ई –पेपर | विज्ञापन | ग्राहक बन्नुहोस | Podcast |
arthik abhiyan
Tvs Raider

संयुक्त राष्ट्र संघको आकर्षक जागिर छोडेर हस्तकला रोज्ने मुर्खता गरेकी अर्चना (फोटो फिचर)

२०७९ साउन, १२  
विविध
Image Not Found
author avatar प्रकाश केसी

साउन १२, काठमाडौं । आकर्षक पारिश्रमिक पाइने भएकाले अन्तरराष्ट्रिय संघसंस्थाको रोजगारीलाई जागीरमध्येकै अब्बल मानिन्छ । त्यस्तो जागीर छाडेर अन्य पेशामा जाने मान्छेलाई त नेपाली समाजमा मुर्खको उपमा नै दिइन्छ ।

त्यस्तो मुर्खता गर्ने मध्ये एक हुन् अर्चना सिंह । क्राफ्टमाण्डु ह्यान्डिक्राफ्टकी सञ्चालीका सिंह १६ वर्ष संयुक्त राष्ट्र संघ (यूएन) अन्तर्गतका विभिन्न निकायमा काम गरिसकेपछि यो क्षेत्रमा आएर स्थापित भएकी हुन् ।

अर्चना संयुक्त राष्ट्रसंघ अन्तर्गतको लागू औषध र अपराध न्यूनीकरणसम्बन्धी निकाय यूएन ओडीसीमा जागीरे रहँदा उक्त जागीर छाडेर हस्तकलाको क्षेत्रमा आएकी हुन् ।

अहिले भने उनलाई त्यो जागीरले भन्दा हस्तकला व्यवसायले बढी चिनाएको जस्तो लाग्छ रे । ‘आत्मसन्तुष्टि पनि यसैमा बढी छ । यहाँ अरूका लागि पनि केही योगदान गर्न पाएकी छु,’ उनले आर्थिक अभियानसँगको कुराकानीमा भनिन् ।

‘प्रवेश गर्दा हस्तकलाका विषयमा खासै ज्ञान थिएन तर सानैदेखि रुचिको क्षेत्र भएकाले जागीर छाडेर यता लागेकी हुँ,’ उनले सुनाइन् । उनले जागीर छाडेको घरपरिवार र आफन्तलाई मन परेको थिएन । काम राम्रो हुँदै गएपछि भने सबैले इच्छाअनुसारको काम गर्नुपर्छ भनेर हौसला थपिदिए । परिवार र समाजको हौसलाले व्यवसायमा थप सफलता प्राप्त गर्न सहज भएको उनको अनुभव छ ।

नयाँ व्यवसाय शुरू गर्दा वर्षौंअघि स्थापित व्यवसायीसँग प्रतिस्पर्धा गर्न निकै चुनौतीपूर्ण थियो । तैपनि उनी हिम्मत नहारी लागिन् । हस्तकला उद्यममा सिक्दै गरेका र नयाँ उद्यमीले उत्पादन गरेका सामान ल्याएर विक्री गर्दै उनीहरूको व्यवसाय प्रवर्द्धनमा सहयोग पुर्‍याउन थालेकाले आफूलाई स्थापित हुन सहज भएको अर्चना सुनाउँछिन् ।

आफूले उत्पादन नगरे पनि अन्य महिला र सडक बालबालिकाका उत्पादन किनेर बेच्ने र त्यस्ता उद्यमीलाई साथ दिने गरेको उनले बताइन् ।

अमेरिकाबाट अन्तरराष्ट्रिय विकासमा स्नातकोत्तर सकेपछि स्वदेशमै केही गर्नुपर्छ भनेर फर्केको उनले सुनाइन् ।

आज उनी सफल महिला उद्यमीका रूपमा स्थापित छिन् । अर्चना आफै पनि पेन्ट गर्ने, पोते बनाउने काम गर्छिन् । आफ्नो सपना र व्यापारलाई जोडी मिलाउने क्रममा नेपाली उत्पादनको मात्र प्रवर्द्धन गर्ने गरेको उनले सुनाइन् ।

ललितपुरको   झम्सीखेलस्थित उनको क्राफ्टमाण्डु ह्यान्डिक्राफ्टमा नेपालमै उत्पादित बच्चाका लुगा, कुर्ता, पश्मिना, गिफ्टका सामान, कप, हातले पेन्ट गरिएका कार्ड, लेदर ब्याग, पर्स, चक्लेट, सिल्भरका सामान विक्री हुन्छ । भूकम्प र कोरोना महामारीअघि करीब ८० प्रतिशत विदेशी ग्राहक आउने गरेकोमा अहिले विदेशी ग्राहकको संख्या केही पातलिएको उनको भनाइ छ ।

Aarthik Abhiyan Viber Community
प्रतिक्रिया [0]

   

Nepali PatroRiddhi Siddhi Cement