दै गैंडाकोटतर्फ आएका छौं, सो सडकको ८५ किलोमिटर सडक फराकिलो पार्ने काम सकिएको छ ।’

 कालीगण्डकी करिडोरअन्तर्गत पाल्पा–गैंडाकोट सडकखण्डलाई चार ओटा खण्ड बनाएर निर्माणको काम भइरहेको छ । गैंडाकोटबाहेकको अन्य खण्डमा पहाड काट्ने तथा भर्ने काम भइरहेको छ ।
     
कालीगण्डकी करिडोरको पाल्पा–गैंडाकोट खण्डलाई गैंडाकोटको कालीगण्डकी चोकबाट बुलिङटारको थामबेंसी, थामबेंसीबाट भारतीपुर, भारतीपुरबाट भलायटार र भलायटारबाट पाल्पा रामपुरको पिपलडाँडा गरी चार ओटा खण्डमा विभाजन गरेर काम अगाडि बढाइएको निर्माण पक्षले बताएको छ । 

विसं २०७५ मंसिर १७ गतेबाट शुरु गरिएको गैंडाकोट पाल्पा खण्डको निर्माणकार्य २०७८ मंसिर १६ भित्र सक्नुपर्ने गरी ठेक्का सम्झौता गरिएको थियो । यद्यपि कोभिड महामारीका कारण काम ठप्प भएपछि आयोजनाको काम साढे एक वर्ष पछाडि धकेलिने आयोजनाले बताएको छ ।     
     
यस करिडोरको गैंडाकोट–पाल्पा सडकखण्डमा ३२ ओटा पुल निर्माणकार्य अन्तिम चरणमा पुगेका कालीगण्डकी करिडोर निर्माण आयोजनाका सबइञ्जीनियर पदम अधिकारीले बताए ।

 काम शुरु भएको करीब दुई वर्ष बित्नै लाग्दा सो सडकको प्रगति ३० प्रतिशत मात्रै देखिएको अधिकारीले बताए । सडक निर्माण समयमा नै सक्नका लागि आयोजनाको तर्फबाट निर्माण पक्षलाई निरन्तर सचेत गराइएको अधिकारीको भनाइ छ । रासस
 

प्रतिक्रिया [0]
प्रतिक्रिया दिनुहोस्