बरुण हाइड्रोको हकप्रदको आवेदन बोर्डको पाइपलाइनबाट हट्यो, शेयरमूल्यमा नकारात्मक प्रभाव *

अभियान संवाददाता

फागुन ४, काठमाडौं । नेपाल धितोपत्र बोर्डले बरुण हाइड्रोपावर कम्पनीको हकप्रद शेयर निष्कासनका लागि दिएको आवेदन पाइपलाइनबाट हटाएको छ ।

 उक्त  कम्पनीले शतप्रतिशत हकप्रद शेयर निष्कासनका लागि विसं २०७५ साल जेठ २२ गते बोर्डमा निवेदन दिएको थियो । बोर्डले आवश्यक कागजात माग गर्दा समयमै उपलब्ध नगराएकाले आवेदन पाइपलाइनबाट हटाइएको जानकारी दिएको छ ।

कम्पनीको हकप्रद निष्कासन प्रक्रियाका लागि टिप्पणीसहित आवश्यक कागजात पेश गर्न निर्देशन दिएको ६ महीनासम्म पनि जवाफ नआएका कारण आवेदन पाइपलाइनबाट हटाएको बोर्डका सहायक प्रबक्ता रुपेश केसीले जानकारी दिएका छन् ।

हकप्रद निष्कासन प्रक्रिया अन्योलमा परेपछि मंगलवार कम्पनीको शेयरमूल्यमा नकारात्मक प्रभाव परेको छ । कारोबारको साढे २ घण्टाको अवधिसम्म कम्पनीको शेयरमूल्य ६ दशमलव ६७ प्रतिशत घटेको छ । 

*यसअघिको समाचारमा उक्त कम्पनीको हकप्रदको आवेदन रद्द भएको उल्लेख भएकोमा बोर्डले रद्द नभइ पाइपलाइनबाट मात्र हटाइएको बताएकाले सच्याइएको छ ।

प्रतिक्रिया [0]

प्रतिक्रिया दिनुहोस्