ई –पेपर | विज्ञापन | ग्राहक बन्नुहोस | Podcast | Newbiz
arthik abhiyan
ad banner Apache RTR 200 ABS

बजार नपाउँदा चितवनमा बारीमै कुहिन थाल्यो गोलभेडा

२०७८ बैशाख, १७  
वाग्मती प्रदेश
Image Not Found
फाइल फोटो
author avatar अभियान संवाददाता

वैशाख १७, चितवन । चितवनमा अन्य तरकारीले मूल्य र बजार पाएपनि गोलभेंडाले भने बजार पाएको छैन ।

उत्पादनमा अत्याधिक वृद्धि भई यसको अनुपातमा विक्री नभएपछि किसानहरु घाटामा परेका छन् । उनीहरुले लागतको आधाभन्दा पनि कम मूल्यमा पनि बजार नपाएको बताएका छन् । 

भरतपुर महानगरपालिका वडा नम्बर २६ का नारायण सापकोटा ढुवानी खर्चसमेत नउठ्ने भएपछि बारीमै गोलभेडा कुहिने गरेको बताउँछन् । ‘एककेजी गोलभेडाको उत्पादन लागत १५ रुपैयाँजति पर्छ, प्रतिकेजी चार रुपैयाँमा बारीबाटनै लैजानुसभन्दा पनि ग्राहक आएनन्’, उनले भने । अहिले बारीमै कुहिएर खेर जानेभएपछि सित्तैमा लैजान अनुरोध गरेको उनले बताए । 

प्रधानमन्त्री कृषि आधुनिकीकरण परियोजनाअन्तर्गत रहेको तरकारी जोनको सञ्चालक समितिका सहसचिव तथा किसान रामचन्द्र रेग्मी गोलभेडाको खेती गरेका किसान बोटबाट टिप्नै छोड्नु पर्ने अवस्थामा पुगेको बताउँछन् ।

‘गोलभेडा बेचेर लागतको कुरा छोडौं, टिप्ने खर्च र बजारसम्म लैजाने ढुवानी खर्च पनि पनि उठ्दैन अनि  गोलभेडा टिपेर के फाईदा ?’, उनले प्रतिप्रश्न गर्दै भने । 
कतिपय किसानले मुश्किलले एक क्रेट गोलभेडालाई १०० देखि २००  रूपैयाँमा बेचिरहेका छन् । त्यसमा प्रतिकिलो आठ रूपैयाँ ६९ पैसा किसानले पाउँछन् । जसका कारण उनीहरु ठूलो नोक्सानमा परेका हुन् । 

‘यस्तो अवस्था आयो भने किसानले अब गोलभेडा लगाउनै छाड्छन् उनले भने, ‘बोडी, घिउसिमी, क्याप्सिकम, बन्दा, मूला, गाजरलगायतका तरकारीको बरु भाउ राम्रो छ ।’ 

यतिबेला भरतपुर महानगर तरकारी बजारमा गोलभेडा प्रतिकिलो मुश्किलले १० देखि  २० रूपैयाँमा विक्री भइरहेको त्यहाँका व्यवसायीहरु बताउँछन् ।
महानगर तरकारी बजारका सञ्चालक एवं फलफूल तथा तरकारी व्यवसायी संघका अध्यक्ष थिरप्रसाद धितालले गोलभेडाको उत्पादन बढी भएको र उत्पादन भएका सबै गोलभेडा एकैचोटि बजारमा आएका कारण भाउ नभएको बताए ।

 ‘गोलभेडा किसान यसपटक साह्रै मर्कामा परे, के गर्नु उत्पादन धेरै भयो’, उनले भने । प्रधानमन्त्री कृषि आधुनिकीकरण परियोजनाका सूचना अधिकारी माधव पौडेलले यसपटकको सिजनमा चितवनमा गोलभेडाको उत्पादन ज्यादा बढी हुनु र मौसमका कारण एकैचोटि पाक्ने अवस्था भएकाले मूल्य नभएको बताए ।

उनले भने, ‘गोलभेडा निश्चित समयमा बेच्नुपर्छ, धेरै दिन टिकाइराख्न सकिन्न, जसका कारण तत्काल बेच्नुपर्ने हुँदा पनि भाउ नभएको हो ।’

तरकारी जोनअन्तर्गत चितवनमा यतिबेला दैनिक ४० टनभन्दा बढी गोलभेडा उत्पादन भइरहेको छ । चितवन जिल्लामा दैनिक तीन टन गोलभेडाले माग पुरा गरेको छ । अन्य गोलभेडा ज्यादै सस्तोमा पोखरा, काठमाडौंलगायतका बजारमा गइरहेको छ ।

गोलभेडाबाहेक अन्य तरकारीको भाउ पछिल्लो एक महीनाको अवधिमा २० देखि ३० प्रतिशतसम्म मूल्य बढेको छ । यतिबेला किसानको बोडी बारीबाटै १२० रूपैयाँसम्म विक्री भइरहेको छ । एक महीनाअघि सो मूल्यमा ३० प्रतिशत कमी थियो । त्यस्तै, अहिले घिउसिमी ११० रूपैयाँ प्रतिकिलोमा किसानको बारीबाटै उठिरहेको छ ।

एक महीनाको बीचमा करेला, खुर्सानी, क्याप्सिकम, मूला, गाजर, बन्दा, काउलीलगायतका तरकारीमा पनि १० देखि १५ प्रतिशतसम्म मूल्य बढेको छ ।
सूचना अधिकारी पौडेलका अनुसार  उत्पादन कम भएका तरकारीहरुको मूल्य बढी हुने र उत्पादन बढी भएको तरकारीको मूल्य कम रहेको पाइएको छ । उनले भने, ‘मूल्य बढेको होइन, उत्पादनको असर हो ।’

प्रतिक्रिया [0]
प्रतिक्रिया दिनुहोस्