ई –पेपर | हाम्रो बारेमा | विज्ञापन | ग्राहक बन्नुहोस | Podcast | Newbiz
arthik abhiyan
ad banner Mango Tech Digital Marketing Solution

फेरि  शुरु भयो नेपालगञ्ज विमानस्थल विस्तारको काम 

२०७७ असोज, २६  
प्रदेश ०५
Image Not Found

असोज २६, नेपालगञ्ज । कोरोना महामारीका कारण छ महीनादेखि रोकिएको नेपालगञ्ज विमानस्थल विस्तारको काम गुरुयोजनानुसार पुनः शुरु गरिएको छ । 

हाल विमानस्थलको रनवे र टर्मिनल भवन निर्माणको काम भइरहेको छ । यसैगरी रनवे र टर्मिनल भवन निर्माणका लागि आवश्यक जग्गा खरीद प्रक्रियासमेत अगाडि बढाइएकोे नागरिक उड्डयन कार्यालयले बताएको छ ।     
     
कार्यालय प्रमुख प्रेमनाथ ठाकुरका अनुसार कोभिड–१९ का कारण छ महीनादेखि विस्तारको काम रोकिएको थियो । उनका अनुसार अन्तरराष्ट्रिय विमानस्थल बनाउन २० वर्षे गुरुयोजना तयार पारेर सोही बमोजिम चार चरणमा काम भइरहेको छ ।

विमानस्थल विस्तारका लागि पहिलो र दोस्रो चरणमा गरी रू.३ अर्ब ५० करोड बढी बजेट खर्च हुने अनुमान गरिएको कार्यालय प्रमुख ठाकुरले बताए ।     
     
यसअघि नै नेपालगञ्ज विमानस्थलबाट दिल्ली उडानको प्रस्ताव गरिएको छ । सोही प्रस्तावबमोजिम विमानस्थलमा सबै प्रकारका अन्तरराष्ट्रिय उडान गर्न मिल्ने गरी गुरुयोजनामा नक्शांकन र डिजाइन गरिएको छ ।

शुरुवाती चरणमा एटीआर विमान उडान गर्न मिल्ने गरी नेपालगञ्ज विमानस्थल विस्तार गरिने छ भने दुई दशकभित्र एअर बस जस्ता ठूला विमान उडान भर्न मिल्ने गरी गुरुयोजनामा डिजाइन गरिएको छ ।     
     
नागरिक उड्डयन प्राधिकरणका अनुसार नेपालगञ्ज विमानस्थल विस्तार गुरुयोजनामा निर्माणको अनुमानित लागत रू. १२ अर्बभन्दा बढी रहेको छ । योजनानुसार विमानस्थलको रनवे थ्री–सी क्याटोगरी अर्थात् १ हजार ५२४ मिटरबाट वृद्धि गरी फोर–सी क्याटेगरीमा २ हजार ४४५ मिटर लामो बनाइने छ । त्यसो गर्दा एयर बस ३२० एनइओ मोडेलका ठूलो जेट विमान सहजै उडान गर्न सक्नेछन् ।     
     
सामान्यतयाः दैनिक सरदर ४० उडान गर्दै आएको नेपालगञ्ज विमानस्थलबाट झण्डै १ हजार १०० यात्रु आउजाउ गर्दछन् । राजधानी काठमाडौंस्थित् त्रिभुवन अन्तरराष्ट्रिय विमानस्थलपछिको सबैभन्दा व्यस्त उक्त विमानस्थलका लागि नयाँ गुरुयोजनानुसार अगाडि बढ्दा १०० बिघा जग्गा थप आवश्यक पर्नेछ ।

हाल १६६ बिघा क्षेत्रफल रहेको नेपालगञ्ज विमानस्थलका लागि थप १०० बिघा जग्गा अधिग्रहण गरेपछि मात्र प्रस्तावित अन्तरराष्ट्रिय विमानस्थलका लागि जग्गा पर्याप्त हुने बताइएको छ ।   रासस
 

प्रतिक्रिया [0]
प्रतिक्रिया दिनुहोस्