काठमाडौं । विन नेपाल लघुवित्त वित्तीय वित्तीय संस्था लिमिटेडको एफपीओ निष्कासन भएको छ । कम्पनीले सर्वसाधारणतर्फको हिस्सा ३० प्रतिशत कायम गर्न प्रतिकित्ता १०० रुपैयाँ अंकित मूल्यमा ५१ लाख २९ हजार २५० रुपियाँबराबरको ५१ हजार २९२ दशमलव ५ कित्ता एफपीओ निष्कासन गरेको हो ।
यो एफपीओे निष्कासन मिति छिटोमा चैत २६ गतेसम्मका लागि तय गरिएको छ । छिटो अवधिभित्र माग बमोजिम आवेदन नपरेमा भने ढिलो अवधि २०८२ साल वैशाख ४ गतेसम्म निष्कासन लम्बिनेछ । तर पछिल्लो समय आईपीओ तथा एफपीओमा पहिलो दिनमै मागभन्दा बढी आवेदन परेको तथ्याङ्क छ ।
यसलाई आधार मान्दा कम्पनीको एफपीओ पनि छिटो अवधि चैत २६ गतेसम्म मात्र निष्कासनमा रहने निश्चित छ । आवेदन दिँदा न्यूनतम १० कित्तादेखि अधिकतम १ हजार कित्तासम्मका माग गर्न सकिनेछ ।
यो एफपीओ निष्कासन तथा बिक्री प्रबन्धकमा नेपाल एसबिआई मर्चेन्ट बैंकिङ्ग लिमिटेड रहेको छ । विक्री प्रबन्धकसँगै नेपाल धितोपत्र बोर्डबाट स्वीकृत प्राप्त सम्पूर्ण सि–आस्बा सदस्य बैंक तथा वित्तीय संस्था र तिनका तोकिएका कार्यालयबाट आवेदन दिन पाइनेछ । साथै मेरो शेयर अनलाइन मार्फत समेत आवेदन दिन सकिने व्यवस्था छ ।
एफपीओ निष्कासन प्रयोजनका लागि गराइएको रेटिङ्गमा क्रेडिट रेटिङ्ग कम्पनी केयर रेटिङ्ग नेपालले वित्तीय दायित्व बहन गर्ने क्षमतामा उच्च जोखिम रहेको संकेत गर्ने केयर एनपी सिंगल बी इस्यूअर रेटिङ्ग प्रदान गरेको छ ।
हाल कम्पनीकोे चुक्ता पूँजी ७ करोड ९२ लाख ११ हजार ३०० रुपैयाँ रहेको छ । एफपीओ निष्कासन तथा बाँडफाँटपश्चात् कम्पनीको चुक्ता पूँजी ८ करोड ४३ लाख ४० हजार ५५० रुपैयाँ कायम हुनेछ । यो कम्पनी धितोपत्र दोस्रो बजारमा २०७५ साल जेठ १७ गते सूचीकृत भएको थियो ।
गत आर्थिक वर्ष ०८०÷८१ सम्म कम्पनी १ करोड ६१ लाख रुपैयाँभन्दा बढी सञ्चित नोक्सानीमा रहेको छ । सो अवधिसम्म कम्पनीको प्रतिशेयर नेटवर्थ भने १०७ रुपैयाँ र प्रतिशेयर आम्दानी १ रुपैयाँ ४५ पैसा छ । चालू आर्थिक वर्षको दोस्रो त्रैमाससम्मको अपरिस्कृत वित्तीय विवरण अनुसार कम्पनी २ करोड ८६ लाख रुपैयाँभन्दा बढी सञ्चित नोक्सानीमा रहेको छ । सो अवधिसम्म कम्पनीको प्रतिशेयर नेटवर्थ ९१ रुपैयाँ २३ पैसा छ ।
