ई –पेपर | हाम्रो बारेमा | विज्ञापन | ग्राहक बन्नुहोस | Podcast | Newbiz
arthik abhiyan
ad banner Apache RTR 200 ABS

संस्थानलाई नयाँ ढंगले अगाडि बढाउँछौं

२०७७ फागुन, ११  
अन्तरवार्ता अभियान परिशिष्ट (सप्लिमेन्ट)
Image Not Found

सरकारी स्वामित्वमा रहेको जीवन बीमा व्यवसाय गर्ने राष्ट्रिय बीमा संस्थान (मंगलवार) फागुन ११ गते ५३ वर्ष पूरा गरेर ५४औं वर्षमा प्रवेश गर्दै छ । प्रस्तुत छ, संस्थानको ५४औं वार्षिकोत्सव, पछिल्लो गतिविधि लगायत विषयमा संस्थानका प्रशासक (प्रमुख कार्यकारी अधिकृत) कविप्रसाद पाठकसँग आर्थिक अभियानका मिलन विश्वकर्माले गरेको कुराकानीको सार :

राष्ट्रिय बीमा संस्थान यस वर्षको वार्षिकोत्सव कसरी मनाउँदै छ ?
यस वर्षको वार्षिकोत्सव कोरोना भाइरसको जोखिमका बीच पनि भौतिक उपस्थितिमै औपचारिक कार्यक्रम गरेर मनाउँदै छौं ।  कोरोनाले अप्ठ्यारो परिस्थिति ल्याएको भए पनि हामीलाई पहिलेको परम्परा धान्नुपर्ने बाध्यता छ । सोही अनुसार भीडभाड कम गरेर संस्थानको केन्द्रीय कार्यालयको प्रांगणमा फागुन ११ गते नै वार्षिकोत्वव समारोह गर्दै छौं ।

वार्षिकोत्सवको अवसरमा गत फागुन २ र ३ गते केन्द्रीय कार्यालय परिसरमै निःशुल्क रूपमा आँखा शिवर पनि सम्पन्न गरेका छौं । साथै, गत फागुन ७ गते रक्तदान कार्यक्रम पनि गर्‍यौं । यसैगरी सामाजिक क्षेत्रका काम गर्दै आएको एक संस्थालाई वार्षिकोत्सव समारोहबाटै आर्थिक सहयोग गर्ने कार्यक्रम छ । वार्षिकोत्सवको अवसरमा संस्थानका कर्मचारीहरूबीच विभिन्न प्रकारका खेलकुद प्रतियोगिता पनि गरिएका छन् । साथै, नियमन अनुसार संस्थानका पुराना कर्मचारी तथा बढी व्यवसाय ल्याउने अभिकर्तालाई सम्मान गर्ने कार्यक्रम पनि छ ।

सरकारी स्वामित्वमा स्थापना भएको यस संस्थानले व्यावसायिक कारोबार शुरू गरेको ५४ वर्ष भएको छ । संस्थानले यस अवधिमा अपेक्षित प्रगति गरेको छ ?
५४ वर्ष भनेको वास्तवमै लामो यात्रा हो । यस अवधिमा संस्थान नेपालको बीमा क्षेत्रमा एक अग्रणी संस्थाको रूपमा स्थापित हुनुपर्ने हो । तर, त्यो भएको देखिँदैन । ५४ वर्षसम्ममा स्थापित शाखाहरू, अभिकर्ताको संख्या र व्यवसाय हेर्ने हो भने हामी पछि परेको हो कि भन्ने देखिन्छ । तर, सँगै हाम्रो बीमाशुल्क संकलन र बीमा कोष हेर्ने हो भने त्यति पछि परेको अवस्था पनि छैन ।

तर, यति लामो इतिहास बोकेको संस्थाले पहिलेदेखि नै राम्रोसँग काम गरेको भए संस्थान अहिले पहिलो जीवन बीमा कम्पनीको रूपमा स्थापित भइसक्ने थियो । तर, पहिला त्यसरी काम नभएपछि त्यो सफल हुन सकेन । यद्यपि, हामी अब त्यही दिशामै काम गर्न लागेका छौं ।

अहिले बीमा बजारमा १९ ओटा जीवन बीमा कम्पनी छन् । अब विगतमा जुन ढंगले अगाडि बढेका थियौं । अब त्यसरी काम गरेर बाँच्न सक्ने अवस्था छैन । अब काम गर्ने कार्यशैली, सोच र प्रविधिलाई परिमार्जन तथा परिवर्तन गर्दै अगाडि बढ्नुपर्छ ।

