ई –पेपर | विज्ञापन | ग्राहक बन्नुहोस | Podcast | Newbiz
arthik abhiyan
ad banner Apache RTR 200 ABS

उद्योगीको अग्रगामी छलाङ

२०७७ चैत, १३  
तीतो मीठो
Image Not Found
author avatar मदन लम्साल

यसै हप्ता एक हुल उद्योगी व्यवसायी देशमा उद्योगधन्दाको विकास कसरी गर्ने भन्ने छलफल गर्न भनेर बालुवाटार छिरे । तर त्यहाँबाट बाहिर निस्कँदा भने उनीहरूमध्ये धेरैले मुट्ठी पो उचालिरहेको देखियोे । अचम्म ! के भएछ हँ हाम्रा उद्योगी, व्यवसायीहरूलाई ? बालुवाटार छिरेपछि उनीहरूलाई चियासिया पिलाएपछि मार्क्स, लेनिन, चे ग्वेभेरालगायतका पाठ पो पढाइएछ । त्यहाँ उनीहरूले दीक्षा र भिक्षा दुवै पाएछन् जस्तो छ ।

मुलुकमा किन औद्योगिक वातावरण बनेन, किन उद्योग खुलेनन् भनेको त उद्योगीहरू कामरेड नबनेर पो रछ । यत्ति ब्रह्मज्ञान उद्यमीहरूलाई पहिल्यै भएको भए अहिलेसम्म मुलुक कहाँ पुगिसक्थ्यो ।

उद्यमीहरू पनि अब माक्र्स, लेनिनका चेला हुने भएपछि आडम स्मिथ, किन्स, मार्शल, मिल, सेन यी सबै प्रतिगामी अर्थशास्त्रीहरू हुन् भनेर मान्नैपर्ने हुन्छ । अब उद्योगी व्यवसायीले तिनका हैन, यिनका किताब पढ्नुपर्छ । अर्थात् अब उनीहरूले कम्युनिष्ट र अग्रगामी अर्थशास्त्रीहरूका पुस्तकहरू पढ्नु थाल्नु पर्दछ । अनि मात्र उद्योगको पनि असली विकास हुन्छ । बन्दुकबाट नआएको समाजवाद अब चैं आउँछ कि ?

मुलुकमा किन औद्योगिक वातावरण बनेन, किन उद्योग खुलेनन् भनेको त उद्योगीहरू कामरेड नबनेर पो रछ । यत्ति ब्रह्मज्ञान उद्यमीहरूलाई पहिल्यै भएको भए अहिलेसम्म मुलुक कहाँ पुगिसक्थ्यो । तर केही छैन । ‘देर आया दुरुस्त आया’ भनेझैं उद्यमीहरू लाल भएपछि मुलुकमा कमाल हुने निश्चित छ । मुलुकमा अब भने औद्योगिक क्रान्ति साँच्चै होला जस्तो छ । तर यसका लागि उद्यमीहरूका लागि छुट्टै विशेषखाले नयाँ पाठ्यक्रमको पनि व्यवस्था तुरुन्त हुन जरुरी छ । अब उद्योगीहरूले कच्चापदार्थ, उत्पादनको बजारीकरण जस्ता कुराभन्दा पनि तल दिइएका यस्ता पाठ्यसामग्री र पुस्तकहरू नपढी नहुने देखिन्छ । जस्तै,

  • असली कम्युनिष्ट कसरी बन्ने (रेडबुक)
  • लेनिनका भाषणहरू
  • जुछे विचारधारा र आत्मनिर्भर अर्थतन्त्र निर्माणको कार्यदिशा
  • मार्क्सको अन्तरराष्ट्रिय कम्युनिष्ट मेनिफेस्टो
  • माओको नेतृत्वमा भएको सांस्कृतिक क्रान्तिलाई हाम्रो देशमा कसरी सफल पार्ने
  • चे ग्वेभेरा विचारधारा
  • साइनिङ पाथ क्यों असफल हुआ ?
  • नक्सलपन्थी आन्दोलनका इतिहास और भविष्य
  • बुर्जुवा संसदीय व्यवस्था, इसका उपयोग और साम्यवाद
  • कम्युनिष्टभित्रका गद्दारहरू
  • लिन पियाओवाद र त्यसका असरहरू
  • हो ची मिन्ह काकाको जीवनी
  • पोलपोट कालको कम्बोडियाका क्रान्तिकारी उपलब्धिहरू
  • माओ र खु्रश्चेवको विवाद र त्यसले विश्व कम्युनिष्ट आन्दोलनमा पारेको असर
  • सी चीन फिङका विचारलाई अक्षरशः पालना किन र कसरी गर्ने ?
  • श्रम व्यवस्थापनमा माक्र्सवादी अवधारणा
  • कम्युनिष्ट आचरणका पाइलाहरू
  • समाजवाद, साम्यवाद र संसदीय भास
  • बुर्जुवा समाजवाद र जनसमाजवादको फरक
  • नौलो जनवाद, बहुदलीय जनवाद, जनताको जनवादका समानता र विषमताहरू
  • पूँजीवादको विरोध गर्दै पूँजीपति कसरी बन्ने ?
  • मार्क्सवादी गाली साहित्य
  • कम्युनिष्ट शब्दावली (ग्लोसरी)

