काठमाडौं । लाइफ इन्स्योरेन्स कर्पोरेशन (नेपाल) लिमिटेडले मंसिर १२ गतेदेखि पुस १७ गतेसम्म निष्कासन तथा विक्री खुला गरेको हकप्रद शेयर माघ ७ गते बाँडफाँट गरेको छ । निष्कासन गरेको हकप्रद शेयर खरीदका लागि आवेदन दिने आज अन्तिम दिन रहेको छ ।

कम्पनीले हाल कायम चुक्तापूँजीको आधारमा ८८ दशमलव ४५१६८ प्रतिशत हकप्रद शेयर निष्कासन गरेको थियो । तोकिएको अवधिभित्र रितपूर्वक आवेदन दिने ११ हजार ४६८ जना आवेदकलाई २ करोड २९ लाख ७५ हजार ४२३ कित्ता हकप्रद शेयर बाँडफाँट गरिएको जानकारी कम्पनीले दिएको छ ।

कम्पनीले प्रतिशेयर १०० रुपैयाँ अंकित मूल्यमा २ अर्ब ३४ करोड ६८ लाख रुपैयाँ बराबरको २ करोड ३४ लाख ६८ हजार कित्ता हकप्रद शेयर निष्कासनमा ल्याएको थियो । यस आधारमा यो चरणमा ४ लाख ९२ हजार ५७७ कित्ता हकप्रद शेयर वितरण हुन नसकेको देखिन्छ । यी शेयर कम्पनीले लिलामी प्रक्रियाबाट विक्री गर्नेछ । यो हकप्रद शेयर बाँडफाँटमा नपरेको रकम माघ १० गतेदेखि सम्बन्धित आवेदकको बैंक खातामा रकमान्तर गरिने जानकारीसमेत कम्पनीले दिएको छ ।

यो हकप्रद शेयर निष्कासन प्रयोजनका लागि कम्पनीले कात्तिक ९ गते बुक क्लोज गरेको थियो । बुक क्लोजको आधारमा कात्तिक ८ गतेसम्म कायम शेयरधनीहरूले मात्र कम्पनीको हकप्रद शेयर बाँडफाँटमा प्राप्त गरेका हुन् ।

हाल कम्पनीको चुक्तापूँजी २ अर्ब ६५ करोड ३२ लाख रुपैयाँ रहेको छ । सम्पूर्ण कित्ता हकप्रद शेयर बाँडफाँट पश्चात् कम्पनीको चुक्तापूँजी ५ अर्ब रुपैयाँ कायम हुनेछ । हकप्रद शेयर निष्कासन तथा विक्री प्रबन्धकमा नेपाल एसबिआई मर्चेण्ट बैंकिङ लिमिटेड रहेको छ ।

Life Insurance Corporation (Nepal) Limited (LICN)

Life Insurance Corporation (Nepal) Limited (LICN)