ई –पेपर | हाम्रो बारेमा | विज्ञापन | ग्राहक बन्नुहोस | Podcast | Newbiz
arthik abhiyan
ad banner Apache RTR 200 ABS

पोखराको पर्यटन व्यवसाय लयमा आउन अझै सकेन

 पोखराको मौसम त खुल्यो तर खुलेन पर्यटन व्यवसायीको मन         

२०७७ मंसिर, २  
गण्डकी प्रदेश
Image Not Found
फाइल फोटो

मंसिर २, पोखरा । मौसमले यतिबेला निकै साथ दिएको छ पोखरालाई । टलक्क टल्केको माछापुछ्रे हिमालको छायाँ फेवातालमा निकै आकर्षक देखिन्छ । पहिलो पटक आउने हुन् या पटक–पटक यो दृश्य देख्दा उनीहरुबाट निस्किने पहिलो शब्द हो “वाउ पोखरा !”     
     
पोखराको सौन्दर्यसँग जोडिएको विशेष आकर्षण भनेकै हिमाल र ताल हुन् । अनि भू–गर्भबाट कलकल बग्ने सेती, उत्तरतर्फ देखिने माछापुछ्रे, अन्नपूर्ण र धौलागिरि हिमशृङ्खला यहाँका थप आकर्षण । फेवा, रुपा, वेगनास, गुँदे, दिपाङ, खास्टे, निउरेनी, मैदी र कमलपोखरीजस्ता नौ ताल त छँदै छन् । नौ तालले सिगारिएको पोखरा उपत्यकाका शान्ति स्तुपा, पातले छाँगो (डेभिज फल्स), गुप्तेश्वर गुफा, चमेरे गुफा, महेन्द्र गुफा, विन्ध्यवासिनी आदि थप गहना हुन् ।     

पछिल्लो समय पोखराको थपिएको पहिचान विविध साहसिक खेलको शहर पनि हो । पोखरामा प्याराग्लाइडिङ, जिप फ्लायर, टावरसहितको बञ्जी जम्प, अल्ट्रालाइट, क्यानोनिङ, हट एयर बेलुन, स्काइ डाइभसँगै पर्यटकले रमाइलोका लागि गर्ने साइकलिङ्, बोटिङ्ग, घोडा सवारी, सेती नदीमा गरिने जलयात्रा तथा कायाकिङले पनि यस क्षेत्र साहासिक खेलको मुख्य गन्तव्य बन्दै गएको छ ।     
     
प्राकृतिक सुन्दरता अवर्णित शहर पोखरामा मौसम जसरी खुलेको छ त्यसरी पोखराका पर्यटन व्यवसायीको मन भने खुल्न सकेको छैन । पोखराको सुन्दरताले व्यवसायीको अनुहारमा कान्ति ल्याउन सकेको छैन । यसअघिका वर्षहरुमा पर्यटकको चाप धान्न धौधौ पर्ने मौसम हो यो । विगतको अनुभव सम्झँदै, बिहानीको झुल्के घामसँगै आँगनीमा निस्कने व्यवसायी फेवातालमा डुङ्गा छचल्किएको कल्पनासँगै शून्य मन लिएर साँझ फर्किन बाध्य छन् ।     
     
विश्वव्यापी रुपमा फैलिएको कोरोना भाइरसको महामारीका कारण गत चैतदेखि सुस्ताएको पर्यटन असारयता बन्दाबन्दी खुले पनि लयमा फर्कन सकेको छैन । दसैंतिहारको समयमा केही आन्तरिक पर्यटक देखिए पनि कोरोनाको उच्च जोखिम रहेकाले यहाँस्थित होटल रेष्टुरेण्टहरुले सहज रुपमा सेवा प्रवाह गर्न सकेका छैनन् ।     
     
