काठमाडौं । एनएलजी इन्स्योरेन्स कम्पनी लिमिटेडले गत मंसिर ११ गतेदेखि निष्कासन गरेको ६२ दशमलव ५६ प्रतिशत हकप्रद शेयरमा आवेदन दिने अवधि पाँच दिन मात्र बाँकी रहेको छ । मेरो शेयर अलनाइनबाट आवेदन दिनेहरूका लागि पाँच दिन समय रहेको छ भने आस्बा सदस्य बैंक तथा वित्तीय संस्थामा गएर आवेदन दिनेको हकमा तीन दिनको समय रहेको छ ।

कम्पनीले यसअघि पुस १ गतेसम्म निष्कासन मिति तय गरेकोमा १५ दिन अवधि थप गर्दै पुस १६ गतेसम्मको मिति कायम गरेको हो । यो बीचमा पुस १३ गते शनिवार र पुस १५ गते सोमवार सार्वजनिक बिदा रहेको छ ।

कम्पनीले शुक्रवार सूचनामार्फत आफ्नो हकको शेयर सुरक्षित गर्न अनुरोध गरेको छ । यो हकप्रद शेयर निष्कासन प्रयोजनका लागि कात्तिक २७ गते एक दिन बुक क्लोज गरिएको थियो । बुक क्लोजको आधारमा कात्तिक २६ गतेसम्म कायम शेयरधनीहरू मात्र कम्पनीको हकप्रद शेयरमा आवेदन दिन सक्नेछन् ।

कम्पनीले प्रतिकित्ता १०० रुपैयाँ अंकित मूल्यमा ९६ करोड ३१ लाख २२ हजार २२ रुपैयाँ बराबरको ९६ लाख ३१ हजार २२० दशमलव २२ कित्ता हकप्रद शेयर निष्कासन गरेको हो ।

हकप्रद निष्कासनका लागि गराएको रेटिङ्गमा इक्रा नेपाल लिमिटेडले कम्पनीलाई समयमा वित्तीय दायित्व वहन गर्ने क्षमता पर्याप्त सुरक्षित रहेको संकेत गर्ने इक्राएनपी इस्यूअर रेटिङ्ग ए माइनस प्रदान गरेको छ ।

कम्पनीको हकप्रद शेयर निष्कासन तथा विक्री प्रबन्धकमा लक्ष्मी सनराइज क्यापिटल लिमिटेड रहेको छ ।

विक्री प्रबन्धकसँगै एनएलजी इन्स्योरेन्सका केन्द्रीय तथा क्षेत्रीय कार्यालयहरू र लक्ष्मी सनराइज बैंकका काठमाडौं उपत्यका बाहिरका तोकिएका शाखा कार्यालयबाट आवेदन दिन सक्ने व्यवस्था रहेको छ । साथै नेपाल धितोपत्र बोर्डबाट अनुमतिप्राप्त सम्पूर्ण आस्बा सदस्य बैंक तथा वित्तीय संस्था र तिनका शाखा कार्यालयमार्फत पनि आवेदन दिन सकिने व्यवस्था छ ।

अनलाइन आवेदनका लागि मेरो शेयर समेत प्रयोग गर्न सकिने व्यवस्था गरिएको छ । यस कम्पनीलाई २ अर्ब ५० करोड रुपैयाँ चुक्तापूँजी कायम गर्नुपर्ने बाध्यात्मक अवस्था छ । यो हकप्रद विक्रीपछि कम्पनीको चुक्तापूँजी २ अर्ब ५० करोड २६ लाख ५७ हजार रुपैयाँभन्दा बढी कायम हुनेछ ।

NLG Insurance Company Ltd. (NLG)

NLG Insurance Company Ltd. (NLG)