काठमाडौं । लाइफ इन्स्योरेन्स कर्पोरेशन (नेपाल) लिमिटेडले असार ३० गते २३औं वार्षिक साधारण सभा बोलाएको छ ।

गत आर्थिक वर्ष ०८०\८१ को वार्षिक प्रतिवेदन सहितका वित्तीय विवरणहरू पारित गर्नुका साथै प्रस्तावित लाभांशलाई अन्तिम स्वीकृति प्रदान गर्न कम्पनीले सभा गर्ने निर्णय गरेको हो ।

असार ४ गते बसेको कम्पनीको सञ्चालक समितिको बैठकले ललितपुरको जावलाखेलस्थित नेपाल प्रशासनिक प्रशिक्षण प्रतिष्ठानमा बिहान १० बजे सभा गर्ने निर्णय गरेको हो ।

सभाले गत आर्थिक वर्षको वार्षिक प्रतिवेदन सहितका वित्तीय विवरणहरू पारित गर्नुका साथै चालू आर्थिक वर्षको लागि लेखपरीक्षक नियुक्ति र निजको पारिश्रमिक निर्धारणको विषय टुङ्ग्याउनेछ ।

यस वर्ष कम्पनीले १० प्रतिशत बोनस शेयर र कर प्रयोजनका लागि शून्य दशमलव ५३ प्रतिशत नगद लाभांश वितरण गर्ने प्रस्ताव गरेकाले सो प्रस्ताव पनि सभाले पारित गर्नेछ । साथै बोनस शेयरपछि कम्पनीको पूँजी वृद्धि हुने हुँदा सोही बमोजिम प्रबन्धपत्र तथा नियामावली संशोधन गर्ने र त्यसको सम्पूर्ण जिम्मेवारी सञ्चालक समितिलाई दिने निर्णय पनि सभाले गर्नेछ ।

सर्वसाधारण शेयरधनीहरूबाट एक जना सञ्चालक निर्वाचन गर्ने प्रस्ताव गरेको कम्पनीले संस्थापक तर्फबाट नियुक्त गरिएको सञ्चालकहरूको अनुमोदन समेत सभाबाट गराउनेछ ।

सभा प्रयोजनका लागि कम्पनीले असार १६ गते एक दिन बुक क्लोज गर्न लागेको छ । बुक क्लोजको आधारमा असार १५ गतेसम्म कायम शेयरधनीहरू मात्र सभामा भाग लिन र लाभांश प्राप्त गर्न सक्नेछन् ।