कम्पनीले सोचे अनुरूप स्थान लिन सकेको छैन भन्नुभयो । कारण के होलान् ?
विगतमा शाखा कार्यालय नै अत्यन्त कम थिए । काठमाडौं बाहिरबाट बीमा व्यवसाय लिन सक्ने अवस्था थिएन । बीमा अभिकर्ता पनि बढाउन सकिएको थिएन । त्यसमाथि लामो समयसम्म कर्मचारी नियुक्ति गर्ने अवस्था पनि भएन । यस्ता कारणले विगतमा कम्पनीले व्यावसायिक गति लिन सकेन । पछिल्लो समय आएर त लामो समयदेखिको लेखा परीक्षण तथा वार्षिक साधारणसभाको काम गर्न सकिएको छैन । हाल यस्तै समस्या समाधान गरेर अगाडि बढ्नुपर्ने बाध्यता छ । त्यस कारण पनि संस्थानले अपेक्षित गति लिन सकेको छैन ।

कम्पनीले लामो समयसम्म व्यावसायिक गति लिन सकेन नै, अहिलको व्यावसायिक गतिविधि के कस्तो छ ?
पछिल्लो समय हामी व्यावसायिक गतविधि बढाउने मामलामै केन्द्रित छौं । लामो समयसम्म संस्थानको शाखा कार्यालय ८ ओटा थियो । काठमाडौं बाहिर दुई–तीनओटा भन्दा बढी शाखा थिएनन् । तर, अहिले हामीले शाखा कार्यालयको संख्या २२ पु¥याएका छौं भने चालू आवभित्रै बागलुङ र इलाममा शाखा कार्यालय खोल्ने तयारी छ ।

विगतमा काठमाडौं बाहिरबाट बीमालेख जारी गर्न सकिने अवस्था थिएन । काठमाडौं बाहिर शाखा कार्यालय भए पनि स्वीकृति र जारी गर्ने काम केन्द्रीय कार्यलयबाटै हुन्थ्यो ।

एउटा बीमालेख जारी गर्न नै ३ महीनासम्म समय लाग्ने गर्दथ्यो । तर, अहिले भने प्रस्ताव ल्याएको आधा घण्टाभित्र बीमालेख जारी गर्न सक्ने अवस्थामा पुगेका छौं ।

अभिकर्ताको संख्या विस्तार गर्न सबै शाखा कार्यालयलाई निश्चित संख्यामा तालीम गर्न र निश्चित संख्यामा अभिकर्ता तयार गर्न वार्षिक लक्ष्य नै दिएका छौं । त्यसले गर्दा तालीम र अभिकर्ताको संख्या पनि बढ्दै गएको छ । पहिले वर्षमा एक–दुईओटा मात्र तालीम हुने गर्दथ्यो । तर, अहिले वार्षिक ७०/८० ओटा तालीम गर्नेगरी अगाडि बढेका छौं ।

हामीलाई त्यतिले मात्र पनि पुग्दैन । अहिले प्रतिस्पर्धी कम्पनीहरूले दैनिकजसो तालीम गर्दै आएका छन् । त्यसको तुलनामा हामीले गर्ने तालीम कार्यक्रम निकै कम हो । तर, हिजोको तुलनामा अहिले केही गर्न खोजेका छौं । यद्यपि, हामीले गर्नुपर्ने भने धेरै नै छ । र, क्रमशः हामी त्यस्ता काम गर्दै जानेछौं ।

हामीले विज्ञापन र विभिन्न गतिविधिको माध्यमबाट हाम्रो बारेमा जानकारी दिन शुरू गरेका छौं, जसले गर्दा संस्थानमा आम मानिसको आकर्षण पनि बढ्न थालेको छ । आम मानिसलाई विश्वस्त गर्न सजिलो भएपछि अभिकर्ता पनि सरकारी बीमा कम्पनी नै खोज्दै आएका छन् । यस्ता कारण हामीलाई अबका दिनमा अगाडि बढ्न सजिलो भने छ ।

