ई –पेपर | विज्ञापन | ग्राहक बन्नुहोस | Podcast | Newbiz
arthik abhiyan
ad banner Apache RTR 200 ABS

घरजग्गा सम्पत्तिको धितोमै अधिक कर्जा प्रवाह

कुल कर्जाको ८७.७८ प्रतिशत सम्पत्ति धितोमा

२०७७ चैत, २५  
समाचार
NA
author avatar अभियान संवाददाता

काठमाडौं । बैंक तथा वित्तीय संस्थाहरूले सबैभन्दा बढी कर्जा सम्पत्तिको धितोमा प्रवाह गरेका छन् । कुल कर्जा प्रवाहको सबैभन्दा बढी अंश स्थिर तथा चालू सम्पत्ति धितो राखेर बैंकहरूले कर्जा दिएको पाइएको छ ।

नेपाल राष्ट्र बैंकको तथ्यांकअनुसार चालू आर्थिक वर्ष (आव) को फागुनसम्ममा कुल कर्जाको ८७ दशमलव ७८ प्रतिशत अंश सम्पत्ति धितोमा प्रवाह भएको छ ।

वाणिज्य बैंक, विकास बैंक र वित्त कम्पनीमार्फत आवको ८ महीनासम्ममा प्रवाहित कुल कर्जा ३८ खर्ब ४६ अर्ब रुपैयाँमध्ये सम्पत्ति धितोमा रू. ३३ खर्ब ७६ अर्बको कर्जा प्रवाह भएको छ । गत आवको फागुनमा कुल कर्जा ३२ खर्ब १३ अर्ब प्रवाह भएको थियो । गत आवको सम्पत्ति धितोमा प्रवाह भएको कर्जाको अंश ८९ दशमलव २९ प्रतिशत थियो । अर्थात् रू. २८ खर्ब ६९ अर्बको कर्जा सम्पत्ति धितोमा प्रवाह भएको थियो । गत आवको तुलनामा चालू आवको फागुनसम्ममा यस्तो कर्जा १७ दशमलव ६७ प्रतिशत थप प्रवाह भएको छ ।

कतिपय देशहरूमा विनाधितो कर्जा प्रवाह हुने भए पनि बढी सुरक्षित हुन सम्पत्तिकै धितो लिएर कर्जा प्रवाह गर्न सहज भएको एनएमबी बैंकका प्रमुख कार्यकारी अधिकृत (सीईओ) सुनील केसी बताउँछन् । ‘बढी कर्जा धितोमै दिएका छौं । अझ घरजग्गा धितो लिन सहज हुन्छ । सम्पत्तिको धितोमा समस्या नआउला भनेर हो । तर, सम्पत्तिको मूल्य घटे बैंकले गरेको भ्यालुएशनमा समस्या आउन सक्छ । यसैले अहिले सम्पत्तिको धितो मात्रै हेरेरभन्दा ऋणीले कर्जा तिर्न सक्ने क्षमता हेर्न पनि जरुरी छ,’ उनले अभियानसँग भने ।

बैंक तथा वित्तीय संस्थाहरूको कर्जा प्रवाहमा धितोको अधिक अंश ओगटेको सम्पत्तिअन्तर्गत पनि घरजग्गा, मेशिनरी तथा उपकरण, फर्निचर तथा फिक्स्चर, सवारीसाधनलगायत धितोमा कर्जा प्रवाह गर्न बैंकहरू बढी इच्छुक भएको तथ्यांकमा देखिन्छ ।

बैंकहरूले चालू सम्पत्ति धितो पनि राख्ने गरेका छन् । यसअन्तर्गत कृषि पैदावार, धानचामल, कच्चपदार्थ, अर्ध तथा पूर्ण तयारी वस्तु, कपडा, नुन, चिनी, तेललगायत वस्तु रहेका छन् ।

बैंकहरूले विभिन्न संस्थाको जमानीमा समेत कर्जा प्रवाह गर्ने गर्छन् । यसमा कुल कर्जाको ४ दशमलव १७ प्रतिशत प्रवाह गरिएको छ । कुल कर्जामा दोस्रो बढी अंश ओगटेको जमानत धितोमा १ खर्ब ६० अर्ब रुपैयाँँ बराबरको कर्जा प्रवाह भएको छ । यसअन्तर्गत सरकारी जमानी, संस्थागत जमानी, व्यक्तिगत जमानी , सामूहिक जमानी, अन्तरराष्ट्रिय श्रेणीकृत विदेशी बैंकलगायतको जमानतमा कर्जा प्रवाह भएको राष्ट्र बैंकले बताएको छ । बैंकमा सुनचाँदी धितो राखेर रू. ४२ अर्ब ५७ करोड बराबरको कर्जा प्रवाह भएको राष्ट्र बैंकले बताएको छ ।

