ई –पेपर | विज्ञापन | ग्राहक बन्नुहोस | Podcast |
arthik abhiyan
Tvs

नेपालको पर्यटन पूर्वाधार र जलविद्युतमा इण्डोनेशियाको लगानी सम्भावना कति ? सिधा हवाई सम्पर्क प्रस्ताव

२०७९ असोज, ७  
बजार समाचार
Image Not Found
author avatar अभियान संवाददाता

काठमाडौं । नेपाल र इण्डोनेशिया बीच सिधा हवाई सम्पर्क विस्तारमा जोड दिइएको छ ।

नेपाल इण्डोनेशिया व्यवसायिक फोरम (Nepal-Indonesia Business Forum 2022) को बुधवार सम्पन्न बैठकमा सो कुरामा जोड दिइएको हो । 

भौगोलिक एवं सांस्कृति विविधता, प्राकृतिक सुन्दरताका हिसावमा समेत कतिपय कुरामा नेपाल र इण्डोनेशिया बीच समानता रहेको र यसबाट पर्यटन प्रवद्र्धनमा निकै ठूलो लाभ लिन सकिने सम्भावना रहेको बैठकमा छलफल भएको छ । यसका लागि सिधा हवाई सेवा संचालन सवैभन्दा महत्वपूर्ण रहेको कुरा बैठकमा उठाइएको हो । 

दुवै देशकातर्फबाट दौत्य सम्बन्ध स्थापना भएको ६० वर्ष पुरा भैसके पनि आर्थिक सम्बन्ध भने सोचेजति विस्तार हुन सकेको पाईंदैन । दुुई देश बीचको व्यापार घाटा निकै फराकिलो बन्दै गएको छ ।

इण्डोनेशियासंग नेपालको निर्यात व्यापार अत्यन्त न्यून रहेको पाइन्छ । सन् २०२१/२२ मा द्विपक्षीय व्यापार घाटा ५३ अर्ब २४ करोड रुपैयाँभन्दा बढी रहेको थियो । व्यापार घाटालाई कम गर्न संयुक्त लगानी विस्तारमा बैठकमा जोड दिइएको छ ।   

'नेपालमा इण्डोनेशियन पर्यटक भित्रयाउन सकिने अधिक सम्भाव्यता र आधारहरु छन् । हामी यसमा काम गरी दुवै देशका जनतालाई लाभान्वित बनाउन सक्छौं', नेपाल उद्योग वाणिज्य महासंघका अध्यक्ष शेखर गोल्छाले भने । 

महासंघमा आयोजित कार्यक्रममा अध्यक्ष गोल्छाले अन्तरराष्ट्रिय मन्चहरुमा पनि दुवै देशको बलियो सहकार्य रहेको बताए । उनले नेपालको आर्थिक विकासमा महासंघले राष्ट्रिय आर्थिक रुपान्तरण भिजन पेपर ल्याएको र त्यसले नेपालको आगामी दश वर्षभित्रको आर्थिक विकासको खाका कोरिएको पनि जानकारी गराए ।

अर्थतन्त्रको विस्तार, रोजगारी सृजना, व्यापार घाटा न्यूनिकरण भिजन पेपरका लक्ष्यहरु रहेका यसको कार्यान्वयनमा नेपाल सरकारसंग समेत सहकार्यका लागि सहमती भएको जानकारी दिँदै नेपालको आर्थिक विकासमा इण्डोनेशियाले हासिल गरेको सफलता बांडन अध्यक्ष गोल्छाले आग्रह गरे । 

पर्यटन क्षेत्रमा सहकार्यको ठूलो सम्भाव्यता रहेको भन्दै नेपालको महत्वपूर्ण व्यापारिक साझेदार भएको नाताले इण्डोनेशियाले नेपालमा संयुक्त लगानीमा उद्योग स्थापना गरी व्यापार घाटालाई न्युनिकरण गर्ने दिशामा सहयोग गर्न पनि गोल्छाले आग्रह गरे ।

