ई –पेपर | विज्ञापन | ग्राहक बन्नुहोस | Podcast
arthik abhiyan
Real Dabur NepalApache RTR 200 ABS

गवारो रोगको प्रकोपले धान बालीमा असर

२०७८ भदौ, १५  
समाचार
NA
author avatar प्रशान्त खड्का

काठमाडौं । गवारो रोगको प्रकोपले गर्दा किसानले लगाएको धानबालीमा असर पुगेको छ । रोगको प्रकोप बढ्दै जाँदा धानको गुभो मर्ने र विस्तारै बोट नै मरेर जाने समस्या बढेको किसानहरूले बताएका छन् । रोगको प्रकोप दिनदिनै बढ्दै गए पनि त्यसको उचित व्यवस्थापन र नियन्त्रणका लागि भने सरोकारवाला निकायबाट कुनै पनि पहल हुन सकेको छैन ।

अहिले बारा, पर्सा, रौतहट, सुनसरी, बाँके, बर्दियालगायत दर्जनभन्दा बढी जिल्लामा गवारोको प्रकोप फैलिएको छ । सुनसरीका अगुवा किसान भुवनेश्वर यादवले सुनसरी जिल्लाभरि गवारोको प्रकोपले किसानलाई दुःख दिएको जानकारी दिए । उनका अनुसार सुनसरीमा मात्र करीब ५ सय बिगाहाभन्दा बढी जमीनमा लगाएको धानबालीमा गवारो रोगले असर गरेको छ ।

रोग बढ्दै गए पनि किसानले आवश्यक औषधि पाउन नसकेको गुनासो उनले सुनाए । किसानहरूले कृषि ज्ञान केन्द्रमा आप्mनो समस्या लिएर गएपछि केन्द्रले बजेट अभावका कारण सहयोग गर्न नसकिने भन्दै किसानहरूलाई घर फर्काइदिएको छ ।

यस्तै समस्या अन्य जिल्लामा पनि बढ्दै गएको छ । पर्सा जिल्लामा यस वर्ष धान रोपाइँँ भएको कुल ३५ हजार हेक्टरमध्ये १० प्रतिशत धानबालीमा गवारोले क्षति गरेको छ । त्यसैगरी बर्दिया जिल्लामा समेत यस रोगले किसानलाई दुःख दिएको जानकारी आएको छ । बर्दियाको राजापुर धान सुपर जोनका संयोजक अग्नि अर्यालले करीब २ सय बिगाहाभन्दा बढी धान खेतमा गवारोले असर गरेको हुन सक्ने बताए । शुरूमा धानको गुभोमा असर गर्ने र विस्तारै बोट नै मर्ने भएकाले धानबालीमा यसले व्यापक क्षति गर्न सक्ने भएकाले यसको रोकथाम तथा नियन्त्रणका लागि सम्बद्ध निकालयले पहल थाल्नुपर्ने उनको भनाइ छ ।

पछिल्लो समय रोगको प्रकोप बढ्दै गए पनि राष्ट्रिय किसान आयोगलगायत सरकारले समेत रोगको नियन्त्रणका लागि खासै चासो दिएको देखिँदैन । कृषि तथा पशुपन्छी विकास मन्त्रालय, कृषि विभागले पनि यस विषयमा कतैबाट सूचना प्राप्त नभएकाले रोकथामका लागि काम अघि नबढेको बताएको छ । विभागका सूचना अधिकारी डा. महादेवप्रसाद पौडेलले हालसम्म विभागमा सूचना प्राप्त नभएको र जानकारी आएपछि रोकथामका लागि आवश्यक पहल थालिने बताए ।

राष्ट्रिय किसान आयोगका अध्यक्ष प्रेम दंगालले पनि आयोगमा यस सम्बन्धमा सूचना प्राप्त नभएको र आपूmहरूलाई खबर आएमा समस्यामा परेका किसानहरूलाई आवश्यक सहयोग गर्न आयोग तयार रहेको बताए ।

प्रतिक्रिया [0]
प्रतिक्रिया दिनुहोस्