ई –पेपर | विज्ञापन | ग्राहक बन्नुहोस | Podcast
arthik abhiyan
Apache RTR 200 ABS

बाढीपहिरो पीडितका लागि चाँडै मन्त्रिपरिषदबाट राहतको व्यवस्था हुन्छ : प्रम देउवा

२०७८ कार्तिक, ७  
प्रदेश ०१
Image Not Found

कात्तिक ७, इलाम । प्रधानमन्त्री शेरबहादुर देउवाले बाढीपहिरो पीडितका लागि थप राहतको व्यवस्था गर्ने बताउनुभएको छ । 

इलाम र पाँचथरको बाढीपहिरो प्रभावित क्षेत्रको निरीक्षणपछि पाँचथरको फाल्गुनन्द गाउँपालिकाको जलसिङ माविमा आयोजित कार्यक्रममा उहाँले चाँडै मन्त्रिपरिषद्को बैठक राखेर राहतसम्बन्धी थप निर्णय लिने बताउनुभएको हो । 

उहाँले सरकारले यसअघि नै मृतकका परिवारलाई रू. दुई लाख राहत उपलब्ध गराउने निर्णय गरिसकेको स्मरण गर्दै सरकारले थप राहतको व्यवस्था गर्ने घोषणा गर्नुभएको हो । उहाँले भन्नुभयो, ‘पहिरोले घर बनाउने ठाउँ नहुनेलाई जग्गा जमिन दिएर भए पनि घर बनाइदिने र घर भत्किएकालाई घर बनाउन मद्दत गर्छौं, हामीले स्थलगतरुपमा नै अध्ययन गरेका छौँ, भएको क्षति नोक्सानीको सरकारले मूल्यांकन गरेर क्याबिनेट बसेर निर्णय लिन्छौँ ।’

प्रधानमन्त्री देउवाले बेमौसममा परेको पानीले मेचीदेखि महाकालीसम्म ठूलो क्षति पुर्‍याएको जनाउँदै सरकार पीडितको साथमा रहेको बताउनुभयो । पहिरोपीडितलाई सम्बोधन गर्दै उहाँले भन्नुभयो, ‘हामी तपाईहरुको साथमा छौँ, त्यही भएर हामी आएका हौँ ।’

उहाँले बाढीपहिराबाट प्रभावित क्षेत्रका नागरिकलाई एकै ठाउँमा बसोबास गर्ने व्यवस्था मिलाउने वा नयाँ सहर बनाउने विषयमा समेत सोचिरहेको बताउनुभयो ।

उहाँले भन्नुभयो, ‘नेपाल गाउँको देश हो, नेपालबाट गाउँ हटाउन सकिँदैन, धेरैलाई गाउँको माया छ गाउँ छाड्न सक्दैनन्, गाउँमा गर्न सकिने कुरा गाउँमा नै पुर्‍याउन सकिन्छ ।’

यसैगरी नेपाली कांग्रेसका सभापतिसमेत रहनुभएका उहाँले पार्टीको महाधिवेशन तोकिएकै मितिमा हुने बताउनुभयो । कांग्रेस कार्यकर्तालाई छुट्टै सम्बोधन गर्नुभएका देउवाले भन्नुभयो, ‘दुई चार दिन यताउता हुनु सामान्य कुरा हो, महाधिवेशन तोकिएकै मितिमा हुन्छ ।’ देउवाले सहमतिमा नै नेतृत्व चयनको प्रयत्न गर्न कार्यकर्तालाई निर्देशनसमेत दिनुभयो । 

‘भरसक सहमतिमा नै गर्नुहोस्, सहमति नभए प्रतिष्पर्धा हुन्छ, हार्नेले जित्नेलाई सघाउने हो’, उहाँले भन्नुभयो । निरीक्षणका लागि सूचना तथा सञ्चार प्रविधिमन्त्री ज्ञानेन्द्रबहादुर कार्की, ऊर्जा तथा जलस्रोतमन्त्री पम्फा भुसाललगायत सहभागी हुनुहुन्थ्यो । रासस

प्रतिक्रिया [0]
प्रतिक्रिया दिनुहोस्