काठमाडौं । एनआईसी एशिया डाईनामिक डेप्ट फण्डको इकाई कारोबारमा लाग्ने शुल्क घटेको छ । योजना व्यवस्थापक एनआईसी एशिया क्यापिटलले चैत १ गतेदेखि लागू हुने गरी प्रतिकारोबार इकाई हस्तान्तरण शुल्क रू. ५ लाग्ने व्यवस्था गरेको हो ।
यसअघि इकाईधनीहरूबाट प्रत्येक कारोबार राफसाफ शुल्क रू. २५ लाग्ने व्यवस्था रहेकोमा रू. २० शुल्क घटाइएको हो । एनआईसी एशिया बैंक कोष प्रबर्द्धक रहेको खुलामुखी प्रकृतिको यस योजना २०७७ सालदेखि सञ्चालनमा रहेको छ । यस योजना सञ्चालनका लागि योजना व्यवस्थापकले २०७७ साल कात्तिक २१ गते नेपाल धितोपत्र बोर्डबाट स्वीकृति पाएको थियो ।
माघ मसान्तसम्मको वित्तीय विवरण अनुसार यस योजनाको इकाई संख्या ५ करोड १४ लाख ४६ हजार ३०० रहेको थियो । सो अवधिसम्म योजनाको प्रतिइकाई खुद सम्पत्ति मूल्य रू. १० दशमलव ७२ रहेको थियो । उक्त योजनाले फागुन महीनाको वित्तीय विवरण भने सार्वजनिक गरेको छैन ।