ई –पेपर | हाम्रो बारेमा | विज्ञापन | ग्राहक बन्नुहोस | Podcast | Newbiz
arthik abhiyan
ad banner Apache RTR 200 ABS

कोरोना खोप ५ दिनभित्र सबै प्रदेशमा पुर्‍याइने

२०७७ माघ, ९  
समाचार
NA
author avatar काशीराम बजगाईं

काठमाडौं । भारत सरकारले अनुदानमा दिएको १० लाख डोज कोरोनाविरुद्धको खोप ५ दिनभित्र सबै प्रदेशमा पुर्‍याउने तयारी गरेको छ । भारत सरकारले अनुदानमा उपलब्ध गराएको खोप बिहीवार बिहान एयर इन्डियाको विमानबाट नेपाल आइपुगेको छ । नेपालका लागि भारतीय राजदूत विनयमोहन क्वात्राले स्वास्थ्य मन्त्री ह्दयेश त्रिपाठीलाई खोप हस्तान्तरण गरेपछि त्रिभुवन विमानस्थलबाट खोप सोझै टेकु अस्पतालको केन्द्रीय खोप भण्डारणमा लगिएको छ ।

खोप आएपछि त्रिभुवन विमानस्थलमा आयोजना गरिएको पत्रकार सम्मेलनमा स्वास्थ्यमन्त्री त्रिपाठीले खोप भण्डारणदेखि लगाउनेसम्मको सबै तयारी पूरा भइसकेको बताए । उनका अनुसार स्वास्थ्य मन्त्रालयले खोप लगाउन तथ्यांक संकलन, खोप भण्डारण व्यवस्थापन र खोप लगाउने सबै तयारी पूरा भइसकेको छ ।

प्राप्त खोप केन्द्रले प्रदेशमा र प्रदेशबाट उक्त खोप सबै जिल्लामा पुर्‍याइने खोप व्यवस्थापनका लागि खोप नियन्त्रण महाशाखाका प्रमुख झलक शर्मा गौतमले बताए । खोप भण्डारणका लागि पर्याप्त पूर्वाधार भएको बताउँदै उनले भण्डारणमा कुनै समस्या नरहेको बताए । उनका अनुसार प्राप्त खोप रेफ्रिजेरेटर भ्यानमा हालेर काठमाडौंबाट प्रदेश र प्रदेशबाट सबै जिल्लामा पठाइनेछ । केन्द्रमा हाल तीनओटा मात्र रेफ्रिरेजेटरसहितका भ्यान सञ्चालनमा रहेकाले खोपको ढुवानी भने सहज नहुने देखिन्छ ।

भारतको सिरम इन्स्टिच्युटले अक्सफोर्ड एस्ट्राजेनेकासँग मिलेर उत्पादन गरेको कोरोनाविरुद्धको कोभिडसिल्ड खोप भारत सरकारले अनुदानमा उपलब्ध गराएको हो । भारतले सोमवार मात्र आफूले उत्पादन गरेको खोप बिहीवारदेखि छिमेकी मुलुकमा पठाउने निर्णय गरेकोमा सोहीअनुसार १० लाख डोज खोप अनुदानस्वरूप नेपाल पठाइएको हो । उक्त खोप माइनस २ देखि ८ डिग्री सेल्सियसमा भण्डारण गर्न सकिने हुँदा जिल्लाका सामुदायिक भण्डारण केन्द्रमा समेत भण्डारण गर्न सकिने खोप व्यवस्थापनका लागि खोप नियन्त्रण महाशाखाका प्रमुख गौतमले बताए । हाल देशभर ११ हजार सामुदायिक भण्डारण केन्द्र सञ्चालनमा रहेका छन् ।

स्वास्थ्यकर्मीलाई खोपको तालीम दिने तयारी पनि अघि बढाइएको गौतमले बताए । ‘स्वास्थ्यकर्मीलाई तालीम दिएर आगामी सातादेखि नै खोप लगाउने काम अघि बढाउने तयारी गरिएको छ,’ उनले भने ।

मन्त्रालयले पहिलो चरणमा ९ लाखलाई कोरोनाविरुद्धको खोप लगाउने तयारी गरे पनि तत्काल १० लाख डोज मात्र खोप प्राप्त भएकाले ४ लाख जनालाई मात्र खोप लगाउने बताएको छ ।  प्राप्त खोप कोरोना नियन्त्रणका लागि अग्रपंक्तिमा खटिएका स्वास्थ्यकर्मी, एम्बुलेन्स चालक, शव व्यवस्थापक र सुरक्षाकर्मीलाई लगाउने तयारी गरिएको छ । मन्त्रालयले खोप लगाउन शुरू गर्ने दिन भने यकिन भइसकेको छैन ।

प्रतिक्रिया [0]
प्रतिक्रिया दिनुहोस्