भारतमा यसरी हुँदैछ एशियाकै ठूलो सुकुम्बासी बस्ती व्यवस्थापन, दुई खर्ब खर्चेर १० लाखलाई घर

नेपालमा हजारको संख्याका सुकुम्बासी व्यवस्थापन गर्नै सकस भएका बेला भारतको आर्थिक राजधानी मुम्बइमा भने एशिया क्षेत्रकै सबैभन्दा ठूलो सुकुम्बासी बस्ती व्यवस्थापनको जिम्मा भारतीय खर्बपति व्यापारी गौतम अदानीले पाएका छन् । त्यहाँ २ खर्ब रुपैयाँ खर्चेर १० लाख सुकुम्बासी परिवारलाई स्थान्तरण गरिने भएको छ ।

२०७९ मंसिर, १४

अन्तरराष्ट्रिय

काठमाडौं (अस) । सुकुम्बासी वस्ती व्यवस्थापन अहिले काठमाडौं महानगरको टाउको दुखाइको विषय बनेको छ । महानगरका कयौं वडामा छरिएर रहेका बस्ती जसरी पनि खाली गराउनु महानगरलाई फलामको च्यूरा चपाउनु सरह भएको छ ।

यस्तैमा एशियाको सबैभन्दा ठूलो सुकुम्बासी बस्ती मुम्बईको धारावीको पुनर्बास कार्यक्रम कार्यान्वयनको बाटो खुलेको छ ।

धारावी सुकुम्बासी पुनर्बास परियोजनाको जिम्मा भारतीय खर्बपति व्यापारी गौतम अदानीको रियल इस्टेट कम्पनीले पाएको छ । बोलकबोलमा ५० अर्ब ६९ करोड रुपयाको बोली लगाएर २ खर्ब भन्दा धेरै रकमको यो परियोजना अदानीको कम्पनीले जितेको हो ।

गएको १८ वर्ष देखि यो परियोजना अड्किएको थियो । धारावी पुनर्बास परियोजनाले झन्डै १० लाख मानिसहरु प्रभावित हुने बताइएको छ ।

सो परियोजनाका लागि दोस्रो उच्च बोली अर्को घरेलु रियल इस्टेट कम्पनी डीएलएफले २० अर्ब २५ करोड लगाएको थियो । धारावी पुनर्बास परियोजनाको मूल लागत २ खर्ब रुपया रहेको छ । यो परियोजनामा दक्षिण कोरिया र संयुक्त अरब ईमिरेट्स (यूएई)का कम्पनीहरुसमेत आठ ओटा कम्पनीले बोली लगाएका थिए ।

भारतको वित्तीय राजधानी मुम्बईको केन्द्रमा ६०० एकड क्षेत्रफलमा यो बस्ती फैलिएको छ । यहाँ ५८ हजार भन्दा धेरै सुकुम्बासी घर छन् भने १२ हजार भन्दा धेरै व्यवसायिक संघसंस्था छन् । यहाँ औषधि, छालाजन्य सामाग्री, जुत्ता र लत्ताकपडा बनाउने स–साना स्तरका कयौं असंगठित उद्योगहरु पनि छन् ।

यो परियोजनामा सहभागी हुन योग्य घर परिवार र व्यवसायहरूको पुनर्बास गरिनेछ । अदानीको कम्पनीले सात वर्षभित्र यस बस्तीका सुकुम्बासीहरूको पुनर्बासका लागि घर बनाउनु पर्नेछ ।

धारावीको ६०० एकड क्षेत्रफलमध्ये पुनर्बास परियोजनाले २४० एकड क्षेत्रफल मात्रै ओगट्नेछ । औद्योगिक र व्यवसायिक संघसंस्थाहरूलाई भने धारावीबाट अन्यत्र सारिनेछ । यो योजनामा योग्य नभएका सुकुम्बासी बासिन्दाहरूलाई पनि अन्यत्र सारिने योजना छ । एजेन्सी