ई –पेपर | विज्ञापन | ग्राहक बन्नुहोस | Podcast
arthik abhiyan
Real Dabur NepalApache RTR 200 ABS

खाद्य कम्पनीले मकवानपुर धान प्रतिक्वीन्टल २८ सय २० मा खरीद गर्ने

२०७७ कार्तिक, १९  
समाचार
Image Not Found
author avatar प्रशान्त खड्का

काठमाडौं । खाद्य व्यवस्था तथा व्यापार कम्पनीले मकवानपुर धान प्रतिक्वीन्टल २८ सय २० रुपैयाँमा खरीद गर्ने भएको छ । यसअघि कम्पनीले यो धान पनि मोटा धानकै दरमा प्रतिक्वीन्टल २७ सय ३५ मा खरीद गर्दै आएको थियो ।

बर्दियाको राजापुर र कैलालीको धनगढी डिपोबाट खाद्यले गत बिहीवारदेखि मोटा र मध्यम धान खरीद शुरू गरेको हो । सरकारले यसअघि पहिलोपटक धान रोपाइँअघि नै गत असारमा मध्यम धानको प्रतिक्वीन्टल २८ सय ८५ र मोटा धानको २७ सय ३५ रुपैयाँ समर्थन मूल्य तोकेको थियो ।

खाद्य कम्पनीको राजापुर डिपोका प्रमुख धर्मराज पन्तका अनुसार मकवानपुर धान पनि मोटा धानकै मूल्यमा खरीद गर्न थालेपछि किसानले यसलाई मध्यम धानको मूल्यमा खरीद गरिनुपर्ने माग राखेका थिए । किसानको उक्त माग सम्बोधन गर्दै खाद्य व्यवस्था तथा व्यापार कम्पनी राजापुर शाखा र सीडीओ कार्यालयको समन्वयमा मकवानपुर धानको मूल्य प्रतिक्वीन्टल २८ सय २० रुपैयाँ तोक्न खाद्य व्यवस्था कम्पनीको केन्द्रीय कार्यालयमा प्रस्ताव गरिएको थियो । कम्पनीले हालसम्म राजापुरमा मोटा र मध्यम गरी १६ सय क्विन्टल धान खरीद गरेको पन्तले जानकारी दिए ।

गत आर्थिक वर्षमा कम्पनीले ३० हजार मेट्रिकटन धान खरीद गर्ने लक्ष्य राखे पनि सोअनुसार खरीद गर्न सकेको थिएन । चालू आर्थिक वर्षमा उसले ६० हजार मेट्रिकटन धान खरीद गर्ने लक्ष्य राखेको छ ।

यस वर्ष खाद्य कम्पनीले राजापुर, धनगढी, टीकापुर, जनकपुर लगायत तराईका ११ ओटा र जुम्लामा एउटा डिपोबाट धान खरीद गर्ने योजना बनाएको छ । अघिल्ला वर्षको तुलनामा कम्पनीले करीब १ महीना अघिदेखि धान खरीद शुरू गरिसकेकाले लक्ष्य अनुसार खरीद गर्न सकिने अपेक्षा गरिएको कम्पनीकी सूचना अधिकारी शर्मिला न्यौपाने सुवेदीले बताइन् । पश्चिमका जिल्लाबाट शुरू गरिएकोमा अबको केही दिनमै पूर्वी जिल्लामा समेत खरीद कार्य थालिने जानकारी उनले दिइन् ।

मसिनो धानको समर्थन मूल्य नतोकिँदा किसान असन्तुष्ट
सरकारले मोटा र मध्यम धानको समर्थन मूल्य तोकेर धान खरीद कार्य शुरू गरेको भए पनि मसिनो धानको समर्थन मूल्य नतोकिएकोमा किसानहरू असन्तुष्ट बनेका छन् । राजापुर धान सुपरजोनका संयोजक अग्नि अर्यालले सरकारले मसिनो धानको समर्थन मूल्य निर्धारण नगर्दा किसानहरू मारमा पर्ने गरेको बताए ।

मसिनो धानको समर्थन मूल्य सरकारले नतोकिदिँदा आफूहरूले मोटा धानभन्दा सस्तो मूल्यमा मसिनो धान विक्री गर्नुपरेको उनको भनाइ छ । उनका अनुसार अहिले बर्दियाका किसान मिलवालासँग मसिनो धान प्रतिक्वीन्टल २७ सय रुपैयाँमा बेच्न बाध्य छन् । राजापर धान सुपरजोनमा १६ हजार हेक्टर जमीनमा वर्षे धान र करीब १५ सय हेक्टरमा चैते धान खेती हुने गर्दछ । खाद्य कम्पनीले भने मसिनो धानको उत्पादन कम हुने भएकाले सरकारले त्यसको समर्थन मूल्य नतोकेको बताएको छ ।

प्रतिक्रिया [0]
प्रतिक्रिया दिनुहोस्