ई –पेपर | विज्ञापन | ग्राहक बन्नुहोस | Podcast | Newbiz
arthik abhiyan
Real Dabur NepalApache RTR 200 ABS

गोदावरी फूलमा रोग किराको प्रकोप व्यवस्थापन विधि

२०७८ भदौ, २५  
अभियान परिशिष्ट (सप्लिमेन्ट)
Chelsea International Image Not Found
author avatar प्रशान्त खड्का

काठमाडौं । गोदावरी फूलबाट चाहेअनुरूप आम्दानी लिन विभिन्न प्रकारका रोग तथा किराको प्रकोपबाट बिरुवालाई जोगाउनैपर्छ । त्यसैले त्यसमा लाग्ने रोग तथा किराबारे आवश्यक जानकारी राख्न जरुरी छ ।

गोदावरी फूलमा लाग्ने मुख्य किरा थ्रिप्स, लाही र लिफ माइनर हुन् भने ढुसीजन्य रोग सेतो रस्ट, पातथोप्ले, पाउडरी मिल्ड्यु र फ्युजारीएम मुख्य रोग हुन् । वरिष्ठ बागवानी विकास अधिकृत अनिलकुमार आचार्यका अनुसार नेपाली बजारमा उपलब्ध विषादी र विज्ञहरूको सुझावका आधारमा गोदावरी फूलमा आइपर्ने यस्ता समस्या समाधान गर्न सकिन्छ ।

थ्रिप्स
यस किराको समस्याले  फूलका गुच्छामा सेतो दाग वा धर्सा पारिदिने, फूललाई सेतो बनाइदिने, पातमा खैरो थोप्ला पर्नेजस्ता लक्षण देखा पर्छन् । यसलाई नियन्त्रण गर्न प्राइड शून्य दशमलव ४ लिटर पानीमा वा रोगर २ एमएल प्रतिलिटका दरले पानीमा मिसाई प्रयोग गर्न सकिन्छ ।

लाही
यसले विशेषगरी बिरुवाको कोपिला, नयाँ पालुवा र पातमा आक्रमण गर्दछ । ती स्थानमा यो किराले एक किसिमको चोप उत्पादन गर्दछ । यसले गर्दा ढुसीका जीवाणुको समेत प्रकोप बढ्न जान्छ । यसको व्यवस्थापन किटनाशक विषादीबाट सहजै गर्न सकिन्छ ।

लिफ माइनर
यस किराको लार्भा माटोमा बसेर पातमा सेता सुरुङ पारिदिन्छ, जसले गर्दा पातमा सेता दाग देखिन्छन् । १ एमएल क्लोरोफाइरिस प्रतिलिटरका दरले पानीमा मिश्रण बनाई माटोमा छर्ने र सम्पर्क किटनाशक विषादी बोटमा स्प्रे गर्दा यो समस्यालाई व्यवस्थापन गर्न सकिन्छ ।

फ्युजेरियम
गोदावरीको पातको डाँठ काटेर हेर्दा भित्री भाग कालो देखियो भने यो रोग लागेको थाहा पाउनुपर्दछ । यस रोगलाई व्यवस्थापन गर्न ट्राइकोडमा ३ देखि ५ ग्राम प्रतिलिटर पानीमा मिसाई प्रतिबोट ३० देखि ४० एमएल पर्ने गरी ड्रेन्चिङ गर्नुपर्दछ ।

पाउडरी मिल्ड्यु
ढुसीबाट लाग्ने यो रोगले नेपाली फूल किसानलाई सबैभन्दा बढी सताएको हुन्छ । नयाँ पात, कोपिला र डाँठको सतहमा खरानीजस्तो सेतो धुलो देखापरे यो रोग लागेको थाहा पाउनुपर्दछ । यससँगै पात झर्ने र कोपिला फक्रन नसक्ने हुन्छ । वर्षैभरि जुनसुकै समय पनि यस रोगले आक्रमण गर्दछ ।

यो रोगबाट फूललाई छुटकारा दिन ग्रीनहाउसमा दिनको समय आद्रता बढी राख्ने र रातीको समय कम राख्नुपर्दछ । रोग लागेका डाँठ र पात नष्ट गर्न सरसफाइका विधि अपनाउनुपर्दछ । धुलेढुसी नियन्त्रण गर्न उपयुक्त हुने ढुसी नाशक विषादी प्रयोग गर्न सकिन्छ । यद्यपि सुरक्षाका लागि रासायनिक उपचारलाई अन्तिम अस्त्रको रूपमा प्रयोग गर्नुपर्ने विज्ञहरू सुझाउँछन् ।

सेतोरस्ट
पातको दुवै साइडमा सेतो थोपा देखा परेर विस्तारै बढ्दै गए यो रोग लागेको थाहा पाउनुपर्दछ । यो रोग लागे बिरुवाको खाना बनाउने प्रक्रियामा असर पर्दछ र बोट विस्तारै कमजोर बन्दै मर्ने गर्दछ । यो रोग फंगसको कारणबाट हुने हुँदा रोगको प्रकोप हुन सक्ने अवस्थाअगावै फंगिसाइड दिनु रोकथामको उपाय हो । साथै, रोगको संकेत देखिनासाथ फंगिसाइड १ सय मिटर स्क्वायर क्षेत्रमा ५ ग्रामका दरले अक्सी कार्बोसिम स्प्रे गर्न सकिन्छ ।

पात थोप्ले
वसन्त ऋतु तथा गर्मीयाममा यो रोगले बिरुवालाई आक्रमण गर्दछ । पहेंलोले घेरिएका गोलो कालो थोप्ला भएको लक्षण पातमा देखिएर बिरुवाको बढ्ने क्रम रोकिनुका साथै न्यून गुणस्तरको फूल फुल्दछ । यो रोगबाट फूललाई जोगाउन रोग लागेका डाँठ हटाउने र नष्ट गर्नुपर्दछ भने दिनको उत्तरार्द्धमा पातलाई सुक्खा राख्नुपर्दछ ।

प्रतिक्रिया [0]
प्रतिक्रिया दिनुहोस्