ई –पेपर | विज्ञापन | ग्राहक बन्नुहोस | Podcast | Newbiz
arthik abhiyan
ad banner Apache RTR 200 ABS

शेयर बजारको वृद्धिपछि चीनमा थपिए २५० जना नयाँ अर्बपति   

२०७७ फागुन, १८  
अन्तरराष्ट्रिय
Image Not Found

फागुन १८, पेचिङ । शेयर बजारमा उछाल आएसँगै चीनमा गत वर्ष सन् २०२० मा २०० भन्दा बढी नयाँ अर्बपति थपिएका छन् ।     

विश्वका धनाढ्यका बारेमा अध्ययन गर्ने हुरुन ग्लोबल रिच लिस्टले मंगलवार सार्वजनिक गरेको सूचीमा चीनमा विगत पाँच वर्षको अवधिमा अर्बपतिको संख्या दोब्बरले बढेको उल्लेख छ । विश्वमै दोस्रो ठूलो अर्थतन्त्र रहेको चीनले पछिल्ला केही वर्षदेखि विकासमा तिब्र रुपमा फड्को मारेको छ ।     

विश्वका अधिकांश मुलुकमा कोरोना भाइरस महामारीले अर्थतन्त्रमा गम्भीर असर पारे पनि चीनले कोरोना भाइरसलाई समयमै नाटकीय रुपमा नियन्त्रण गरेपछि सन् २०२० मा पनि राम्रो प्रगति गरेको छ ।     

हुरुनका अनुसार सन् २०२० मा २५९ जना अर्ब डलरको सूचीमा प्रवेश गरेका छन् । चीनमा योसहित कुल अर्बपतिको संख्या १ हजार ५८ पुगेको छ । विश्वमै अर्बपतिको १ हजारको संख्या पार गर्ने चीन पहिलो मुलुक पनि भएको छ ।     

तुलनात्मक रुपमा, दोस्रो राम्रो प्रगति गर्ने मुलुक अमेरिकामा ७० जना नयाँ अर्बपतिको उदय भएको छ । योसहित अमेरिकामा कुल अर्बपतिको संख्या ६९६ पुगेको छ ।     

चीनमा पानीको व्यापार गर्ने नोङ्फुका संस्थापक झोङ शानशानको सम्पत्ति ८५ अर्ब डलर पुगेको छ । विगतमा निर्माण कार्यमा संलग्न झोङले गत वर्ष हङकङमा प्राथमिक शेयर ( आईपीओ) जारी गरेर ११ अर्ब डलर नगद संकलन गरेका थिए।     

एकै वर्ष तीन जना व्यक्तिले ५० अर्ब डलरभन्दा बढी सम्पत्ति जुटाएका छन् । सर्भेका अनुसार टेस्लाका एलन मस्क, अमेजनका जेफ बेजोस र पिन्डुओडुका कोलिन हुआङको सम्पत्ति ५० अर्ब डलरले बढेको छ ।     

समग्रमा, चीनले विश्वमै सम्पत्ति सृजना गर्नेतर्फ अग्रस्थान बनाइरहेको छ । हुरुनका अनुसार विगत पाँच वर्षको अवधिमा चीनले ४९० जना नयाँ अर्बपति जन्माएको छ भने अमेरिकाले १६० जना थपेको छ ।     

हुरुन प्रतिवेदनका अध्यक्ष रुपर्ट हूगवर्फले कोरोना भाइरसको महामारी भएपनि गत वर्ष एक दशकयता केही व्यक्तिले सबैभन्दा बढी आम्दानी गर्न सफल भएको बताए।

यसको मुख्य कारण शेयर बजारमा नयाँ कम्पनीको सूचीकरण र शेयर बजारमा आएको उछाल मुख्य रुपमा जिम्मेवार छ ।  उनका अनुसार सम्भवतः विगत १०० वर्षमा एशियाले बाँकी विश्वको भन्दा बढी अर्बपति सृजना गरेको छ ।     

सबैभन्दा बढी अर्बपति पनि अहिले चिनियाँ शहरमा रहेको सर्भेले देखाएको छ । अर्बपति रहेबसेका विश्वका उत्कृष्ट १० ओटा शहरमध्ये छ ओटा शहर चीनमै छन् । विगत छ वर्षदेखि लगातार पेचिङ पहिलो स्थानमा छ । रासस/ एएफपी

प्रतिक्रिया [0]
प्रतिक्रिया दिनुहोस्