स्पेनको क्यानरी द्वीपसमूहमा हजारौं मानिस सडकमा ओर्लिएर पर्यटनविरुद्ध प्रदर्शन गरे । उनीहरूले सरकारसँग पर्यटकको संख्या सीमित गर्न माग गर्दै स्थानीय बासिन्दालाई महँगो आवास, ट्राफिक जाम र सेवाहरूमा अत्यधिक दबाबबाट जोगाउन अनुरोध गरे ।
‘क्यानरीको पनि सीमा हुन्छ’ भन्ने प्लेकार्ड बोकेर प्रदर्शनकारीहरू सम्पूर्ण द्वीपसमूहका मुख्य टापुहरूमा तथा स्पेनको मुख्यभूमिका विभिन्न शहरहरूमा सडकमा उत्रिए । केहीले पर्यटनले पानी आपूर्तिमा पारेको असरबारे पनि नारा लगाए ।
एक होटेल व्यवस्थापक होआन फ्रान्सिस्को गालिन्दोले रोयटर्सलाई भने, ‘पर्यटन क्यानरी द्वीपका लागि धेरै महत्त्वपूर्ण छ, तर हामीले बुझ्नुपर्छ कि अहिले स्थिति पूर्ण रूपमा संकटमा छ ।’
उनका बुबाको सानो जमीनमा २०२३ मा स्थानीय प्रशासनले एक लक्जरी होटेल परियोजनाको अनुमति दिए पनि अधिग्रहण आदेश जारी गरेको थियो ।
भर्खरै, स्पेन सरकारले एअरबीएनबीलाई ६५,००० भन्दा बढी होलिडे रेन्टल सूचीहरू हटाउन आदेश दिएको छ, जसमाथि विद्यमान नियमहरू उल्लङ्घन गरिरहेको आरोप लागेको थियो । उपभोक्ता अधिकार मन्त्रालयका अनुसार ती सूचीहरूमा अधिकांशले लाइसेन्स नम्बर समावेश गरेका छैनन् र धेरैमा सम्पत्ति मालिक व्यक्ति हुन् वा कम्पनी भन्ने जानकारी छैन ।
भाडा अत्यधिक महँगो हुँदा स्पेनले अर्को समस्या पनि सामना गरिरहेको छ, घरबारविहीन हुने समस्या । म्याड्रिडको अन्तरराष्ट्रिय विमानस्थलमा हाल सयौं बेघर मानिस बसोवास गरिरहेका छन् । त्यहाँ ५४ वर्षीया टेरेसा, जसले आफ्नो सुरक्षाका कारण पूर्ण नाम नखुलाउन अनुरोध गरिन्, पछिल्लो ६ महीनादेखि विमानस्थलको टर्मिनल ४ मा बस्दै आएकी छन् ।
‘हामी माग गर्न सक्दैनौं । हामी सुकुमबासी हौं,’ टेरेसाले भनिन् । ‘यो निजी सम्पत्तिमा हामी बसेका छौं भन्ने थाहा छ । हामी सरकारसँग सहयोग चाहन्छौं तर अहिलेसम्म कोही आएको छैन ।’
स्पेनको विमानस्थल सञ्चालन गर्ने संस्था एईएनएले केही दिनभित्रै लागू हुने गरी अब विमानस्थलमा यात्रा नगर्ने मानिसहरूको प्रवेशमा रोक लगाउने बताएको छ । यात्रुहरूले बोर्डिङ पास देखाउनुपर्नेछ । यद्यपि, एयरपोर्टका कर्मचारीहरू र यात्रुलाई सँगै पुर्याउने व्यक्तिलाई भने छूट दिइनेछ ।
महीनाौंदेखि विभिन्न तहका सरकारी निकायहरूबीचको दोषारोपणका कारण समस्या समाधान हुन सकेको छैन । म्याड्रिड शहर परिषद्ले केन्द्र सरकारसँग प्रत्येक बेघर व्यक्तिको पुनर्वासको योजना बनाउन आग्रह गरेको छ । तर, एईएनएले भने शहर परिषद्ले उचित सहयोग नगरेको आरोप लगाएको छ ।
६६ मिलियन यात्रुले वार्षिक यात्रा गर्ने यो विमानस्थलमा कति बेघरवाला छन् भन्ने यकीन तथ्याङ्क छैन । यद्यपि, एक सामाजिक संस्थाले गरेको गणनामा करीब ४०० जना बेघर मानिस विमानस्थलमा बसोवास गरिरहेको पाइएको थियो । म्याड्रिड शहर परिषद्ले गत अप्रिलमा ९४ जना बेघरलाई सहायता गरेको थियो जसमध्ये १२ जनालाई आवास, नशामुक्ति केन्द्र वा स्वतन्त्र जीवनका लागि पुनः स्थापित गरिएको बताएको छ ।
टेरेसाले भनिन्, ‘म चाँडै काम फेला पार्ने आशामा छु, चाहे सरकारले हामीलाई बाहिर जान बाध्य पारोस् ।’ उनले र उनका श्रीमान्ले विमानस्थलको उज्यालो गल्लीमा शान्तसँग बस्ने प्रयास गरेको र अन्य समस्या भएका बेघरहरूबाट टाढा रहने गरेको बताइन् ।
(रोयटर्सबाट)
