ई –पेपर | विज्ञापन | ग्राहक बन्नुहोस | Podcast
arthik abhiyan
Real Dabur NepalApache RTR 200 ABS

अमेरिका र चीनका व्यापार प्रतिनिधि बीच अन्याय मानेका व्यावसायिक अभ्यासबारे छलफल      

२०७८ असोज, २३  
अन्तरराष्ट्रिय
Image Not Found

असोज २३,  वासिङटन । अमेरिका र चीनका प्रमुख व्यापार प्रतिनिधि बीच वार्ता  भएको छ । 

अमेरिकी व्यापार प्रतिनिधि क्याथरिन ताई र चिनियाँ उपप्रधानमन्त्री लिउ हे बीच वासिङ्टनले आफूमाथि अन्याय मानेका चिनियाँ व्यावसायिक अभ्यासबारे छलफल भएको हो ।
     
अमेरिकी पूर्व राष्ट्रपति डोनाल्ड ट्रम्पको नेतृत्वमा सम्बन्ध बिग्रिएपछि विश्वका दुई ठूला अर्थतन्त्रका मुख्य व्यापार प्रतिनिधि बीच भएको यो दोस्रो परामर्श हो । यी दुई अधिकारी बीच यस पहिले गत मे महीनामा पनि दुई देश बीचको व्यापार सम्बन्धबारे छलफल भएको थियो ।     
     
अमेरिकी व्यापार प्रतिनिधिले शुक्रवार जारी वक्तव्यमा उनीहरूबीचको सौहार्द आदानप्रदानका क्रममा राजदूत ताई र उपप्रधानमन्त्री लिउले द्विपक्षीय व्यापार सम्बन्धको महत्व र यसले संयुक्त राज्य अमेरिका र चीनलाई मात्र नभई विश्व अर्थतन्त्रमा समेत पारेको प्रभावलाई मनन गरेको उल्लेख छ ।     
     
चिनियाँ समाचार संस्था सिन्ह्वाले पनि दुई पक्षले ‘व्यावहारिक र रचनात्मक कुराकानीलाई सौहार्दपूर्ण वातावरणमा आदान–प्रदान गरेको आफ्नो समाचारमा उल्लेख गरेको छ । वार्तामा दुवै पक्षले आफ्नो मुख्य चिन्ता व्यक्त गरेका र परामर्शद्वारा एकअर्काको वैध चिन्ताहरू समाधान गर्न सहमत भएका पनि सिन्ह्वाले उल्लेख गरेको छ ।     
     
शुक्रवारको छलफल ‘संयुक्त राज्य अमेरिका र चीनको लागि जिम्मेवाररूपमा व्यवस्थापन गरिएको व्यापारिक सम्बन्ध निर्माण गर्ने प्रतिबद्धता गर्ने अवसर रहेको एक अमेरिकी अधिकारीले नाम उल्लेख नगर्ने शर्तमा बताएका छन् ।     
     
चिनियाँ पक्षको ‘गैर–बजार नीति र अभ्यास’ ले अमेरिकी श्रमिक, किसान र व्यवसायलाई हानि पुर्‍याएको अमेरिकी बुझाई रहेको ताईको भनाइ छ ।     
     
बाइडेन प्रशासनका अनुसार राष्ट्रिय कम्पनीहरूका लागि चीनले आफ्ना उद्यमीहरूलाई उपलब्ध गराएको बृहत् सरकारी अनुदान, बौद्धिक सम्पत्ति चोरी र अन्य कारकहरूले व्यापारिक जगतमा अत्यधिक असमानता पैदा गरेको देखिएको छ ।     
     
वासिङ्टनले ‘अन्यायपूर्ण’ ठानेका व्यापारिक अभ्यासलाई उद्धृत गर्दै सन् २०१८ मा ३७० अर्ब डलर मूल्यका चिनियाँ उत्पादनमा कर लगाउने निर्णय तत्कालिन अमेरिकी राष्ट्रपति डोनाल्ड ट्रम्पले गरेका थिए। तर धेरै अमेरिकी कम्पनीहरूले ट्रम्प प्रशासनकोे उक्त कदमले लागत बढाएको भन्दै थप कर लिने निर्णयको विरोध गरेका थिए ।     
     
यसै वर्षको जनवरीमा कार्यभार सम्हालेका बाइडेनले ताईलाई चीनप्रति अमेरिकी व्यापार रणनीति र ट्रम्पले शुरु गरेको करको विस्तृत समीक्षा गर्न आग्रह गरेका छन् ।यस हप्ता ताईले ‘लक्षित शुल्क रोक्ने प्रक्रिया’ को थालनी गर्ने घोषणा गरेका थिए। ताईले चीनलाई आपूर्तिको वैकल्पिक स्रोत नभएका अमेरिकी कम्पनीहरूलाई ‘क्रमवद्धरूपमा छूट प्रदान गर्ने कुरा पनि बताएका थिए।     
     
अमेरिकी व्यापार वार्ता टोलीले चीनको अमेरिकी सामानमाथिको कर नीतिको बारेमा सार्वजनिकरूपमा जानकारी गराउने कुरा बताएको छ । यो प्रक्रियालाई अक्टोबर १२ देखि डिसेम्बर १ सम्म चलाउने र यूएसटीआरले रोजगार, आपूर्ति श्रृंखला र चीनप्रति यसको समग्र नीति लगायतका कारकहरूमा थप कर र सामान बहिष्कारको प्रभावलाई तौलने कुरा बताएको छ ।     
     
शुक्रवार ताईले अमेरिकी हितको सर्वोत्तम सेवा गर्ने नीति पछ्याउने बाइडनको लक्ष्यलाई दोहोर्‍याएका थिए । रासस/  एएफपी

प्रतिक्रिया [0]
प्रतिक्रिया दिनुहोस्