ई –पेपर | हाम्रो बारेमा | विज्ञापन | ग्राहक बन्नुहोस | Podcast | Newbiz
arthik abhiyan
ad banner Apache RTR 200 ABS

धोबीखोला करिडोर अन्तर्गत १६ किमी सडक कालोपत्र सकियो

२०७७ मंसिर, ६  
समाचार
Image Not Found
फाइल फोटो

मंसिर ६, काठमाडौं । काठमाडौं उपत्यकाको मुख्य सडकको सवारी चाप कम गर्ने उपायका रुपमा हेरिएको धोबीखोला करिडोर निर्माण १६ किलोमिटर कालोपत्र सकिएको छ । खोलाको दुवैतर्फ १२/१२ किमी गरी जम्मा २४ किमी लम्बाइको सडक आगामी आवभित्र सम्पन्न गर्ने लक्ष्य लिइएको छ । 

शहरी विकासमन्त्री कृष्णगोपाल श्रेष्ठले शुक्रवार सो करिडोरको स्थलगत निरीक्षण गर्दै सडक चाँडो सम्पन्न गर्न निर्देशन दिएका छन् । उनले काठमाडौंको सुन्दरताका रुपमा रहेको करिडोरमा कुरुपता आएकाले त्यसाई हटाउनुपर्नेमा जोड दिए । 

ललितपुर र काठमाडौंको सीमामा पर्ने शंखमूलबाट शुरु भएर धोबीखोलको किनारै किनार बूढानीलकण्ठसम्म करिडोर रहेको छ । सो करिडोरअन्तर्गत बिजुलीबजारको पुलमुनि सडक खुला नभएको उनले बताए । उनले भने, ‘प्राविधिकले बिचार नपुर्‍याएको भए पनि त्यो ठाउँमा एक वर्षभित्रमा गाडी आवतजावत गर्न सक्ने गरी खुलाइनेछ ।’

मन्त्री श्रेष्ठले सडकमा रहेका खाल्डाखुल्डी हटाउन, सरसफाइमा ध्यान दिन र कालोपत्र गर्न बाँकी सडक सम्पन्न गर्न पनि निर्देशन दिए । निर्माणाधीन सडकमा दूरसञ्चार संस्थानले ठाउँठाउँमा खनिरहेको देख्न सकिन्छ । 

उनले सो स्थानमा संस्थान र प्राधिकरणबीच समन्वय आवश्यक रहेको औँल्याए । सडकमा रहेका मंगालका कारण सडक दुर्घटना हुने भन्दै उनले तत्काल त्यसलाई पुर्न पनि निर्देशन दिए । उनले पैदलयात्रु मार्ग व्यवस्थापनमा समेत ध्यान दिनुपर्ने बताए । उनले भने, ‘यी सबै कुरामा ध्यान दिन सके करिडोरले काठमाडौंको सुन्दरता बढाउनेछ ।’

करिडोर निर्माणमा हालसम्म मुआब्जासमेत गरी रू. तीन अर्ब ५० करोड खर्च भइसकेको छ । काठमाडौं महानगरपालिकाले विसं २०५६ मै करिडोरको निर्माण गर्ने भने पनि अघि बढाउन सकेको थिएन । सरकारले महानगरले नसकेपछि विसं २०६३ मा आयोजना सञ्चालनको जिम्मेवारी प्राधिकरण (तत्कालीन नगर विकास समिति) लाई दिइएको थियो । 

शुरुका दिनमा दुवैतर्फ घरैघर भएकाले आयोजना सम्भव नभएको धेरैलाई लागेको प्राधिकरणका विकास आयुक्त डा. भाइकाजी तिवारीले बताए । सडक निर्माणभन्दा मुआब्जामा बढी लगानी भए पनि सडकको दीर्घकालीन महत्व हेरेर निर्माण शुरु गरिएको थियो । उनले भने, ‘जम्मा लगानीमध्ये ७० प्रतिशत मुआब्जामा र बाँकी ३० प्रतिशत मात्रै निर्माणमा खर्च भएको छ ।’

करिडोरमा पर्ने घर, टहरालगायतका संरचना हटाउँदै सडक निर्माण गरिएको छ । सडक निर्माणस्थल खाली गराउने काम झण्डै ९९ प्रतिशत सकिएको प्रमुख तिवारीले जानकारी दिए । सडकमा अहिले पाँच ओटा घर मात्रै हटाउन बाँकी छ । 

उनीहरुले मुआब्जामा चित्त नबुझाएकाले हटाउन बाँकी भएको उनले जानकारी दिए । सडकमा पूरै घर हटेकालाई क्षतिपूर्ति बापतको रकम दिइएको छ । आफ्नो नाममा जग्गाधनी पुर्जा नभएका स्ववासीलाई पनि अन्यत्र घर बनाउन रकम दिइएको उनले बताए । उनले भने, ‘निर्माणस्थल हटाउने धेरै काम सकिएकाले थोरै मात्रै बाँकी छ ।’

करिडोर चालू आर्थिक वर्षभित्रै सम्पन्न गर्ने लक्ष्य लिइएको भए पनि पहिराका कारण चालू आवमा सम्पन्न गर्न नसकिने देखिएको प्राधिकरणले जानकारी दिएको छ । पहिले सडकमा ढल र सडक निर्माणको काम फरकफरक कम्पनीले गरेको भए पनि अहिले एउटै निर्माण कम्पनीमार्फत अघि बढाइएको प्रमुख तिवारीले बताए । उनले भने, ‘एउटै कम्पनीले गर्दा समन्वयको समस्या हुँदैन । 

काठमाडौं उपत्यकाका मुख्य सडकमा रहेका सवारी चाप कम गराउने उद्देश्यले सरकारले वाग्मतीलगायतका सहायक खोलामा करिडोर निर्माण शुरु गरेको छ । तीमध्ये कतिपय निर्माण सम्पन्न हुने क्रममा छन् भने कतिपयमा शुरु भएको लामो समयमा समेत सम्पन्न भइसकेको छैन । रासस

प्रतिक्रिया [0]
प्रतिक्रिया दिनुहोस्