यो कुल कर्जाको १ दशमलव ११ प्रतिशत हो । गत आवको सोही अवधिमा सुनचाँदी धितोमा यस्तो कर्जा ३८ अर्ब ५८ करोड रुपैयाँँ बराबर प्रवाह भएको थियो ।

सरकारी सुरक्षणको तुलनामा गैरसरकारी सुरक्षण पत्रहरूको धितोमा बढी कर्जा प्रवाह भएको छ । ६६ अर्ब ६५ करोड रुपैयाँ बराबरको कर्जा गैरसरकारी सुरक्षण पत्रहरूको धितोमा प्रवाह भएको छ । यो कुल कर्जाको १ दशमलव ७३ प्रतिशत हो ।

सरकारी ऋणपत्रहरूको धितोमा भने ६ करोड ६४ लाख रुपैयाँँ मात्र कर्जा प्रवाह भएको छ । यो कुल कर्जाको शून्य दशमलव शून्य २ प्रतिशत मात्र हो । पछिल्लो समय बैंक तथा वित्तीय संस्थाहरूले जारी गरेका डिवेञ्चरले पनि गैरसरकारी संस्थाहरूको सुरक्षण पत्र धितोको अंश बढी देखिएको हो ।

बैंक तथा वित्तीय संस्थामा निश्चित अवधिका लागि तोकिएको ब्याजदरमा मुद्दती निक्षेपमा राखेका ग्राहकले रकम आवश्यकता पर्दा अवधि परिपक्व नहुँदै आफ्नै मुद्दती धितो राखेर कर्जा लिने बढेका छन् । यसरी मुद्दती रसिद धितो राखेर २४ अर्ब २ करोड ८० लाख रुपैयाँँ कर्जा प्रवाह भएको छ ।

बैंक तथा वित्तीय संस्थाहरूले स्वदेशी बिल, विदेशी बिल, आयात बिल, प्रतीतपत्र, निर्यात बिललगायत बिलको सुरक्षणमा अर्थात् धितोमा ४२ अर्ब ५ करोड २० लाख रुपैयाँँ कर्जा दिएका छन् । यो कुल कर्जाको १ दशमलव शून्य ९ प्रतिशत हो । गत आवको सोही अवधिमा यस्तो बिल धितोमा रू. ३४ अर्ब २७ करोड ९० लाख कर्जा प्रवाह गरेका थिए ।

यस्तै, वाणिज्य बैंकबाट विनाधितो क्रेडिट कार्डमा रू. २ अर्ब ९ करोड १० लाख बराबरको कर्जा प्रवाह भएको छ । विकास बैंक र वित्त कम्पनीले यस्तो कर्जा प्रवाह गरेका छैनन् । विनाधितो भएकाले यस्तो कर्जा अलि असुरक्षित हुने एनएमबी बैंकका सीईओ केसीको भनाइ छ ।

बैंकहरूले तोकिएको शीर्षकबाहेकका अन्य धितोमा करीब रू १ खर्ब ३१ अर्ब कर्जा प्रवाह गरेको केन्द्रीय बैंकको तथ्यांकमा उल्लेख छ ।

कुल कर्जा प्रवाहमा २७ वाणिज्य बैंकको अंश ८८ दशमलव ५९ प्रतिशत रहेको छ । अर्थात, फागुन मसान्तसम्म वाणिज्य बैंकमार्फत धितोमा ३४ खर्ब ७ अर्ब रुपैयाँँ कर्जा प्रवाह भएको छ । १९ ओटा विकास बैंकमार्फत ३ खर्ब ५७ अर्ब रुपैयाँँ कर्जा प्रवाह भएको छ । यस्तै वित्त कम्पनीले यसअवधिमा रू. ८१ अर्ब ९ करोड ९० लाख कर्जा प्रवाह गरेका छन् । यो कुल कर्जा प्रवाहको २ दशमलव ११ प्रतिशत हो ।

समग्रमा कुल कर्जा प्रवाह गत आवको फागुनको तुलनामा चालू आवको फागुनमा १९ दशमलव ७० प्रतिशतले थप वृद्धि भएको छ । यो गत आवभन्दा रू. ६ खर्ब ३२ अर्ब ८७ करोड ५० लाखले बढी हो । कोरोना महामारीबाट समग्र अर्थतन्त्रले क्षति बेहोर्नु परेका बेला पनि यत्तिको कर्जा थपलाई धेरै राम्रो मान्नुपर्ने बैंकरहरू बताउँछन् ।

प्रतिक्रिया [0]
प्रतिक्रिया दिनुहोस्