ई –पेपर | विज्ञापन | ग्राहक बन्नुहोस | Podcast |
arthik abhiyan
TvsBiz Bazar

बेगनास-रुपा पम्प स्टोरेजको लागत २० अर्ब , पर्यटक बढ्ने संरचना बनाइदिन स्थानीयको माग

२०७९ असोज, ६  
समाचार
Image Not Found

पोखरा । बेगनास-रुपा पम्प स्टोरेज जलविद्युत आयोजनाको लागत २० अर्ब रुपैयाँ लाग्ने देखिएको छ ।

नेपाल विद्युत् प्रधिकरण, इञ्जीनियरिङ सेवा निर्देशनालय आयोजना विकास विभागले पोखराको लेखनाथस्थित बेगनास–रुपा पम्प जलासययुक्त जलविद्युत् आयोजनाको वातावरण तथा सामाजिक अध्ययन प्रगति विवरण सार्वजनिक गर्दै आयोजना निर्माण सम्पन्न गर्न २० अर्ब रुपैयाँ लाग्ने बताएको हो ।

विभागले वातावरण तथा सामाजिक क्षेत्रमा हालसम्म भएका अध्ययन प्रगतिका बारेमा बुधवार पोखरामा सरोकारवालासँग अन्तक्रियात्मक कार्यक्रम गरी विवरण सार्वजनिक गरेको हो ।

नेपालमै पहिलो प्रयोगमा बेगनास–रुपा पम्प जलासययुक्त जलविद्युत् आयोजना सञ्चालन गर्नका लागि प्राधिकरणको २० अर्ब रुपैयाँ खर्च लाग्ने प्राधिकरणका उपकार्यकारी निर्देशक रामजी भण्डारीले जानकारी दिए ।

उक्त जलासययुक्त आयोजनाबाट एक सय ५० मेगावाट विद्युत् उत्पादन हुने छ । विसं २०७४ मा सरकारबाट सर्वेक्षण अनुमतिपत्र प्राप्त गरी प्राधिकरणले जलविद्युत् सञ्चालन गर्न वातावरणीय तथा सामाजिक अध्ययन कार्य अगाडि बढाएको थियो ।

बेगनास तालमा भइरहेको पानीको सतहलाई एक मिटर बढाएपछि उक्त पानीलाई एक किलोमिटर लामो सुरुङ मार्गमार्फत रुपातालमा खसालिने छ । रुपातालको छेउमा विद्युत्गृह निर्माण गरेर १५० मेगावाट विद्युत उत्पादन गरिने छ । विद्युत उत्पादन गरिसकेपछि निस्केको पानीलाई पम्पको सहायताबाट पुनः बेगनास तालमा नै खसालिने छ ।

उक्त आयोजनाबाट ‘पिकआवर’ अर्थात साँझको समयमा दैनिक चार घण्टा विद्युत् निकाल्न सकिन्छ, यसले पिकआवरमा हुने विद्युत् अभावलाई केही मात्रामा सहयोग पुर्‍याउने प्राधिकरणका प्राविधिक प्रकाश गौडेलले जानकारी दिए ।

बेगनास तालभन्दा रुपातालमा रहेको पानीको सतह ६८ मिटर गहिराइमा भएकाले रुपातालमा विद्युत्गृह सञ्चालन गर्न सजिलो हुने छ । दैनिक अधिकतम साँझ ५ बजेदेखि ९ बजेसम्म विद्युत् उत्पादन गर्न सकिने र यस समयमा बेगनासको पानीको सतह एक मिटरले कम हुने छ राति १२ बजेदेखि देखि भोलिपल्ट बिहान ४ बजेसम्म रुपातालमा जम्मा भएको पानी पुनः बेगनासतालमा पम्पमार्फत तानिने छ । बेगनास भन्दा रुपाताल सानो भएकाले बेगनासको पानीको सतहभन्दा एक मिटरमाथिको पानी रुपामा अहिले भइरहेको पानीको सतहभन्दा तीन मिटर उचाइमा पुग्ने छ ।

एउटै तस्वीरमा बेगनास र रुपाताल । फोटो : रासस

अन्तक्रिया कार्यक्रममा सहभागी अधिकांश सरोकारवाला निकायका व्यक्तिले वातावरणीय तथा सामाजिक प्रभाव नहुने गरी जलविद्युत् आयोजना सञ्चालनमा ल्याउन आग्रह गरेका थिए ।

स्थानीय सरकोकारवाला समेत रहेका पूर्व स्वास्थ्य तथा गृहमन्त्री खगराज अधिकारीले जलचरमा पर्ने असरलाई कम गर्दै तालबाट हुने सिँचाइ, डुङ्गा व्यवसायी तथा स्थानीयवासीलाई असर नपुग्ने गरी आयोजना सञ्चालन गर्नुपर्नेमा जोड दिए ।

प्राधिकरणले आफ्नो स्वार्थभन्दा पनि स्थानीयवासीको स्वार्थलाई मध्यनजर गर्दै आयोजना अगाडि बढाउनुपर्ने र प्राधिकरणले ठाउँठाउँमा पानीको फोहरा राखेर बेगनासमा पर्यटकलाई एक रात बिताउने गरी संरचना पनि खडा गरिदिनुपर्ने अधिकारीले बताए ।

गण्डकी प्रदेश सरकारका पर्यटन, उद्योग तथा वाणिज्यमन्त्री मणिभद्र शर्मा कँडेलले स्थानीय जनताको सहमति र उनीहरूलाई नै रोजगारीमा सहभागी गराई आयोजना सञ्चालन गर्न आग्रह गरे।

गण्डकी प्रदेशका ऊर्जा सचिव डा. सन्तोष कैनीले ‘पीक आवरमा’ विद्युत् उत्पादन गर्नका लागि भनेर आयोजनाले घाटाको योजना सञ्चालन गर्न नहुने बताए ।

स्थानीयवासी तथा रुपा गाउँपालिकाका अध्यक्ष नवराज ओझाले विद्युत् आयोजनाका नाउँमा बस्ती नै डुब्ने सिञ्चाइ नै बन्द हुने किसिमबाट आयोजना सञ्चालन हुन नुहने बताए । साथै उनले वातावरणीय असर केही पनि नहुने किसिमबाट योजना सञ्चालन गर्नुपर्नेमा जोड दिए ।

स्थानीय सरोकारबाला तथा बेगनास सिंचाई सरोकार समितिका पूर्व अध्यक्ष पुष्पराज भण्डारीले बेगनास तालको पानीले ८८० हेक्टर जमिन सिँचाइ भएको र विद्युत् आयोजना सञ्चालन हुँदा स्थानीय उपभोक्ता सिँचाइबाट बञ्चित हुन नहुने बताए । रासस

Neco insurance Limited

थप समाचार

प्रतिक्रिया [0]

   

Nepali PatroRiddhi Siddhi Cement