ई –पेपर | हाम्रो बारेमा | विज्ञापन | ग्राहक बन्नुहोस | Podcast | Newbiz
arthik abhiyan
ad banner Apache RTR 200 ABS

मुलुक बाहिरबाट थोरै मात्रामा आयात भएपछि सिरहामा बीउ आलुको अभाव

२०७७ कार्तिक, ३०  
प्रदेश ०२
Image Not Found

कात्तिक ३०, लहान । कोरोना संक्रमणका कारण मुलुक बाहिरबाट थोरै मात्रामा आलुको आयात भएपछि सिरहामा आलु बिउको अभाव भएको छ । 

आलुको बढी आयात हुने भारतको पश्चिम बंगालबाट यस वर्ष कोरोना संक्रमण र बन्दाबन्दीका कारण थोरै मात्रामा आलु आयात भएपछि बिउको अभाव भएको व्यापारीहरुले बताएका छन् । आलुको अभाव भएसँगै बजारमा बिउको मूल्यसमेत अकासिँदा किसानहरु मारमा परेका छन् ।

आलु खेती लगाउने समयमा आलु बिउमा व्यापारीहरुले अचानक मनपरी मूल्य वृद्धि गरेका कारण समस्यामा परेको किसानहरुले गुनासो गरेका छन् । गत वर्ष ५० किलो (एक बोरा) को एक हजार रुपैयाँ पर्ने आलु बिउको मूल्य यस वर्ष अहिले रू. तीन हजार रुपैयाँमा विक्री भइरहेको किसानहरुले बताएका छन् । 

आलु रोप्नका लागि खेत तयार पारेर बिउका लागि लहान बजार आइपुगेका तरेगनाका किसान शत्रुघन चौधरीले अचानक बिउको मूल्य बढेकाले समस्यामा परेको गुनासो गरे । 

‘अघिल्लो वर्ष रू. एक हजारमा एक बोरा बिउ खरीद गरेको थिएँ, यस वर्ष पनि त्यहीअनुसार मूल्य होला भन्ने सोचेर बिउ खरीद गर्न आएँ तर मूल्य बढेपछि बिउ खरीद नै नगरी रितो फर्किनु परेको छ ।’ 

अचानक बजारमा आलु बिउको मूल्य बढे पनि बजार अनुगमन नभएकाले व्यापारीहरुको मनपरी बढेको चौधरीको कथन छ । 

‘एकातिर आलुको मूल्य बढेको छ भने अर्कोतिर बोरामा पनि कम तौल रहने गरेको छ’, सिरहाको सीतापुरका सुभाष साहले भने, ‘बोरामा ५० किलो रहेको बताए पनि घरमा लगेर जोख्दा कुनै बोरामा ४६, ४७ र ४८ किलो मात्र आलु पाइएको छ ।’ बोरामा आलु कम पाइए पनि त्यस्ता व्यापारीमाथि कुनै कारवाही नभएको उनको गुनासो छ । 

सिरहाका बजारहरुमा अहिले बंगाली, सेतो र रातो आलुको बिउ विक्री भइरहेको छ । यस वर्ष बंगाली आलु ‘दुई हजार ९००, सेतो आलु रू. तीन हजार १०० र रातो आलु बीउ रू. तीन हजार १०० मा विक्री भइरहेको छ । 

बन्दाबन्दीका कारण भारतको पश्चिम बंगाललबाट थोरै मात्रामा आलु आएको र त्यहाँबाट महँगो खरीद गरेर ल्याउनुपरेकाले महँगोमै विक्री गर्नुपरेको व्यापारीहरुले बताएका छन् । रासस

प्रतिक्रिया [0]
प्रतिक्रिया दिनुहोस्