पोखरा आएका आन्तरिक पर्यटक वरपरका पदयात्रा मार्ग एवं पर्यटकीयस्थलसमेत नखुल्दा थप समस्यामा परेका छन् । कोरोनाको महामारी फैलन सक्ने अवस्थालाई दृष्टिगत गरी विश्वप्रसिद्ध अन्नपूर्ण पदमार्गमा पर्ने मनाङले कोरोनाको पीसीआर नेगेटिभ अनिवार्य गराएको छ ।

कास्कीको मर्दी हिमाल पदयात्रामा जाँदा पीसीआर रिपोर्ट नेगेटिभ पेश गर्नुपर्ने नियमले पर्यटकलाई पोखरा आउनुअघि नै सोच्न बाध्य बनाइदिएको छ । पोखरा हुँदै जाने धार्मिक पर्यटकीयस्थल मुक्तिनाथ पनि दर्शनार्थीका लागि अहिले बन्देज छ ।     
     
पोखरा पर्यटन परिषदका उपाध्यक्ष गोपी भट्टराई मौसम खुले पनि यतिबेला व्यवसायीको मन खुल्न नसकेको बताउँछन् । उनी भन्छन्, “यो महामारीमा व्यवसायीले सरकराबाट केही आशा गरेका थिए, मौद्रिक नीतिको चौतर्फी स्वागत भयो, तर सरकारले आफैंले ल्याएको नीति कार्यान्वयन गर्न सकेन, व्यवसायीलाई थप पीडा दिने मात्रै काम भयो ।”
 भट्टराईले पोखराको पर्यटन चलायमान हुन पोखरा मात्र खुलेर नहुने र आसपासका घान्द्रुक र धम्पुसका लगायतका स्थान खुल्न नसक्दा पर्यटक नै दोधारमा भएको बताउँछन् ।

उनका अनुसार मर्दी हिमालमा पर्यटकको चहलपहल राम्रो थियो, तर अहिले एक्कासि पीसिआर नेगेटिभ अनिवार्य गराइयो, कहीँकतै समन्वय नगरी गरिने यस्ता निर्णयले पर्यटनमा दीर्घकालीन असर पार्छ । सरकारले व्यवसायीलाई साथ नदिँदा पोखरामा २० देखि ३० प्रतिशत व्यवसायी विस्थापित भइसकेको उनले बताए । पोखरा भित्रका पर्यटकीय गन्तव्य पनि सुरक्षित रुपमा खोल्न सम्बन्धित निकायले ध्यान दिनुपर्ने उनको जोड छ ।     
     
नेपाल पर्यटन बोर्डको सञ्चालक समितिका पूर्वसदस्य बासु त्रिपाठीले पर्यटन सम्बन्धी मूल कानून र स्पष्ट नीति अभावमा स्थानीय तहले आ–आफै नियम बनाउँदा पर्यटकले खुला रुपमा घुम्न डुल्नबाट बञ्चित हुनुपरेको बताए ।
     
उनका अनुसार पर्यटक आए पनि पर्यटन सम्बन्धी एउटै नीति नियमको आधारमा निर्धक्क घुम्न, डुल्न पाउनुपर्यो, प्रत्येक जिल्ला, गाउँपालिका पुग्दा फरक फरक नियमले पर्यटकलाई अन्यौल बनाएको छ, यसले राम्रो सन्देश जादैन ।

उनले प्याराग्लाइडिङ उडेर मात्र पोखराको पर्यटन नधानिने भन्दै सरोकारवाला सबैको साझा धारणा सहित एउटै पर्यटन नीतिको आवश्यकता औंल्याए । सङ्घीय कानून नीतिसँग नबाझिने गरी सङ्घको अनुमतिमा स्थानीय तहले केही नियम बनाउन सक्ने उनको भनाइ छ ।     
     
 होटल सङ्घका केन्द्रीय सदस्य भरतराज पराजुलीले पर्यटकको स्वास्थ्य सुरक्षाप्रति सजग बन्दै यहाँका केही होटल सञ्चालन भएपनि अन्य पर्यटकीय गतिविधि र गन्तव्य खुला नहुँदा समस्या भएको बताए ।

