काठमाडौं । मेची राजमार्गको फिदिम–ताप्लेजुङ सडकखण्डमा पर्ने फिदिम ४ र हिलिहाङ् ७ जोड्ने हेवा खोलामा निर्माणाधिन पुल भाँचिएको घटनाबारे छानविनका लागि भौतिक पूर्वाधार तथा यातायात मन्त्रालयले समिति गठन गरेको छ ।
मन्त्री देवेन्द्र दाहालले मन्त्रीस्तरीय निर्णय गरि ५ सदस्यीय अध्ययन तथा छानबिन समिति गठन गरेका हुन् ।
सडक विभागका उपमहानिर्देशक ललिजन खनालको संयोजकत्वमा गठित समितिमा संघीय सडक सुपरीवेक्षण तथा अनुगमन कार्यालय, दमकका प्रमुख विनोदकुमार मौवार, सडक डिभिजन कार्यालय, बुटवलका प्रमुख जीवेन्द्र मिश्र, दमक डिभिजन प्रमुख श्यामकुमार यादव र सडक विभागका सीडीई अमितकुमार वर्मा सदस्य छन् ।
समितिलाई सो पुल भत्कनुको कारण, भविष्यमा यस्ता घटना हुन नदिन अपनाउनु पर्ने सुझाव तथा सो स्थानमा तत्काल अस्थायीरूपमा यातायात सञ्चालन गर्ने विषयमा समेत स्थलगत अध्ययन तथा छानबिन गरि ७ दिनभित्रमा प्रतिवेदन पेश गर्ने कार्यभार दिइएको छ । समितिले आइतवारदेखि नै काम शुरु गरिसकेको छ ।
मन्त्री दाहालले उक्त अप्रत्याशित घटनाप्रति दुःख व्यक्त गर्दै उपचाररत घाइतेहरूको उपचारमा कुनै कमि हुन नदिने गरि व्यवस्था मिलाउन मन्त्रालयका सचिव केशवकुमार शर्मा तथा सडक विभागका महानिर्देशक डा. विजय जैसीलाई निर्देशनसमेत दिएका छन् ।