जसले यी विषय राम्ररी पढ्छ, त्यही सबैभन्दा सफल उद्यमी हुने निश्चित छ । आखिर नेपालजस्तो देशमा बिक्ने भनेकै यही कुरा हुन् क्यार ! जे होस्, दशकौंपछि बल्ल उद्यमीको घैंटामा घाम लागेछ । सरकारले उद्योग खोल्नुहुन्न भन्नेहरू नै आफै सरकारी मान्छे बनेपछि अब गजबको पीपीपी मोडेल स्वतः बन्ने भो । हिजोसम्म उद्यमी र सरकार सर्प र भ्यागुता जस्ता भएर पो पीपीपी असफल भएको रहेछ । भन्नेहरूले त क्रोनी क्यापिटलिज्म भन्लान् । तर कसले कसको मुख टाल्न जान्छ र ? सत्ताको फेर नसमाती चोखो व्यवसाय गरेर कहाँ अग्रगामी हुन सकिन्छ र ? गणेश शैलीका सत्ता परिक्रमा देउतैको पालादेखि चलेकै हो क्यारे ? त्यही भएर उद्योगको विकासका लागि हाम्रा उद्यमीले नयाँ आइडिया फुराएका होलान् ।

तर नेपाली उद्यमीहरूले भ्याकुताजस्तो उफ्रने प्रगति गर्न केही क्रान्तिकारी शब्दावलीहरू कण्ठै पार्नुपर्ने हुन्छ । जस्तै, अग्रगामी छलाङ, पश्चगामी भ्वाङ, बुर्जवा, विदेशी दलाल, लफ्फाजी, संशोधनवादी, घोर दक्षिणपन्थी, दलाल पूँजीवादी, पलायनवादी, दक्षिणपन्थी, अराजकतावादी, रूप तत्त्व र सार तत्त्ववीच भेद, वर्गशत्रु, प्रधान शत्रु, गौण शत्रु, आदि ।

आइन्दा नेपाली उद्यमीहरूले एक–अर्कासँग कुरा गर्दा अर्थशास्त्रको विज्ञान प्रयोग गर्ने हैन, मार्क्सवादी गाली विज्ञानलाई प्रयोग गर्नुपर्छ । यसका लागि उद्यमीहरूले मार्क्सवादी सम्बोधन विज्ञानको छुट्टै कक्षा लिनुपर्ने हुन्छ ।

कम्युनिष्ट भन्नासाथ लाल अर्थात् रातो रङको महत्त्व हुने भएपछि हरेक उद्यमीहरूले चढ्ने कार, लगाउने कपडा, अफिस सजावट सबै रातो नै बनाउनुपर्ने हुन्छ । अझ उद्यमी स्वयम् कम्युनिष्ट भएपछि मजदूर संगठनको नेता पनि स्वयम् उद्यमी नै हुन पाउनुपर्छ । मजदूर नेता बनिसकेपछि उद्यमी आफैले ‘हाम्रो माग पूरा गर’ भनेर धर्ना दिन पनि सजिलो हुने देखिन्छ । बरु उद्यमीले आफ्नै उद्योगको अगाडि धर्ना दिँदा लगाउने नाराहरूका बारेमा पनि एउटा छुट्टै तालीम सञ्चालन हुन जरुरी देखिन्छ । साथै, विभिन्न अवसरहरूमा कसरी प्रस्तुत हुने भनेर टिभीमा रामदेवले योग सिकाए जसरी निम्न किसिमका तालीमहरू पनि उद्यमीहरूले लिनु महत्त्वपूर्ण हुन्छ ।

  • लालसलाम भन्दा हात कसरी उठाउने, लात कसरी उज्याउने ?
  • हात मिलाउँदा वा विरोध गर्दा मुट्ठी कसिलो पार्ने कला
  • उद्यमीहरूबीच एकअर्कालाई सम्बोधन गर्दा नामको अगाडि अभिवादन कामरेड ! भन्ने विशेष तरीका
  • विरोधीलाई गाली कसरी गर्ने
  • भाषण गर्दा वा कर्मचारीहरूलाई निर्देशन दिँदा माक्र्सले यस्तो लेख्नुभाथ्यो, लेनिनले त्यस्तो बोल्नुभाथ्यो, माओले उस्तो गर्नुभाथ्यो भनेर कसरी उदाहरण दिने, आदि ।

यदि तपाईंको पनि कुनै उद्यमीसँग जम्काभेट भयो भने बिर्सिएर पनि नमस्ते गर्ने, कुइनो ठोक्ने, अँगालो हाल्ने काम नगर्नु होला । यसो गर्नुभयो भने तपाईं प्रतिगामीमा दरिन सक्नुहुन्छ । त्यसैले नेपाली उद्यमीहरूसँग भेट हुँदा मुट्ठी कसेर अभिवादन कामरेड ! भन्न नबिर्सिनु होला ?

यत्ति गरेपछि अब नेपाली उद्योगले कसो नमार्ला त छलाङ हँ ?

प्रतिक्रिया [0]
प्रतिक्रिया दिनुहोस्