न्युयोर्क । हजारौँ प्रदर्शनकारीहरूले शनिबार न्यूयोर्क, वासिङ्टन, र संयुक्त राज्य अमेरिकाका अन्य शहरहरूमा डोनाल्ड ट्रम्प र उनका कठोर नीतिहरूविरुद्ध दोस्रो चरणको ठूला प्रदर्शनहरू आयोजना गरेका छन्।

न्युयोर्कमा ‘अमेरिकामा राजा हुँदैनन्’ र ‘अत्याचारको प्रतिरोध गरौं’ जस्ता नारासहित अमेरिकी राष्ट्रपति लक्षित पम्मलेट बोकेका प्रदर्शनकारीहरू शहरको मुख्य पुस्तकालय बाहिर भेला भएका थिए।

आप्रवासीहरूलाई पक्राउ गर्ने आप्रवासन र सीमा शुल्क प्रवर्तन एजेन्सी (आइसीइ) को भूमिकाको विरोधमा धेरैले “नो आइस, आप्रवासीहरूलाई यहाँ स्वागत छ” भन्दै ट्रम्प प्रशासनको कागजातविहीन आप्रवासी निष्कासन नीति विरूद्ध प्रदर्शन गरेका छन् ।

वासिङ्टनमा प्रदर्शनकारीहरूले ट्रम्पले न्यायिक प्रक्रियाको अधिकार र संवैधानिक मूल्यहरूलाई खतरामा पारेको भन्दै चिन्ता व्यक्त गरेका छन् । “प्रशासनले कानूनी शासनको अवधारणा र संयुक्त राज्यका नागरिकहरूमाथि दुर्व्यवहार गर्ने विचारमाथि सीधै आक्रमण गरिरहेको छ,” ४१ वर्षीय बेन्जामिन डगलसले ह्वाइट हाउस बाहिर भने।

डगलसले गत महिना पक्राउ परेका प्यालेस्टिनी समर्थक विद्यार्थी महमुद खलिलको रिहाइको माग गर्दै ब्यानर बोकेका थिए । उनले ट्रम्प प्रशासनले ‘विदेशीविरोधी भावना फैलाएको’ र ‘कानूनी संरक्षणहरू कमजोर पारेको’ आरोप लगाए।

“हामी ठूलो खतरामा छौं,” ७३ वर्षीया प्रदर्शनकारी क्याथी भालीले भनिन्, जो यहूदी नरसंहारबाट बाँचेकाहरूकी छोरी हुन् । “हिटलर सत्तामा आउने कथा यहाँ दोहोरिँदैछ। फरक यति हो कि ट्रम्प हिटलर वा अन्य फासिस्टहरूजति चतुर छैनन् । उनी प्रयोगमा परेका छन्... र उनको आफ्नै टोली विभाजित छ।”

विज्ञानको उपेक्षा गरेको आरोप
२६ वर्षीया डानिएला बटलरले सरकारले विज्ञान र स्वास्थ्य क्षेत्रमा गरेको बजेट कटौतीको विरोध गर्दै दादुराको प्रकोप देखाइएको टेक्सास राज्यको नक्सा बोकेकी थिइन्। ट्रम्पका स्वास्थ्य सल्लाहकार रोबर्ट एफ. केनेडी जुनियर (प्रख्यात खोप विरोधी व्यक्ति) ले दशकौंदेखि एमआरआर (दादुरा, गलगाँड, रुबेला) खोपलाई अटिजमसँग झुटो जोडेका छन्। "विज्ञानको उपेक्षा भयो भने मानिसहरू मर्छन्,” बटलरले भनिन्।

टेक्सास र सान फ्रान्सिस्कोमा प्रतिक्रिया
टेक्सासको गाल्भेस्टन शहरमा पनि सानो समूहले ट्रम्पविरोधी प्रदर्शन गरिरहेको छ । “यो मेरो चौथो विरोध हो। म चुपचाप अर्को चुनावको प्रतीक्षा गर्ने गर्थें,” ६३ वर्षीया लेखक प्याट्सी ओलिभरले भनिन्, “तर अहिले त्यसो गर्न सकिँदैन। हामीले पहिले नै धेरै गुमाइसकेका छौं।”

पश्चिमी तटको सान फ्रान्सिस्कोमा सयौँले समुद्रकिनारमा महाभियोग लगाऊ, हटाऊ भन्ने नारा लगाए । केहीले उल्टो अमेरिकी झन्डा बोकेका थिए, जुन संकटको प्रतीक हो।

प्रदर्शनकारीहरूले ट्रम्पको अप्रवासन नीति, बजेट कटौती, र स्वतन्त्र प्रेस/न्यायपालिकामा दबाबको विरोधमा दीर्घकालीन आन्दोलन बनाउने लक्ष्य राखेका छन्।

प्रमुख आयोजक समूह ‘५० हजार ५०१’ ले ५० राज्यमा ४०० भन्दा बढी प्रदर्शन गर्ने योजना बनाएको छ। उनीहरूको वेबसाइट अनुसार यी “ट्रम्प प्रशासन र उनका धनी सहयोगीहरूको गैर-कानूनी कार्यहरू विरुद्धको अहिंसात्मक प्रतिक्रिया” हुन्।

यद्यपि, अप्रिल ५ मा भएको ‘ह्यान्ड्स अफ’ प्रदर्शनको तुलनामा यसपटक सहभागिता केही कम रहेको छ।  रासस/एएफपी