यस्तै, हामीले प्रविधिलाई विस्तार गर्दै लगेका छौं । हामीकहाँ भएको प्रविधि अत्यन्त पुरानो थियो । हिजो हाम्रो काम डेस्कबेस्ड थियो । तर, अहिले हामीले कोर सफट्वेयर बनाएर काम गर्न थालेका छौं । ग्राहकलाई सूचना दिन एसएमएस सेवा सुचारु गरेका छौं । हिजोको दिनमा प्रिमियम बुझाए पनि कम्पनीमा पुग्यो कि पुगेन, अभिकर्ताले नै बीचमा खाइदियो कि कम्पनीलाई दियो भन्ने विषयमा ग्राहक अनभिज्ञ हुन्थे । अहिले ग्राहकको प्रिमियम कम्पनीमा आउनासाथ एसएमएस मार्फत जानकारी दिने व्यवस्था छ ।

यस्तै, कम्पनीको छुट्टै मोबाइल एप पनि बनाएका छौं । मोबाइल एपमार्फत पनि संस्थानका सम्पूर्ण सेवाहरू थाहा पाउन सकिन्छ । त्यस्तै, वेबसाइटलाई थप विकसित गरेका छाैं । त्यसबाट पनि संस्थानको सेवाको विषयमा धेरै जानकारी पाउन सकिन्छ ।

कम्पनीमा सुशासन कामय गर्ने, सेवालाई छिटो छरितो बनाउने काम पनि गर्दै आएका छौं । हामी पुरानो कामलाई व्यवस्थित गर्ने कार्यमै अगाडि बढेका छौं ।

यही वार्षिकोत्सवको अवसरमा एउटा नयाँ बीमा पोलिसी जारी गर्दै छौं । अन्य प्रक्डक्ट पनि बीमांकीय मूल्यांकनको चरणमा छन् । आवश्यक पक्रिया पुगेपछि उक्त प्रडक्ट पनि बजारमा आउनेछ ।

बोनसदरको विषयमा भने बीमांकीय मूल्यांकनमा भएको ढिलाइका कारण अन्योल देखिएको छ । बोनसदर बीमांकीय मूल्यांकन मार्फत तै निर्धारण हुने हो । तर, हाम्रो लामो समयदेखि बीमांकीय मूल्यांकन हुन सकेको छैन । फलस्वरूप तुरुन्त बोनसदर घोषणा गर्न सकिएको छैन । अहिले हामीले प्रतिहजार ६५ रुपैयाँ अन्तरिम बोनसदर तोकेर काम गरेका छौं । तर, बीमामा बोनसदर नै ठूलो कुरा होइन । कतिपय प्रडक्टमा बोनसदर बढी हुन्छ । तर, त्यसमा लाग्ने बीमाशुल्क तथा त्यसमा के कस्ता सुविधा छन्, त्यसले पनि महत्त्व राख्छ ।

यतिका लामो समय पार गरेको संस्थानले काठमाडौं बाहिर व्यवसाय विस्तार गर्न नसक्नुको कारण के हुन सक्छ ?
खासमा यसको मुख्य कारण नै कर्मचारीको अभाव हो । काठमाडौं बाहिर व्यवसाय विस्तार गर्न सबैभन्दा पहिला कार्यालय चाहियो । त्यसका लागि कर्मचारी पनि चाहियो । तर, विगतमा हामीकहाँ कर्मचारी पर्याप्त मात्रामा भएनन् । लोकसेवा मार्फत कर्मचारी नियुक्ति गर्नुपर्ने भएकाले भनेको समयमै कर्मचारी ल्याउन पनि सकिँदैनथ्यो । संस्थानमा २०४५ देखि २०७५ सम्म जम्मा १९ जना कर्मचारी मात्र नियुक्ति गरिएको थियो । त्यसमा पनि आधा कर्मचारी त संस्थानबाट राष्ट्रिय बीमा कम्पनी छुट्टिएपछि त्यतै गए । त्यसमाथि नियमनअनुसार कर्मचारीहरू अवकाश हुँदै गए । यसरी कर्मचारीको संख्या घट्दै गएपछि विगतमा शाखा कार्यालय विस्तार गर्न सकिएन । त्यस कारण बाहिर व्यवसाय विस्तार गर्न समस्या भएको हो ।

तर, अहिले त्यसलाई हामीले सुधार गर्दै गएका छौं । म करिब ३ वर्षअघि संस्थानको प्रशासक भएर आएपछि मात्र तीन–चारपटक कर्मचारी नियुक्तिको काम भएको छ ।

उनीहरूमार्फत नै बाहिर शाखा कार्यालय स्थापना गरेर व्यवसाय विस्तार गरेका छौं । यस्तै अभिकर्ता बनाउने, नयाँ प्रडक्ट ल्याउने विषयमा पनि हामीले काम गर्दै आएका छौं । सम्भवतः चालू आवभित्रै केही नयाँ प्रडक्ट बजारमा ल्याउनेछौं ।

