ई –पेपर | विज्ञापन | ग्राहक बन्नुहोस | Podcast |
arthik abhiyan
Tvs Raider

बैंकमा पैसा राख्नेमा लुम्बिनी प्रदेशका कुन जिल्लाका नागरिक अगाडि ?    

२०७९ असार, २०  
समाचार
Image Not Found

असार २०, काठमाडौं । बैंक तथा वित्तीय संस्थामा सबैभन्दा कम निक्षेप राख्ने जिल्लाका रुपमा रुकुमपूर्व देखिएको छ । आर्थिक विकासमा पछाडि परेको कान्छो जिल्लाका रुपमा रहेको सो जिल्लाको कुल निक्षेप शून्य दशमलव २३ प्रतिशत मात्रै रहेको छ ।     
     
 नेपाल राष्ट्र बैंकले हालै सार्वजनिक गरेको चालू आर्थिक वर्षको लुम्बिनी प्रदेशको आर्थिक विवरणअनुसार सो जिल्लाका नागरिकले मात्रै ९३ करोड ७३ लाख रुपैयाँ बराबरको रकम मात्रै बैंक तथा वित्तीय संस्थामा निक्षेपका रुपमा राखेको पाइएको छ । 

 केन्द्रीय बैंकले सात ओटै प्रदेशको आर्थिक अवस्थाका बारेमा नियमित विवरण सार्वजनिक गर्दै आएको छ । सोही क्रममा पछिल्लो पटक लुम्बिनी प्रदेशको विवरणसमेत प्रकाशित गरेको छ ।          
 बैंकका अनुसार बैंक तथा वित्तीय संस्थाले संकलन गरेको कुल निक्षेप गत वर्षको तुलनामा न्यूनरुपमा मात्रै वृद्धि भएको छ । कुल ४ खर्ब २ अर्ब ८३ करोड ७६ लाख रुपैयाँ बराबरको निक्षेप सो प्रदेशभित्र रहेको पाइएको छ । विसं २०७८ असारको तुलनामा ९ प्रतिशतले निक्षेप बढेको छ ।     
     
 रुपन्देहीको हिस्सा सबैभन्दा बढी रहेको पाइएको छ । केन्द्रीय बैंकको विवरणअनुसार कुल ४४ दशमलव ४८ प्रतिशत बराबरको हिस्सा सो जिल्लाको छ ।  बुटवल, भैरहवालगायतका क्षेत्रमा औद्योगिक विकास भएको, गौतमबुद्ध विमानस्थलसमेत सञ्चालनमा आएको, उद्योग व्यवसाय विस्तार भएकाले सो जिल्लाका नागरिकको कमाई पनि बढ्दो छ । सोही कारणले गर्दा त्यस जिल्लाका नागरिकले बैंक तथा वित्तीय संस्थामा बढीमात्रामा निक्षेप जम्मा गरेका छन् ।     
     
 विवरणअनुसार सो जिल्लाका नागरिकले १ खर्ब ७९ अर्ब १८ करोड ७ लाख ८० हजार रुपैयाँ बराबरको निक्षेप बैंक तथा वित्तीय संस्थामा राखेका छन् । बाँके जिल्लाको १२ दशमलव २७ प्रतिशत बराबरको हिस्सा रहेको छ । त्यो भनेको कुल ४९ अर्ब ४१ करोड ४५ लाख २० हजार रुपैयाँ बराबर हो ।

दाङ जिल्ला आर्थिकरुपमा विकासको गतिमा अगाडि बढेको भए पनि त्यहाँका नागरिकले बैंक तथा वित्तीय संस्थामा राखेको निक्षेप भने कमै देखिएको छ । केन्द्रीय बैंकको विवरणअनुसार सो जिल्लाको हिस्सा मात्रै १० दशमलव ८१ प्रतिशत बराबर छ । त्यो भनेको कुल ४३ अर्ब ५३ करोड ११ लाख ८० हजार रुपैयाँ  बराबर रहेको छ ।   

