ई –पेपर | हाम्रो बारेमा | विज्ञापन | ग्राहक बन्नुहोस | Podcast | Newbiz
arthik abhiyan
ad banner Apache RTR 200 ABS

लगातार दुई दिन दोहोरो अंकले घटेर २६०० विन्दु तल झर्‍यो नेप्से, कारोबार रकमको उच्चता कायमै

२०७७ फागुन, ११  
लगानी नेप्से विश्लेषण
Image Not Found
author avatar अभियान संवाददाता

फागुन ११, काठमाडौं । नेप्से परिसूचक निरन्तर दुई दिन लगातार दोहोरो अंकले घटेर २ हजार ६०० विन्दु तल झरेको छ ।

सोमवारदेखि घटेको बजारले मंगलवार पनि निरन्तरता पाएको हो । सोमवार ३२ दशमलव ६७ अंकले घटेको बजार मंगलवार २१ दशमलव १६ अंकले घटेको हो । आइतवार २ हजार ६४० दशमलव ३४ विन्दुमा पुगेको नेप्से परिसूचक दुई दिन लगातार घटेर २ हजार ५८६ दशमलव ५१ विन्दुमा झरेको हो । दुई दिनमा नेप्से परिसूचक ५३ दशमलव ८३ अंकले घटेको हो ।

मंगलवार २ हजार ६२७ दशमलव ३४ विन्दुदेखि खुलेको बजार २ हजार ५१९ दशमलव ४२ विन्दुसम्म झरेर फेरी उकालो लागेर बन्द भएको हो । नेप्से परिसूचकले उच्च विन्दु कायम गरिरहँदा लगानीकर्ताहरुको मनोबल पनि कमजोर हुँदैं गएको अनुमान विश्लेषकहरुले लगाएका छन् ।

लगानीको मूल्य बढीरहँदा घट्ने हो कि भन्ने आशंकामा लगानीकर्ताहरुको मनोबल कमजोर भएको उनीहरुको तर्क छ । पूँजीबजारमा लगानी गरी नाफा आर्जन गर्न चाहनेले आत्तिनु पनि नहुने र मात्तिनु पनि नहुने सुझाब जानकारहरुको छ । 

मंगलवार शेयर कारोबार मापक नेप्से परिसूचकसँगै ठुला कम्पनीहरुको मात्र कारोबार मापक सेन्सेटिभ इन्डेक्स पनि २ दशमल ४१ अंकले घटेको छ । नेप्से परिसूचक ओरालो लागेपनि बजारमा कारोबार रकमको उच्चता भने कायमै रहेको छ ।

मंगलवार पनि रू. ८ अर्ब ५६ करोड १५ लाख ३९ हजार बराबरको शेयर कारोबार भएको छ । उक्त रकम बराबरको १ करोड ७७ लाख १४ हजार ९१२ कित्ता शेयर कारोबार भएको हो । यो दिन २०५ ओटा कम्पनीको ८३ हजार ३५७ पटकको कारोबारमा उल्लेखित शेयर कारोबार भएको हो । 

यसदिन नेपाल इन्फ्रास्ट्रक्चर बैंकको सर्वाधिक रकमको शेयर कारोबार भएको छ । यो दिन कम्पनीको रू. ७३ करोड ९४ लाख ५२ हजार बराबरको शेयर कारोबार भएको छ । सर्वाधिक रकमको शेयर कारोबार भएको यो दिन कम्पनीको शेयरमूल्य भने सर्वाधिक १० प्रतिशतले घटेको छ । 

कारोबारको सातौं दिनसम्म उच्च मूल्य वृद्धि भएको उक्त कम्पनीको आठौं दिन मंगलवार भने मूल्यमा उच्च गिरावट आएको हो । यो दिन कम्पनीको शेयरमा उच्च विक्री चाप देखिएपछि मूल्यमा असर परेको हो । सोमवार रू. ६६० कायम भएको कम्पनीको अन्तिम मूल्य मंगलवार प्रतिकित्ता रू. ६६ ले घटेर अन्तिम मूल्य रू. ५९४ मा झरेको छ ।

यसदिन व्यापारिक समूह बाहेकका सबै परिसूचक घटेको छ । व्यापारिक समूहको भने शून्य दशमलव ९ प्रतिशतले परिसूचक बढेको हो । यो दिन नेपाल फाइनान्स, अपि पावर, लिवर्टी इनर्जी कम्पनी र हिमालयन पावर पार्टनरको शेयरमूल्य ९ प्रतिशतभन्दा बढीले वृद्धि भएको छ । 

प्रतिक्रिया [0]
प्रतिक्रिया दिनुहोस्