ई –पेपर | हाम्रो बारेमा | विज्ञापन | ग्राहक बन्नुहोस | Podcast | Newbiz
arthik abhiyan
ad banner Apache RTR 200 ABS

स्थानीय तहमा पूँजीगत खर्च बढाउने वातावरण तयार पार्न अर्थमन्त्रीको आग्रह

२०७७ पौष, २७  
समाचार
Image Not Found
author avatar अभियान संवाददाता

काठमाडौं । अर्थमन्त्री विष्णुप्रसाद पौडेलले विशेष प्राथमिकता दिएर स्थानीय तहहरूमा पूँजीगत खर्च बढाउने वातावरण तयार पार्न नेपाल नगरपालिका संघ र गाउँपालिका राष्ट्रिय महासंघलाई आग्रह गरेका छन् । अर्थ मन्त्रालयमा आइतवार आयोजित बैठकमा अर्थमन्त्री पौडेलले नेपाल नगरपालिका संघका अध्यक्ष अशोककुमार ब्याञ्जु र गाउँपालिका राष्ट्रिय महासंघका अध्यक्ष होमनारायण श्रेष्ठलाई स्थानीय तहहरूमा पूँजीगत खर्च बढाउने गरी भूमिका निर्वाह अनुरोध गरेका हुन् ।

स्थानीय तहहरूमा पुगेको रकममध्ये १ खर्ब २६ अर्ब रुपैयाँ खर्च हुन सकेको छैन । अर्थमन्त्री पौडेलले खर्च हुन बाँकी रहेको रकम खर्चेर गाउँपालिका र नगरपालिकाहरूमा विकासको काम तीव्र बनाउनुपर्नेमा जोड दिएका छन् ।

अर्थमन्त्री पौडेलले कोभिड १९ बाट अतिप्रभावित जोखिममा रहेका परिवारलाई सहयोग गर्न पनि अनुरोध गरेका छन् । यसैगरी प्रधानमन्त्री रोगजार कार्यक्रमलाई प्रभावकारी र उत्पादनमूलक बनाउने वातावरण सृजना गर्न पनि आग्रह गरे ।

यसैबीच, अर्थमन्त्री पौडेल, भूमि व्यवस्था, सहकारी तथा गरीबी निवारण मन्त्री डा. शिवमाया तुम्बाहाम्फे, गाउँपालिका राष्ट्रिय महासंघका अध्यक्ष श्रेष्ठ र नेपाल नगरपालिका संघका अध्यक्ष ब्याञ्जुसहितको बैठकमा भूमि सम्बन्धी समस्या समाधान आयोगको कामलाई प्रभावकारी रूपमा अगाडि बढाउने विषयमा छलफल भएको छ ।

आयोगले भूमि समस्या समाधानका लागि ४७ जिल्लाका १९३ ओटा पालिकासँग सम्झौता गरेको छ । भूमि व्यवस्था, सहकारी तथा गरीवी निवारण मन्त्री तुम्बाहाम्फेले बाँकी रहेका पालिकामा सम्झौता गर्ने र काम शुरू गर्ने पनि जानकारी गराइन् । अर्थमन्त्री पौडेलले केन्द्र, प्रदेश र स्थानीय तहबीच समन्वय गरी भूमि सम्बधी समस्यालाई स्थायी रूपमा समाधान गरिने बताए ।

भूमि व्यवस्था, सहकारी तथा गरिवी निवारण मन्त्री तुम्बाहाम्फेले काम स्थानीय तहमै हुने भएकाले स्थानीय तहको विशेष सक्रियता जरुरी रहेको बताइन् । नेपाल नगरपालिका संघका अध्यक्ष ब्याञ्जुले समयतालिका बनाएर काम गर्दा बढी प्रभावकारी हुने धारणा व्यक्त गरे । यस्तै गाउँपालिका राष्ट्रिय महासंघका अध्यक्ष श्रेष्ठले स्थानीय तहमै फोकल पर्सन राखेर काम गर्न जरुरी रहेको बताए ।

प्रतिक्रिया [0]
प्रतिक्रिया दिनुहोस्