केन्द्रीय बैंकको विवरणअनुसार कपिलवस्तुको हिस्सा ६ दशमलव ३२ प्रतिशत रहेको छ । सो जिल्लाका नागरिकले २५ अर्ब ४४ करोड ३० लाख ४० हजार रुपैयाँ बराबरको निक्षेप बैंक तथा वित्तीय संस्थामा राखेका छन् । लुम्बिनी प्रदेशको पाल्पाको हिस्सा ५ दशमलव ७३ प्रतिशत मात्रै छ । त्यो भनेको कुल २३ अर्ब ८ करोड ९१ लाख ५० हजार रुपैयाँ बराबरको निक्षेप पाल्पावासीले बैंक तथा वित्तीय संस्थामा राखेका छन् ।     
 

नवलपरासी पश्चिमको हिस्सा ५ दशमलव ५० प्रतिशत अर्थात् २२ अर्ब १३ करोड ८० लाख ४० हजार रुपैयाँ बराबरको रकम निक्षेपका रुपमा बैंक तथा वित्तीय संस्थामा राखेका छन् ।  यसैगरी गुल्मीको हिस्सा ५ दशमलव २९ प्रतिशत रहेको छ । त्यस जिल्लाका नागरिकले बैंक तथा वित्तीय संस्थामा २१ अर्ब ३० करोड ७९ लाख १० हजार रुपैयाँ बराबरको रकम निक्षेपका रुपमा राखेका छन् ।     

कम निक्षेप राख्ने जिल्लामा क्रमशः अर्घाखाँची, बर्दिया, प्यूठान र रोल्पा रहेको केन्द्रीय बैंकको अध्ययनले देखाएको छ । अर्घाखाँचीको हिस्सा १२ अर्ब ५४ करोड ८६ लाख ३० हजार रुपैयाँ  अर्थात् ३ दशमलव १२ प्रतिशत बराबरको निक्षेप राखेका छन् । बर्दियाको १२ अर्ब ८७ करोड ७४ लाख ७९ हजार रुपैयाँ अर्थात् ३ दशमलव २० प्रतिशत बराबर रकम मात्रै निक्षेपका रुपमा बैंक तथा वित्तीय संस्थामा जम्मा गरेका छन् ।     
     
 प्यूठानको ७ अर्ब ७६ करोड ६६ लाख ३० हजार रुपैयाँ अर्थात् १ दशमलव ९३ प्रतिशत, रोल्पाको ४ अर्ब ६० करोड ५६ लाख ७० हजार रुपैयाँ अर्थात् १ दशमलव १४ प्रतिशत बराबरको रकम मात्रै निक्षेपका रुपमा बैंक तथा वित्तीय संस्थामा राखिएको छ । ऋण लिनेमा पनि रुपन्देहीका नागरिक नै अग्रस्थानमा छन् । सो जिल्लामा मात्रै प्रदेशको कुल १२ जिल्लामध्ये सबैभन्दा बढी ऋण लिएको पाइएको छ ।

केन्द्रीय बैंकको अध्ययनअनुसार सो जिल्लामा मात्रै ५० दशमलव १० प्रतिशत बराबरको ऋण लगानी भएको छ । सो जिल्लामा २ खर्ब ६९ अर्ब १४ करोड १२ लाख १० हजार रुपैयाँ बराबरको ऋण लगानी भएको छ । दाङमा ६४ अर्ब २१ करोड ७९ लाख ७० हजार रुपैयाँ, बाँकेमा ८९ अर्ब ८२ करोड ३ लाख ७० हजार रुपैयाँ, बर्दियामा १६ अर्ब ४६ करोड ४३ लाख ३० हजार रुपैयाँ बराबरको ऋण लगानी भएको छ ।     
     
 निक्षेपसमेत कम राखेको रुकुमपूर्वमा बैैंक तथा वित्तीय संस्थाको लगानी ६८ करोड ९० लाख ७ हजार रुपैयाँ बराबर रहेको छ । प्रदेशगतरुपमा हेर्दा बैंक तथा वित्तीय संस्थाले शून्य दशमलव १३ प्रतिशत बराबरको रकम मात्रै ऋणका रुपमा लगानी गरेको पाइएको छ । प्रदेशभर नै ४ खर्ब २ अर्ब ८३ करोड ७६ लाख रुपैयाँ  बराबरको निक्षेप उठाएका बैंक तथा वित्तीय संस्थाले ५ खर्ब ३७ अर्ब १९ करोड १४ लाख ९० हजार रुपैयाँ बराबरको ऋण लगानी गरेका छन् । रासस
 

Aarthik Abhiyan Viber Community

थप समाचार

प्रतिक्रिया [0]

   

Nepali PatroRiddhi Siddhi Cement