ई –पेपर | विज्ञापन | ग्राहक बन्नुहोस | Podcast
arthik abhiyan
Real Dabur NepalApache RTR 200 ABS

प्रतिस्थापन बजेट कार्यान्वयन कार्यविधिको काम यथाशिघ्र टुंग्याउन अर्थमन्त्रीद्वारा निर्देशन  

२०७८ असोज, ११  
समाचार
Image Not Found
author avatar अभियान संवाददाता

असोज ११, काठमाडौं। अर्थमन्त्री जनार्दन शर्माले प्रतिस्थापन बजेट कार्यान्वयन गर्न आवश्यक कार्यविधि निर्माणको काम यथाशिघ्र सक्न निर्देशन दिएका छन् ।

प्रतिस्थापन बजेट कार्यान्वयनका विषयमा मन्त्रालयका सचिवहरु बीच सोमवार अर्थ मन्त्रालयमा आयोजित छलफलमा कार्यविधि निर्माणको काम एक साताभित्र सक्न उनले यस्तो निर्देशन दिएका हुन् । प्रतिस्थापन बजेटमा राखिएका नयाँ कार्यक्रम तथा अघिल्लो बजेटका निरन्तरताका आयोजनाहरुको प्रभावकारी कार्यान्वयन गर्ने विषयमा छलफल भएको मन्त्रालयले बताएको छ ।


बैठकले बजेटमा विकासका आयोजना कार्यान्वयन गरी पूँजीगत खर्च बढाउन मासिक कार्य प्रतिशत निर्धारण गर्ने, कार्यविधि तयार गर्नुपर्ने विषयहरुमा तत्काल कार्य सम्पन्न गर्ने, अन्तरमन्त्रालय समन्वय गरी निर्णय गर्नुपर्ने विषयलाई यथाशिघ्र अघि बढाउने लगायत निर्णय गरेको छ ।

कार्यक्रममा अर्थमन्त्री शर्माले आ–आफ्नो जिम्मामा परेका कामहरुको सूची तयार गरी मासिक कार्य प्रतिशतका आधारमा तत्काल कार्ययोजना बनाउन पनि सचिवहरुलाई निर्देशन दिएका छन्।

बजेट कार्यान्वयन र पूँजीगत खर्चका सम्बन्धमा अर्थ मन्त्रालयबाट सम्पादन हुने कार्यहरुमा कुनै ढिलाई नहुने प्रतिवद्धता समेत उनले व्यक्त गरे । मन्त्री शर्माले अर्थ मन्त्रालयमा आएका कार्यविधि निर्माण सम्बन्धी पुराना फाइल सात दिनभित्र र अब प्राप्त हुने नयाँ फाइल तीन दिनभित्र टुंगो लगाउने गरी तीब्र गतिमा काम गर्न पनि निर्देशन दिएका छन् ।

कार्यक्रममा राष्ट्रिय योजना आयोगका उपाध्यक्ष डा विश्वनाथ पौडेलले प्रतिस्थापन बजेटले निर्धारण गरेको ७ प्रतिशत आर्थिक वृद्धिको लक्ष्य हासिल गर्न सबै मन्त्रालयहरुले धेरै नै मेहेनत गर्नुपर्ने बताए ।

अर्थसचिव मधु कुमार मरासिनीले गठबन्धन सरकारको न्यूनतम साझा नीति कार्यक्रमअनुसार आएको प्रतिस्थापन बजेट कार्यान्वयनलाई प्रभावकारी बनाउन मासिक कार्ययोजना बनाएर तत्काल काम थाल्नु पर्नेमा जोड दिएका थिए ।

प्रतिक्रिया [0]
प्रतिक्रिया दिनुहोस्