ई –पेपर | विज्ञापन | ग्राहक बन्नुहोस | Podcast | Newbiz
arthik abhiyan
ad banner Apache RTR 200 ABS

नौवस्ता औद्योगिक क्षेत्रको काम शुरू

२०७७ फागुन, १४  
प्रदेश ०५
NA

बाँके । बाँकेको बैजनाथ गाउँपालिकामा ‘नौवस्ता औद्योगिक क्षेत्र’ निर्माण हुने भएको छ । यसका लागि ६१ करोड विनियोजन समेत भएको छ । रकम विनियोजन भएसँगै निर्माण अगाडि बढाइएको छ ।   

नेपालगञ्ज औद्योगिक क्षेत्र व्यस्थापन कार्यालयका प्रमुख कृष्णबहादुर पुनले औद्योगिक क्षेत्र निर्माणको शुरुआत भएको जानकारी दिए । ‘नौवस्ता औद्यागिक क्षेत्र परियोजना’ कार्यालय पनि सञ्चालनमा आएको उनले बताए ।   
 
संघीय सरकारले औद्योगिक क्षेत्रका लागि चालू आवमा ६१ करोड खर्च गर्दै छ । बजेटबाट औद्योगिक क्षेत्रका लागि जग्गा सम्याउने, खाल्टाखुल्टी पुर्ने, प्लट बनाउने लगायतको कार्य हुनेछन् । सडक ट्र्याकको सम्भावना र यसका लागि काम पनि चालू आवमै बढाउने योजना रहेको छ ।  
   
बैजनाथमा ३३८ बिघा क्षेत्रफलमा औद्योगिक क्षेत्र बनाउने योजना छ । औद्योगिक क्षेत्रका लागि भनिएको केही भागमा बस्तीसमेत रहेको छ । समस्याको समाधान अझै हुन सकेको छैन । यस अघि विस्तृत आयोजना प्रतिवेदन (डीपीआर) भइसकेर पनि घरधुरी सर्वेक्षण र वातावरणीय प्रभाव मूल्यांकनमा भएको अवस्था रहेको बताइएको छ ।
    
औद्योगिक क्षेत्रका लागि डिपिआर तयार हुँदा २५९ घरधुरी उक्त क्षेत्रमा पर्ने तथ्यांक संकलन भएको थियो । स्थानीय घरधनीको संघर्ष समितिले सो संख्या झण्डै दोब्बर रहेको दाबी गर्दै आएको छ । अहिले भूमि समस्या समाधान सम्बन्धी आयोगको काम स्थानीय तहले गर्दै आएको छ ।

‘औद्योगिक क्षेत्रमा रहेका भूमिहीन तथा सुकुमवासीको यकिन तथ्यांकका लागि अहिले स्थानीय तहसँग समन्वय गरिहेका छौं,’ औद्योगिक क्षेत्र व्यवस्थापन कार्यालयका प्रमुख पुनले भने, ‘औद्योगिक क्षेत्रका लागि छुट्याइएको १० प्रतिशत भूभागमा मात्रै समस्या हो ।’

औद्योगिक क्षेत्रमा उद्योग स्थापनाका लागि २५० उद्योगीले आवेदन दिएका छन् । औद्योगिक क्षेत्र बन्न लागेपछि रोजगारी पाउने आशामा स्थानीयवासी उत्साहित छन् । रासस

प्रतिक्रिया [0]
प्रतिक्रिया दिनुहोस्