ई –पेपर | विज्ञापन | ग्राहक बन्नुहोस | Podcast | Newbiz
arthik abhiyan
Real Dabur NepalApache RTR 200 ABS

एयर ट्रान्सपोर्ट बबल स्किमले भारतीय पर्यटकको आगमन वृद्धि

२०७७ पौष, २८  
समाचार
Chelsea International Image Not Found
author avatar टीपी भुसाल

काठमाडौं । नेपाल र भारतबीच ९ महीनापछि नियमित हवाई उडान शुरू हुने गरी भएको एयर ट्रान्सपोर्ट बबल स्किमका कारण नेपालमा बिस्तारै भारतीय पर्यटकको आगमनमा बृद्धि भएको छ ।

भारतले प्रस्ताव गरेको एयर ट्रान्सपोर्ट बबल स्किममा गत पुस ५ गते नेपाल भारतबीच सहमति भएको थियो । त्यसअनुसार उडान शुरू भएपछि भारतीय पर्यटकको आगमन वृद्धि भएको हो ।

कोरोना महामारीका कारण नेपाल र भारतबीच २०७६ चैत ११ गतेबाट हवाई उडान बन्द थियो । भारतले गत कात्तिकमा नै विभिन्न मुलुकका नागरिकलाई फिर्ता लैजान सक्ने गरी नेपालसमक्ष ‘एयर ट्रान्सपोट बबल स्किम’ को प्रस्ताव गरे पनि नेपालले अस्वीकार गरेको थियो ।

सरकारले कोरोना संक्रमणका कारण बन्द गरेको अन्तरराष्ट्रिय उडान करीब ५ महीनापछि गत भदौ १६ गतेदेखि नियन्त्रित रूपमा खोलेको थियो भने असोज ५ गतेदेखि आन्तरिक हवाई उडान सुचारु गर्ने निर्णय गरेको थियो ।

अन्तरराष्ट्रिय उडानहरू क्रमशः थपिँदै गए पनि भारतमा भने उडान शुरू भएको थिएन । एयर बबल स्किमअन्तर्गत हाल दुवै देशले एक एक वायुसेवा कम्पनीमार्फत काठमाडौं–दिल्ली उडान गर्ने निर्णय भएसँगै नयाँ वर्ष मनाउन थुप्रै भारतीय पर्यटक हवाई मार्गबाट नेपाल आएको पर्यटन व्यवसायीहरूले बताएका छन् ।

हवाई मार्ग सामान्य रूपमा खुला भए पनि नेपाल भारत सीमा नाका भने बन्द रहँदा नेपाल आउन चाहने हजारौं पर्यटक नेपाल आउन पाएका छैनन् । त्यसैले स्वास्थ्य मापदण्ड पालना गर्दै सीमाक्षेत्र पनि खुला गर्नुपर्ने नेपाल उद्योग वाणिज्य महासंघ लुम्बिनी प्रदेशका अध्यक्ष कृष्णप्रसाद शर्माले बताए । उनले सीमा नाका बन्द हुँदा लुम्बिनी आउन चाहने भारतीय पर्यटक आउन नपाएको समेत बताए ।

सिद्धार्थ होटेल संघ भैरहवाका उपाध्यक्ष किशोर जोशीले सीमा नाका खोल्नासाथ भारतीय पर्यटकको आगमनमा थप वृद्धि हुने बताए । ‘सीमाक्षेत्रबाट थुप्रै सोधपुछ भइरहेको छ । तर, सीमा बन्द हुँदा स्थलमार्गबाट आउने पर्यटक आउन पाएका छैनन । सीमा नाका खोल्न सकेमा भारतीय पर्यटकलाई नेपाल ल्याउन सकिन्छ । यसले कोभिडबाट थलिएको पर्यटन चलायमान बनाउन पकै सहयोग पुग्नेछ,’ उनले भने ।

लामो समयको बन्दले घरमै बस्न बाध्य भारतीय पर्यटकलाई एयर ट्रान्सपोर्ट बबल स्किमले नजीकैको छिमेकमा आउन थप सहजता प्रदान गरेको र नयाँ वर्षमा पोखरामा आफूहरूले अपेक्षा गरेभन्दा बढी भारतीय पर्यटक आएको होेटेल तथा रेस्टुराँ व्यवसायी संघ (रेवान) पोखराका प्रथम उपाध्यक्ष नरेश भट्टराईले बताए । खासगरी काठमाडांै, पोखरा, चितवन तथा लुम्बिनीमा नयाँ वर्ष मनाउन भारतीय पर्यटकहरू आएका थिए ।

पछिल्लो सम्झौताअनुरूप नेपालबाट नेपाल वायुसेवा निगमले काठमाडौं–दिल्ली–काठमाडौं र एअर इन्डियाले दिल्ली–काठमाडौं–दिल्ली दैनिक एकएक उडान गरिरहेको नेपाल नागरिक उड्डयन प्राधिकरणले जानकारी दिएको छ । ‘एयर ट्रान्सपोर्ट बबल स्किमअनुसार यो उडानमा कूटनीतिक नियोगका व्यक्तिबाहेक नेपाली र भारतीय नागरिकले मात्र यात्रा गर्न पाउँछन् । यो स्किमअनुसार तेस्रो देशका नागरिकले भने यात्रा गर्न पाउँदैनन् । यद्यपि यस स्किमअन्तर्गत नेपाल आउने यात्रुले अन्तरराष्ट्रिय ट्राभल अनलाइन फारम भर्नुपर्छ । विमान बोर्डिङ हुने समयभन्दा बढीमा ७२ घण्टा अघिको पीसीआर रिपोर्ट नेगेटिभ भएका यात्रुमात्र नेपाल आइरहेको त्रिभुवन विमानस्थल कार्यालयले जानकारी दिएको छ ।

प्रतिक्रिया [0]
प्रतिक्रिया दिनुहोस्