नेपाल सन् २०२६ सम्म विकासशील मुुलुकमा स्तरोन्ती हुने तयारीमा रहेकाले आर्थिक विकासको हाम्रो प्रयासमा सहयोग गर्न अग्रह गर्दछुु, अध्यक्ष गोल्छाले भने । 

आगामी अक्टोवरमा इण्डोनेशियामा हुने ट्रेड एक्सोपोमा नेपालको सहभागिताका विषयमा पनि सो अवसरमा वृहद छलफल भएको थियो ।  

ट्रेड एक्सपोलाई दुुई देश बीचको आर्थिक व्यापारिक सम्बन्ध विस्तार, लगानी तथा प्रविधि तथा इण्डोनेशियामा नेपाल प्रवद्र्धनका लागि उपयुक्त फोरमको रुपमा उपयोग गर्न बैठकमा नेपालका लागि इण्डोनेशियाका राजदूत हेरु हर्टान्टो सुवालोले सुझाए ।

व्यापार घाटालाई कम गर्ने कार्यमा नेपाललाई सहयोग गर्न इण्डोनेशिया तयार रहेको भन्दै उनले नेपालमा लगानीका सम्भाव्य क्षेत्रका बारे ठोस सुुझाव दिन महासंघलाई अनुरोध गरे । 

द्रुत आर्थिक विकास गरीरहेको इण्डोनेशिया नेपालको आर्थिक विकासमा आफ्ना अनुुभव आदान प्रदान गर्न लालयित भएको पनि उनले बताए ।

उनले दुुवैै देशको संयुक्त लगानी मार्फत वस्तुतथा सेवा उत्पादन गरी तेस्रो मुलुकमा निर्यात गर्न सकिने सम्भाव्यता रहेको पनि औल्याए ।

इण्डोनेशियामा आगामी अक्टोवरमा हुने एक्सपोमा वंगलादेश, नेपाल र इण्डोनेशिया बीच छुट्टै विशेष बैठकको आयोजना गरिने जानकारी गराउँदै उक्त बैठकलाई बढी भन्दा बढी परिणामदायी बनाउनुुपर्नेमा जोड दिए ।

नेपालमा जलविद्युत तथा पर्यटन पूर्वाधारमा इण्डोनेशियाको लगानी ल्याउन सकिने कुरामा पनि सो अवसरमा छलफल भएको थियो ।

महासंघका वरिष्ठ उपाध्यक्ष एवं नेपालका लागि इण्डोनेशियाका अनररी काउन्सिल चन्द्र प्रसाद ढकालले नेपाल–इण्डोनेशिया व्यवसायिक फोरम बैठकले आपसी आर्थिक सम्बन्धलाई नयां उचाईमा लैजान सहयोग गर्ने विश्वास व्यक्त गरे ।

नेपालसँग सहकार्य गर्न इण्डोनेशिया सधै इच्छुक रहेको आफूले पाएको र निजी क्षेत्रका माध्यममार्फत आपसी सहकार्य, संयुक्त लगानी विस्तार, व्यापार घाटालाई न्यूनिकरण गर्ने र नेपालको निर्यात प्रवर्द्धनमा परिणामदायी ढंगबाट काम हुनुुपर्नेमा उनले जोड दिए । 

इण्डोनेशियासँग व्यापार व्यवसाय गर्ने नेपाली व्यवसायीहरुको समेत सहभागिता रहेको सो बैठकमा पाल्म आयलको आयात, नेपाली जैवलरीको इण्डोनेशियाको बजार प्रवर्द्धन, नेपालमा इण्डोनेशियन पर्यटन आकर्षण, संयुक्त लगानी लगायतका विषयमा जिज्ञासाहरू राखिएका थिए । 

Neco insurance Limited

थप समाचार

प्रतिक्रिया [0]

   

Nepali PatroRiddhi Siddhi Cement