नयाँ ढंगले अगाडि बढ्न अरू व्यावसायिक योजना भने के बनाउनु भएको छ ? अबका दिनमा संस्थान कसरी बढ्न आवश्यक छ ?
अहिले हामीकहाँ लेखापरीक्षणमा ठूलो समस्या छ । अहिले तत्काललाई लेखापरीक्षणको काम सम्पन्न गर्नुपर्ने छ । आव २०६४/६५ देखि यताको बीमांकीय मूल्यांकन तथा लेखापरीक्षण गर्न सकिएको छैन । त्यसको असरले साधारणसभा पनि गर्न सकिएको छैन ।  

यद्यपि, म आएपछि ९ वर्षको बीमांकीय मूल्यांकन सम्पन्न गरेका छौं । आाव २०६९/७० सम्मको बीमांकीय मूल्यांकन प्रतिवेदन बीमा समितिमा स्वीकृतिका लागि पठाएका छौं । यस्तै, अन्य आवको बीमांकीय मूल्यांकन तथा लेखापरीक्षणको काम पनि प्रक्रियामै छ । बीमा समितिमा नयाँ अध्यक्ष पनि आउनु भएको छ । यस विषयमा उहाँसँग छलफल गरेर अगाडि बढ्नेछौं । समग्रमा अब हामी क्रमशः लेखापरीक्षण, साधारणसभाको काम सकाउँदै जानेछौं । यसलाई अन्तिम रूप दिएपछि हामीलाई नयाँ ढंगले अगाडि बढ्न सहज हुन्छ । त्यसैले अब तत्काल साधारणसभाको काम सक्नेगरी अगाडि बढेका छौं ।

विशेषगरी अब हामीले संस्थानलाई प्रविधियुक्त बनाउने गरी अगाडि बढेका पनि छौं । संस्थानले लामो समयसम्म डेस्कबेस्डमा काम गरेको थियो । अहिले हामीले त्यसबेलाका तथ्यांकहरूलाई नयाँ सफ्टवेयरमा सार्ने काम गरेका छौं । अहिले यसमा केही प्राविधिक समस्या पनि देखिएको छ । त्यो समाधान हुनासाथ पुराना डेटा नयाँ सफ्टवेयरमा आउँछन् । त्यसपछि सबै ग्राहकले मोबाइल एपमार्फत आफ्नो बीमा पोलिसीबारे जानकारी पनि लिन सक्छन् ।

यस संस्थानले अझै पनि निजी बीमा कम्पनीहरूसँग व्यावसायिक रूपमा प्रतिस्पर्धा गर्न सकेको छैन । उनीहरूसँग कडा रूपमै प्रतिस्पर्धा गर्ने स्तरमा संस्थान कहिले पुग्छ ?
वास्तवमा अब हामी प्रतिस्पर्धामा नगई बाँच्न सक्ने अवस्था छैन । अहिले त हामी पूर्णरूपमा सरकारी हौं भन्न पाएका छौं र ग्राहकलाई विश्वस्त गरेर व्यवसाय गर्न सकेका छौं । तर, निटक भविष्यमै कम्पनीमा रूपान्तरण हुँदै छौं । कम्पनीमा रूपान्तरण भएपछि त हामी पनि निजी कम्पनीजस्तै हौं । त्यस कारण अब हामी प्रतिस्पर्धामा जानुपर्ने बाध्यता नै छ । हामी त्यही अनुसार नै अगाडि बढेका पनि छौं ।

त्यसका लागि अब हामीले त्यही अनुरूप प्रडक्ट ल्याउनुपर्नेछ भने काम गर्ने शैली, सोच पनि परिवर्तन गर्नुपर्नेछ । त्यति गर्दा गर्दै पनि निजी कम्पनीहरूसँग प्रतिस्पर्धामा उत्रिन भने केही ढिलाइ भने हुन सक्छ । किनभने, हामी निजी कम्पनीहरूले जसरी तत्काल निर्णय गर्न सक्दैनौं । कम्पनीमा रूपान्तरण भए पनि हाम्रो यो समस्या रहन्छ नै । यसले गर्दा केही ढिलाइ भने हुन्छ । तर, निकट भविष्यमा संस्थान निजी बीमा कम्पनीहरूसँग कडा रूपमै प्रतिस्पर्धा गर्नेगरी बजारमा आउँछ ।

प्रतिक्रिया [0]
प्रतिक्रिया दिनुहोस्