उपेक्षामा साना तथा मझौला उद्योग

नेपाल उद्योग वाणिज्य महासंघले आज सोमवार साना तथा मझौला उद्योग व्यवसाय क्षेत्रको विकास, विस्तार एवं प्रवर्द्धनमा सहयोग पुर्‍याउने उद्देश्यले साना तथा मझौला उद्यमी सम्मेलनको आयोजना गर्दै छ । अर्थतन्त्रको विस्तारमा यस्ता उद्योगको भूमिका निकै ठूलो हुने भए पनि सरकारी सेवासुविधा भने पाउन सकिरहेका छैनन् ।

विकसित अर्थतन्त्र होस् या विकासशील सबै अर्थतन्त्रमा सबैभन्दा बढी रोजगारी सृजना गर्ने र अर्थतन्त्र विस्तार गर्नेमा साना तथा मझौला उद्योगको भूमिका ठूलो हुन्छ । साना तथा मझौला उद्योगले रोजगारी सृजनामा ६० प्रतिशत र कुल गार्हस्थ्य उत्पादनमा ४० प्रतिशत योगदान दिने गरेको बताइन्छ । त्यस्तै यिनले कुल गार्हस्थ्य उत्पादनमा २२ प्रतिशत योगदान दिएको र करीब १७ लाख रोजगारी सृजना गरेको बताइन्छ । अहिले हस्तकलाका क्षेत्रमा मात्रै १० लाखभन्दा बढीले रोजगारी पाएको देखिन्छ । त्यस्तै यही वर्गमा पर्ने पर्यटन क्षेत्रमा पनि १० लाखभन्दा बढीले प्रत्यक्ष रोजगारी पाएको बताइन्छ ।

तर, सरकारले कोरोनाबाट प्रभावित अर्थतन्त्रलाई राहत दिन दिएको सुविधा यस खाले उद्योगले पाएनन् । पुनर्कर्जाको लाभ लिन नपाएको गुनासो पनि सरकारले सुनेन । साना तथा मझौला उद्यमीले बैंकिङ सुविधासमेत पाउन गाह्रो रहेको बताइन्छ । उनीहरूलाई ऋण लिने प्रक्रिया नै थाहा नहुने, बैंकले पनि उनीहरूलाई त्यति प्राथमिकता नदिने हुँदा साना तथा मझौला उद्यमीहरू वित्तीय पहुँचबाट वञ्चित हुने गरेका छन् । हातमा क्षमता भएर पनि बजारीकरण गर्न नसक्दा कैयौं साना उद्यमीको लगानी र मेहनत खेर गएको छ । त्यस्तै परम्परागत प्रविधिलाई नयाँ प्रविधि र बजारसँग जोड्न नसक्दा पनि उनीहरू पछाडि परिरहेका छन् । त्यसैले राज्यले साना तथा मझौला क्षेत्रलाई वित्तीय, प्राविधिक र बजार निर्माणमा सहयोग गर्नुपर्ने देखिन्छ ।

प्रतिक्रिया [0]