ई –पेपर | हाम्रो बारेमा | विज्ञापन | ग्राहक बन्नुहोस | Podcast | Newbiz
arthik abhiyan
ad banner Apache RTR 200 ABS

राष्ट्रिय प्रसारण लाइनमा जोडिदैं शिवश्री हाइड्रोपावरको बिजुली

२०७७ फागुन, ५  
वाग्मती प्रदेश
Image Not Found
author avatar सुन्दर शिरीष

फागुन ५, सिन्धुपाल्चोक । सिन्धुपाल्चोकको भोटेकोशी गाँउपालिका-४, फुल्पिङकट्टीमा निर्माण भइरहेको शिवश्री हाइड्रोपावरको उत्पादन केन्द्रिय प्रसारण लाइनमा जोडिने भएको छ ।

२२ दशमलव २ मेगावाट क्षमताको सो हाइड्रोपावरको सत प्रतिशत भौतिक प्रगति भइसकेको आयोजनाका अध्यक्ष बच्चु पौडेलले बताए । ‘आयोजनाको सम्पूर्ण काम सम्पन्न भइसकेको छ’, उनले भने ‘अब दुई तीनदिन भित्रै राष्ट्रिय प्रसारण लाइनमा जोडेर नियमित प्रसारणमा जाने तयारी गरिरहेका छौं ।’

आयोजनाको अनुसार अब तत्काल परीक्षण प्रसारण गरिने छ । आयोजनाको आन्तरिक प्राविधिकबाट सम्पूर्ण परीक्षण सफल भइसकेको कारण नेपाल विद्युत् प्राधिकरणको प्रतिनिधिसहित अन्तिम परीक्षणको तयारी भएको छ । सो परीक्षण सफल भएपछि आयोजनाको २२ दशमलव २ मेगावाट विजुली केन्द्रिय प्रसारण लाइनमा जोडिनेछ ।

२०७५ सालको साउन महीनामा निर्माण सम्पन्न हुने लक्ष्यका साथ निर्माण कार्य शुरु गरिएको आयोजनाको काम २ वर्षभन्दा बढी ढिला भईसकेको छ । ‘हामीले जुरे पहिरो, भूकप्प र भोटेकोशी बाढीको समेत सामना गर्नुपर्‍यो’, अध्यक्ष पौडेलले भने ‘जसको कारण हामीले समयमै निर्माण सामग्री आयोजना स्थलमा पुर्‍याउन सकेनौं र आयोजना केहि समय ढिला हुन पुग्यो ।’ 

पटक–पटकको विपत्तिका कारण अरनिको राजमार्ग क्षतिग्रस्त हुँदा सामग्री ढुवानीमा बाधा परेको कारण आयोजनामा ढिलाई भएको पौडेलले बताए । 

आयोजनाको सबै काम सम्पन्न गरेर परीक्षणको तयारी गरीरहेकै बेला २०७६ साल असार २१ गते राती मार्मीङ खोलामा बाढी आँउदा आयोजनाको मुहानस्थालमा ठूलो क्षति पुगेको थियो । सो बाढीका कारण आयोजनामा कार्यरत २ जना कर्मचारी समेत वेपत्ता भएका थिए भने दुईजना गम्भीर घाइते भएका थिए । 

घटनामा वेपत्ता भएका आयोजनाका एक जना इन्जिनियर र अर्का एक इलेक्ट्रिसियनको अवस्था अझै अज्ञात छ । त्यस्तै २०७५ चैत १० गते सोही आयोजनाको बाँधस्थलको कर्मचारी आवासमा ग्याँस सिलिन्डर विस्फोट हुँदा चार जना कर्मचारीले ज्यान गुमाएका थिए । जसको कारण पनि निर्माण समय र लागत समेत लम्बिएको आयोजनाले जानकारी दिएको छ । 

आयोजनाले २०७५ पुसमा आयोजना प्रभावित स्थानीयको लागि १४ लाख ७६ हजार कित्ता साधारण शेयर जारी गरेको थियो भने आयोजनाको कर्मचारी र सर्वसाधारणको लागि २० लाख २३ हजार कित्ता शेयर निष्कासन गरेको थियो ।

प्रतिक्रिया [0]
प्रतिक्रिया दिनुहोस्