ई –पेपर | विज्ञापन | ग्राहक बन्नुहोस | Podcast
arthik abhiyan
Real Dabur NepalApache RTR 200 ABS

सही बिलबीजक नपाउँदा खानेतेल विक्रीमा समस्या : खुद्रा व्यापारी

२०७७ माघ, १८  
समाचार
Image Not Found
author avatar प्रशान्त खड्का

काठमाडौं । खुद्रा व्यापारीले उद्योगी तथा थोक विक्रेताहरूबाट सही बिलबीजक नपाउँदा खानेतेल विक्री गर्न समस्या उत्पन्न भएको बताएका छन् । उद्योगी र ठूला व्यापारीले खुद्रा व्यापारीलाई तेल विक्री गर्दा एमआरपी मूल्यभन्दा बढी मूल्यमा विक्री गर्ने र बिल दिने बेलामा कम मूल्यको बिल दिने भएकाले खुद्रा व्यापारीहरू समस्यामा परेका हुन् ।

बजारमा देखिएका यस्ता समस्याले गर्दा अधिकांश खुद्रा व्यापारीहरू तेल बेच्नै नसक्ने अवस्थामा पुगेका छन् । आफूले किनेको भन्दा कम मूल्यमा तेल बेच्नुपर्ने अवस्था आएपछि १ महीनाभन्दा बढी समयदेखि आफूले पसलमा तेल राख्न र विक्री गर्न छाडेको खुद्रा व्यापार संघका निवर्तमान अध्यक्ष पवित्रमान वज्राचार्यले आर्थिक अभियान दैनिकलाई बताए ।

नियामक निकायले खुद्रा व्यापारीहरूलाई मात्र निगरानीमा राख्ने भएकाले ठूला व्यापारीहरूले त्यसको फाइदा उठाउँदै बजारमा मनोमानी गर्ने गरेको सरोकारवालाहरूको बुझाइ छ । खुद्रा व्यापारीले थोक विक्रेताहरूसँग तेल किन्दा किनेको मूल्य र एमआरपी मूल्यमा एकरूपता नभएको वज्राचार्यको गुनासो छ । ‘खुद्रा व्यापारीले प्रतिलिटर २ सय ५० रुपैयाँमा किनेको सनफ्लावर तेलको कार्टुन खोलेर हेर्दा त्यसको एमआरपी मूल्य २ सय ४५ रुपैयाँ मात्र हुने गरेको छ,’ उनले भने ।

खुद्रा व्यापारीले प्रतिलिटर २ सय ५० रुपैयाँमा किनेको सनफ्लावर तेलको बिलमा थोक व्यापारीले २ सय २५ देखि २ सय ३५ रुपैयाँ मात्र उल्लेख गर्ने गरेको बताइएको छ । यस्तो हुँदा खुद्रा व्यापारीले एमआरपी तोकिएको मूल्यमा पनि तेल विक्री गर्न समस्या उत्पन्न भएको हो ।

चाडपर्व शुरू भएसँगै वृद्धि भएको खाने तेलको मूल्य त्यसयता निरन्तर रूपमा उकालो लागिरहेको छ । विगत १ महीनाको अन्तरालमा भटमासको तेलको मूल्य प्रतिलिटर ३० रुपैयाँ सम्मले वृद्धि भई २ सय ३० रुपैयाँ पुगेको पाइएको छ ।

त्यसैगरी धारा तोरीको तेलमा पनि ३० रुपैयाँले मूल्य वृद्धि हुँदै २ सय २० बाट २ सय ५० रुपैयाँ पुगेको छ । अमृत तेलको मूल्यमा पनि ४० रुपैयाँले वृद्धि भई प्रतिलिटर २ सय २० रुपैयाँ पुगेको छ । एकातिर बजारमा खुद्रा व्यापारीले सही बिलबीजक नपाउने समस्या छ भने अर्कातिर एउटै ब्रान्डको उही तेलको मूल्यमा पनि एकरूपता छैन । धारा, सनप्mलावर, भटमासलगायतका तेलको बजारमा तीनथरी मूल्य भएको बताइएको छ । धारा तोरीको तेलको प्याकेटमा २ सय ४०, २ सय ४५ र २ सय ५० रुपैयाँको एमआरपी रहेको छ । सनप्mलावर तेलमा पनि समस्या उस्तै छ । सनफ्लावर तेलको मूल्य २ सय ३५ देखि शुरू भएर २ सय ५० रुपैयाँ सम्मको एमआरपी रहेको छ । त्यसैगरी भटमासको तेलको एमआरपी मूल्य २ सय २५, २ सय ३५ र २ सय ४० रहेको छ ।

मूल्यमा एकरूपता नहुँदा तेल बेच्न पनि समस्या भएको खुद्रा व्यापार संघले बताएको छ । मूल्यमा एकरूपता कायम गर्न र सही बिलबिीजक उपलब्ध गराउन सरकारी नियामक निकायले पहल गरिदिन खुद्रा व्यापार संघले आग्रहसमेत गरको छ । बजारमा मूल्य एकरूपता नभएको कुरा सत्य भए पनि सही बिलबीजक उपलब्ध नगराएको दाबी भने गलत भएको थोक विक्रेताहरूको भनाइ छ । खाद्य किराना व्यवसायी संघका अध्यक्ष देवेन्द्रभक्त श्रेष्ठले आफूहरूले खुद्रा व्यापारीलाई सही बिलबीजक उपलब्ध गराउँदै आएको बताएका छन् । मूल्यमा एकरूपता नहुनुमा चाहिँ ठूला व्यापारी र उद्योगीहरूको कमजोरी नभएको उनले दाबी गरे । व्यापारीहरूसँग पहिलेदेखि नै स्टक रहेको तेलको मूल्य र अहिले नयाँ उत्पादन भएको तेलको मूल्यमा एकरूपता नहुनु स्वाभाविक भएको उनको भनाइ छ ।

सरकारी संयन्त्रले बजार अनुगमनलाई प्रभावकारी बनाउन नसकेकाले बजार अस्तव्यस्त भएको कुरालाई वाणिज्य, आपूर्ति तथा उपभोक्ता संरक्षण विभागका महानिर्देशक नेत्र सुवेदीले गलत भएको दाबी गरेका छन् । अहिलेको राजनीतिक वातावरण सहज नभएकाले व्यापारीहरूले त्यसको फाइदा उठाएको र आपूmहरूले त्यसलाई प्रभावकारी तरीकाले अनुगमन गर्दै गलत गर्ने व्यापारीलाई कारबाहीको दायरामा ल्याउने उनले बताए ।

प्रतिक्रिया [0]
प्रतिक्रिया दिनुहोस्