ई –पेपर | विज्ञापन | ग्राहक बन्नुहोस | Podcast
arthik abhiyan
Real Dabur NepalApache RTR 200 ABS

पूर्वका उद्योगीको दशैं स्वदेशमै : आन्तरिक पर्यटकीय क्षेत्रमा घुमघाम र परिवारसँग जमघट

२०७८ असोज, २२  
अभियान परिशिष्ट (सप्लिमेन्ट)
NA
author avatar वेदराज पौडेल

कोभिड–१९ महामारी हुनु पहिलेका वर्षमा दशैं छुट्टी मनाउन सुनसरी मोरङ औद्योगिक कोरिडोरका उद्योगीहरू यतिबेला विदेशतिर उडिसकेका हुन्थे । दशैंअघि नै आफूले घुम्ने देशको तालिका तयार गरेर दशैंको छुट्टी शुरू हुनासाथ यात्रामा निस्कन्थे । तर, कोभिडका कारण यो पटकको दशैंमा भने उद्योगीले विदेश यात्रा नगर्ने भएका छन् ।

स्वदेशमै परिवारसँग बसेर मीठो परिकार खाने र आन्तरिक पर्यटनको प्रवद्र्धनका लागि मुलुकभित्रकै पर्यटकीय स्थल पुगेर रमाउने योजना बनाएका छन् ।

नेपाल उद्योग वाणिज्य महासंघका केन्द्रीय सदस्य तथा प्रदेश उपाध्यक्ष राजेन्द्र राउत घरपरिवारसँग बसेर रमाइलो गरेरै दशैं मनाउने योजनामा छन् । उनले अघिल्ला वर्षमा बाबुआमासँग आशीर्वाद लिएर मनाउने गरे पनि बाबुआमा स्वर्ग भएपछि छोराबुहारी र परिवारका अन्य सदस्यसँग दशैं मनाउने अनि मुलुकभित्रकै पर्यटकीय क्षेत्रमा घुमघाम गर्ने योजना बनाएका छन् ।

घरमा घटस्थापना गरेर बडादशैंमा दुर्गा माताको उपासना गर्न परम्परालाई निरन्तरता दिन पनि वैदेशिक भ्रमणमा कहिल्यै नजाने गरेको उनले सुनाए । स्वदेशमै बसेर चाडवाड मनाउने गरेको उनको धारणा छ ।

उद्योग परिसंघका प्रदेश १ अध्यक्ष भीम घिमिरे यो पटक परिवारसहित सुनसरीको चक्रघट्टीमा रहेको आफ्नो घर गएर पुराना साथीभाइ भेटघाट गरी दशैं मनाउने योजनामा छन् । अघिल्ला वर्षमा उनी अमेरिकालगायत मुलुक घुमेर दशैं बिदाको सदुपयोग गर्थे । यसपटक भने आन्तरिक पर्यटनको विकासका लागि घुमघाम गर्ने योजना बुनेका छन् । फुर्सदमा भान्सामा पसेर मीठो परिकार पकाउने शौखका उनी यो पटक घरपरिवारलाई नयाँ–नयाँ परिकार बनाएर खुवाउने योजनामा छन् ।

मोरङ व्यापार संघका अध्यक्ष प्रकाश मुन्दडा यसअघि दशैंको लामो छुट्टीमा विदेशतिर घुमघाममा रमाउँथे । तर, यसपालि कोरोना कहरका कारण उनले नेपालमै विराटनगर र काठमाडौंमा परिवारसँग बसेर दशैं मनाउने योजना बनाएका छन् । नवरात्रिको शुरुआतमा घरमा घटस्थापना गरेर परिवारसहित दैनिक माता दुर्गाको उपासना गर्ने र दशमीको दिन दुर्गा विसर्जन गरी परिवारका साथ रमाइलो गर्ने योजना उनको छ । यस पटक परिवारका साथ ताप्लेजुङमा रहेको पाथीभरा माताको मन्दिरमा दर्शन गर्न जाने योजना रहेको मुन्दडा बताउँछन् ।

त्यस्तै, उद्योग संगठन मोरङका अध्यक्ष सुयशराज प्याकुरेलले यसपटकको आफ्नो दशैं छुट्टीलाई पोखरा, घान्द्रुकलगायत पर्यटकीय क्षेत्रमा गएर पैदल यात्रा गर्ने योजना बनाएका छन् । उनले बाहिरबाट आफ्नो माइलो भाइ शिरज प्याकुरेलसमेत दशैैं मनाउन आउने भएकाले परिवारका अन्य सदस्यसहित नेपालभित्रकै पर्यटकीय क्षेत्र घुम्ने र अवलोकन गर्ने योजना बनाएका छन् । आफ्ना नानीबाबुसमेतलाई पर्यटकीय क्षेत्र, ग्रामीण परिवेशबारे जानकारी गराउने उद्देश्य उनले राखेका छन । उनी भन्छन्, ‘कोभिडको कहर सकिएको छैन । पर्यटकीय क्षेत्र थला परेको अवस्थामा कम्तीमा आन्तरिक रूपमा गरिने घुमघामले पर्यटन क्षेत्रलाई थोरै भए पनि राहत हुन्छ । त्यसैले सबैले यो दशैंमा परिवारसहित आन्तरिक पर्यटन गरौं ।’ विराट व्यापार संघ अध्यक्ष सुजन थापा भर्खरै भारत भ्रमण सकेर आएका हुन् । उनी पनि यो पटक आफ्नै घरपरिवारसँग दशैं मनाउने योजनामा छन् । परिवारसँग रमाइलो गर्ने र घरपरिवारसँग यो पटकको दशैं मनाउने योजना रहेको उनले सुनाए ।

कोरोनाका कारण सबैमा एक किसिमको त्रास व्याप्त रहेको र केही समयदेखि नेपालमा महामारीको प्रभाव घटिरहेकाले सजग हुँदै दशैं मनाउने उनले सबैलाई आग्रह गरे ।

प्रतिक्रिया [0]
प्रतिक्रिया दिनुहोस्