ई –पेपर | विज्ञापन | ग्राहक बन्नुहोस | Podcast |
arthik abhiyan
Tvs Raider

पर्यटकीय स्थल बन्दै तिलेश्वर नाथ

२०७८ माघ, १३  
मधेश प्रदेश
NA
author avatar दिपेश पौडेल

रौतहट । रौतहटको तिलेश्वर नाथ सामुदायिक वनलाई धार्मिक तथा पर्यटकीय स्थल बनाउने उद्देश्यले संरचनाहरू निर्माण गर्न थालिएको छ । नेपाल सरकार पर्यटन मन्त्रालय र चन्द्रपुर नगरपालिकाको आर्थिक सहयोगमा भौतिक संरचना निर्माण गर्न थालिएको हो ।

चन्द्रपुर नगरपालिका वडा नं. ३ मा रहेको तिलेश्वर नाथ सामुदायिक वन क्षेत्रमा तिलेश्वर नाथ पर्यटकीय क्षेत्र निर्माण गर्न लागिएको सामुदायिक वन उपभोक्ता समितिका अध्यक्ष राजु धामीले बताए । उनका अनुसार करीब सात करोडको लागतमा सो स्थानमा नमूना पर्यटकीय स्थल बन्नेछ । वन विभाग र वन उपभोक्ता समूहको आर्थिक सहयोगमा बाल उद्यान निर्माण भइरहेको छ । अहिले सो क्षेत्रमा बाल उद्यानसहित फूलबारी लगायतका संरचना बनाउने काम भएको छ ।

पार्क तथा पर्यटकीय स्थलको काम २०८९ सालसम्ममा काम सम्पन्न गर्ने लक्ष्य रहेको अध्यक्ष धामीले बताए । पौडी पोखरी, तिलेश्वर मन्दिर, वनभोज स्थल, बाटो, बगैंचा, फूलबारी, भ्यू टावर, नजिक रहेको चाँदी खोलामा झोलुङे पुलका साथै संग्रहालयको संरचना समेत निर्माण गरिने उनले बताए । चिडियाखाना बनाउने योजना पनि सो सामुदायिक वनले अघि बढाएको उनले बताए । घुम्न आउनेहरूका लागि सुविधायुक्त खाजाघर, खानेपानी, बिजुली बत्ती, सडक बनाइने उनको भनाइ छ ।

प्रदेशकै उत्कृष्ट पर्यटकीय गन्तव्यको रूपमा विकास गर्ने लक्ष्य तिलेश्वर नाथ सामुदायिक वन उपभोक्ता समितिका पदधिकारीको छ । समितिका कोषाध्यक्ष भुनेश्वर गुरोका अनुसार धार्मिक तथा पर्यटकीय दृष्टिकोणले यस क्षेत्र महत्त्वपूर्ण रहेको बताए । निर्माणकै क्रममा यहाँ घुम्न तथा वनभोजका लागि आउनेको संख्या बढेको उनको भनाइ छ । सो पर्यटकीय स्थल चन्द्रपुर चोकबाट करीब ४ किलोमिटर उत्तर गैडाटार टोलबाट पश्चिमतर्फ चाँदीखोला किनारमा पर्छ ।

 

Aarthik Abhiyan Viber Community
प्रतिक्रिया [0]

   

Riddhi Siddhi Cement