कञ्चनपुरमा पहिलोपटक व्यावसायिक ड्रागनखेती  शुरु   

चैत २२, कञ्चनपुर । जिल्लामै पहिलोपटक भीमदत्त नगरपालिका–९ मटैनामा २ करोड रुपैयाँको लागतमा व्यावसायिक ड्रागन खेती गरिएको छ ।

पूर्व वन अधिकृत रमेशबहादुर चन्द र सञ्चार उद्यमी ज्ञानेन्द्र महताको संयुक्त साझेदारीमा वेष्टर्नमल्टी एग्रिकल्चर एण्ड रिर्सच सेन्टर प्रालि दर्ता गरी व्यावसायिकरूपमा ड्रागनखेती गरिएको हो ।     
     
‘प्रतिबिघा प्रतिवर्ष ३५ हजार रुपैयाँ तिर्ने सम्झौता गरी १० वर्षका लागि जग्गा भाडामा लिएर ड्रागनखेती गरेका छौं’, सञ्चार उद्यमी महताले भने, “विदेशबाट ड्रागनको बीउ ल्याएर खेती गरेका हौं ।’

छ बिघा जग्गामा ३० हजार बिरुवा रोपिएका छन् । ड्रागनका बिरुवा एक पोलमा चार ओटाका दरले रोपिएको छ । बन्दाबन्दीका बेला केही गर्नुपर्छ भन्ने भावनाअनुरूप ड्रागनखेतीमा संलग्न भएको महताले बताए।

ड्रागनखेती गरिएको फार्ममा चार जनाले प्रत्यक्षरूपमा रोजगारी पाएका छन । उनका अनुसार फल लाग्दासम्म ५० जनालाई र फल बजारमा बेच्न तयार भएपछि ३०० जनालाई रोजगारी दिने योजना रहेको छ ।     
     
ड्रागनखेतीका लागि ५० लाख रुपैयाँ शेयर सदस्यबाट र अन्य रकम बैंक तथा वित्तीय संस्थाबाट कर्जा लिई लगानी गरिएको छ । ‘शुरुआतमा धेरै लगानी लागे पनि त्यसको प्रतिफल पाइन्छ’, प्रालिका अध्यक्ष पूर्व वन अधिकृत चन्दले भने, ‘दुई वर्षभित्रै लगानी गरिएको रकम ड्रागनखेतीबाटै उठाउने लक्ष्य लिएका छौं ।’,

ड्रागनखेती अवलोकनका लागि सोही क्षेत्रमा ‘भ्यूटावर’ समेत निर्माण गरिएको छ । सिंचाइका लागि पोखरीसमेत निर्माण गरिएको छ । हालसम्म ३०० भन्दा बढी जनाले ड्रागनखेतीको अवलोकन गरेका छन् । स्वास्थ्यबर्द्धक मानिएको ड्रागनबाट धेरै फाइदा हुने बताइएको छ । रासस

प्रतिक्रिया [0]

प्रतिक्रिया दिनुहोस्