उनले पोखराका होटल खुले पनि आसपासका विन्ध्यवासनी, तालबाराही, डेभिज फल्स, चमेरे गुफा, विश्वशान्ति स्तूप, अन्तरराष्ट्रिय पर्वतीय सङ्ग्रहालयलगायतका स्थल एवं घान्द्रकु, धम्पुसलगायतका पर्यटकीय गन्तव्य खुल्न नसक्दा पर्यटकीय गतिविधि बढ्न नसकेको उनको भनाइ छ ।

 टे«किङ एजेन्सिज् एशोसियशन अफ नेपाल, टान पश्चिमाञ्चलका अध्यक्ष सुसिलराज पौडेलले कुनै ठाउँमा बन्द कुनै ठाउँमा खुल्ने गर्दा पर्यटनलाई अन्यौल बनाउने बताउँछन् । उनले सरकारले पदयात्रा र हिमाल आरोहरण खुला गरिसके पछि पर्यटकलाई त्यहाँ जाने वातावरण मिलाएर सहज वातावरण बनाउनुपर्नेमा ठाउँ ठाउँमा र स्थानीय तहमा आफू अनुकुलका निर्णय गर्दा पर्यटन क्षेत्र अस्तव्यस्त भएको बताए ।     

पौडेलले स्थानीय समुदायको सुरक्षालाई पनि ध्यान दिएर स्थानीयसँग समन्वय गरेर जनचेतनाका लागि स्वास्थ्य सतर्कताका तालीमहरु प्रदान गरी पर्यटन चलायमान बनाउन सकिने पनि बताए ।

पोखराको सुन्दर र आकर्षक सन्देशलाई विश्व बजारमा पुर्याएर आर्थिक समृद्धि हासिल गर्न सकिनेमा जोड दिंदै आएका गण्डकी प्रदेश उद्योग, वन, पर्यटन तथा वातावरण मन्त्री विकास लम्सालले कोभिड –१९ का कारण पर्यटकीय गतिविधि सञ्चालनमा समस्या भएको बताए ।     
 उनले पर्यटकीय गन्तव्यहरुमा पीसीआर अनिवार्यभन्दा पनि लक्षण देखिएकाहरुलाई समुदायमा नजान भनिएको जानकारी दिए।
     
पोखरा पर्यटन परिषद्का पूर्वअध्यक्ष टिकाराम सापकोटाका अनुसार पोखरामा जमिन बाहेक पर्यटन क्षेत्रमा १ खर्ब ९२ अर्ब रुपियाँ लगानी रहेको छ । यस क्षेत्रमा ७५ हजारले रोजगार पाएका छन् भने अहिले पोखराको पर्यटनले हाल दैनिक र १३ करोड ३६ लाख रुपियाँ घाटा व्यहोरिरहेको छ ।

पर्यटनबाट कूल ग्राहस्थ्य उत्पादनमा ७।९ प्रतिशत योगदान रहेको छ । नेपालमा आउने पर्यटकको औसत बसाई ११ दिन रहेको छ । त्यसमा पोखरा उनीहरु २ देखि ३ दिन सम्म बस्ने गरेको विगतको तथ्याङ्क छ । त्यसैगरी नेपाल आउने पर्यटकले औसतमा ४५ देखि ५० अमेरिकी डलर खर्च गर्ने गर्दछन् ।

गत वर्ष नेपालमा करीब ११ लाख ९८ हजार पर्यटक आएकोमा तीमध्ये ५ लाख जति पोखरा पुगेको पर्यटन परिषद पोखराले जानकारी दिएको छ । उक्त परिषदले आफ्नो यही मङ्सिर १२ को निर्वाचनपछि पोखरामा आन्तरिक पर्यटक प्रवर्द्धन के कसरी गर्ने भन्ने विषयमा आवश्यक छलफल गरेर कार्यक्रम ९प्याकेज० ल्याउने तयारी गरिरहेको पनि बताएको छ । रासस  
   
 

प्रतिक्रिया [0]
प्रतिक्रिया दिनुहोस्